নুংশিবগী ঈচেল অমা থিরিবা, শান্তিগী লম্বেল অমদা চংশিল্লিবা কবি মাইস্নাম রাজেশকী শৈরেং লাইরিক “মোংফম থম্মোয়গী নুংশিবা”- মিৎয়েং অমা
নুংশিবগী ৱারী, শান্তীগী পাম্বৈ লাংতকননা য়েংনরি অমদি থিনরি। খুৎনা পায়বসু য়াদে অমদি নকশিল্লুরবসু হেক্তা মাংখি। অদুবু থম্মোয়গী থম্মোয়দদি লেংদনা লৈরমগনি। পেন্দবা, নুংঙাইতবা, শাওনিংবা, লৌনম নম্থাক, নীংবা কায়বা, অৱাবা খায়না মৈচাক; পুবা থাংবা ঙমদবা পুন্সিগী পোৎলূম, লৈবাক খুনাই অমদি পুন্সি মহিং পুম্নমক অসিদা করিগুম্বা অমদি য়াওরি, হায়নিংবা ৱাফম অমদি লোয়নরি মীওইবনা হিংলিবসিদা করি পাউখোংনো চল্লিবসি হায়না। ৱাহং ময়াম অসিগী পাঊখুম পীনবা হোৎনবদা কবিশিংনা শৈরেংগী ঈচেলদা হেক হেক লুপ্তুনা য়েংলকলি ঈখৌলাংবা পুকনিংবু শান্তি পিনবা। কবি মৈস্নাম রাজেশসু মহাক্কি পুকনিংনা করি পাম্লিবা হায়বদু খোরিলোলগী ইরেনবুংদা ঈরুপতুনা থিরক্লি।
লাইরিক্কী মমিং-মোংফম থম্মোয়গী নুংশিবা(২০০৫)
অইবাঃ মাইস্নাম রাজেশ
অফোঙবাঃ ঈনাৎ পাব্লিকেশন্স,
ছায়াতরু-৪, লামাবাজার, সিলেট, বাংলাদেশ
লাইরিক্কী মমলঃ ৭০ টাকা(বাংলাদেশ) লুপা ৫০(ইন্দিয়া)
লাইরিক্কী মখুমঃ এন যোগেশ্বর অপু
লাইরিক্কি মখলঃ শৈরেং
মৈস্নাম রাজেস হায়রগসু হেন্না শকখঙনবা রবি কিরন সিংহ বাংলাদেশকী সিলেটতা ১৯৭৭দা তাইবঙ খোঙদারকখি। মচিল মনাও মরিগী মনুংদা মহাকনা ইতোন তোনবনি। বাংলাদেশতা লৈবা মনিপুরী কবি অমা ওইনসু থোইদোকনা মীয়াম্না খঙনরবা অইবা অমসুং কলচরেল এক্তিভিস্ত অমসুনি। মশাগী লাইরিক মোংফম থম্মোয়গী নুংশিবা (শৈরেংগী খোমজিনবা লাইরিক ২০০৫), স্বর্নকমল ( রতন থিয়ামগী সনাগী থম্বাল হায়না মিংথোনবা শৈরেং লাইরিক অসি বাংলা লোন্দা ত্রান্সলেসন তৌদুনা ২০১৭তা ফোংখ্রে)।
বাংলাদেশ অমসুং মপাল লমদা পাঙথোকপা কবি সামেলনশিংদা অমদি ৱাইতর্স মিতশিং মরু ওইনা নোর্ট ইস্ত ৱাইতর্স ফোরম্না ইম্ফালদা পাঙথোকখিবা ৱাইতর্স মিত ২০০৫তা শরুক য়াখ্রে। সাহিত্য থৌপাং লূপ ইম্ফালনা শিন্দুনা পাঙথোকখিবা ইন্দো বাংলা ইন্তরনেসনেল পোইত মিত, ২০১৩দা শরুক য়াখি। অমদি সাথৌলূপ্না পাঙথোকপা ইম্ফাল লিটরেচর, ২০১৬দসু শরুক য়াখি। মসিতসু নত্তনা SAARC ৱাইতর্স অমসুং লিটরেচর (FOSWAL)না শিন্দুনা দেল্লীদা ২০১৭দা পাংথোকখিবা লিটরেচর ফেস্তিবেলদসু শরুক য়াখি।
বংলাদেশতা মনিপুরী লোল অমসুং খোরিলোল হেন্না চাওখৎনবা থৱায় হকচাং য়াওনা হোৎনরিবা নহারোলশিংগী মরক্তা মহাকসু শিংথানিংঙাই ওইবা খুদোল কয়া তম্লিবা অইবা অমনি। মহাকনা বংলাদেশ মনিপুরী সাহিত্য সংসদকি জেনরেল সেক্রেটরিগী থৌসু পুরমখি। মহাক মনিপুর কলচরেল কমপ্লেক্সকি মেম্বর সেক্রেটরি ওইনসু থৌ পুরি। হৌজিক হৌজিক নুংতিগী ফোংবা পাউচে সিলেটের দিনকালগী চীফ ন্যুজ ইদিতর ওইনা থবক তৌরি।
নুংশিবগী ৱারী, শান্তীগী পাম্বৈ লাংতকননা য়েংনরি অমদি থিনরি। খুৎনা পায়বসু য়াদে অমদি নকশিল্লুরবসু হেক্তা মাংখি। অদুবু থম্মোয়গী থম্মোয়দদি লেংদনা লৈরমগনি। পেন্দবা, নুংঙাইতবা, শাওনিংবা, লৌনম নম্থাক, নীংবা কায়বা, অৱাবা খায়না মৈচাক; পুবা থাংবা ঙমদবা পুন্সিগী পোৎলূম, লৈবাক খুনাই অমদি পুন্সি মহিং পুম্নমক অসিদা করিগুম্বা অমদি য়াওরি, হায়নিংবা ৱাফম অমদি লোয়নরি মীওইবনা হিংলিবসিদা করি পাউখোংনো চল্লিবসি হায়না। ৱাহং ময়াম অসিগী পাঊখুম পীনবা হোৎনবদা কবিশিংনা শৈরেংগী ঈচেলদা হেক হেক লুপ্তুনা য়েংলকলি ঈখৌলাংবা পুকনিংবু শান্তি পিনবা। কবি মৈস্নাম রাজেশসু মহাক্কি পুকনিংনা করি পাম্লিবা হায়বদু খোরিলোলগী ইরেনবুংদা ঈরুপতুনা থিরক্লি। মহাক্কী অহানবা ফোঙবা শৈরেং লাইরিক অসিদা পুন্না শৈরেং ২৮ য়াওরি। ফজরবা সিম্বল অমদি ইমেজরি মতাং চানা শিজিন্নবা থেংনৈ। বাংলাদেশকি লৈমায়দা চাওরকপা ওইবনা মনিপুরী লোল শিজিন্নবদা মনিপুরদা ঙাংনরিবা অমদি ইনরিবা মওং অসিগা খরদংদি খেন্নবসু মরক্তা য়াওদবা নত্তে। মসি মপাল লমদা খুন্দা লৈতাদুনা লৈরিবা মনিপুরী অইবশিং শম্না দাইস্পোরা অইবশিংদা থেংনবা খুৎই মখল অদুনি। মসিমকনা মনিপুরী লোল অসি হেন্না ইনাকখুলহনবদা য়াম্না মতেং ওই হায়না লৌই। মরমদি ইমালোল অসি মনিপুরদা শিজিন্নরিবা অসিদগী হেন্দোক্তুনা মীরমদসু মনিপুরীশিংনা পাক শন্না শিজিন্নরকপা হায়বসি লোনগী পূক্কৈ অসি চাওথোকরক্লিবনি হায়না লৌবদা থোইনা লাল্লোই হায়না খল্লি। মৈস্নাম রাজেশকী শৈরেং অয়াম্বা য়াম্না তেন্না ৱাহৈ খরনা মতিং লৈনা হায়নিংলিবা অমদি পাউদমনিংবা অদু ময়েক লানা শৈথানবা হোৎনবা থেংনৈ।
বাংলাদেশকী লৈবাক লৈহাওদা চাওরকলবসু অইবগী থৱায় মীরেলদি ঈগী হৌরকফম ওইরিবা পরি পুরীগী খোইরি নাওফম তাফম মনিপুর সনা লৈবাক অসিদা লেংদনা লৈরি। মসিগী ময়েক লারবা খুদম ওইবা শৈরেং কয়া য়াওরি। ইমা লৈবাক মনিপুরনা তংদু লৈতদনা লৈখিবা মীকুপশিংদা দাইস্পোরা অইবশিং অমদি কবিশিংনা কয়াম থৱায় ৱাজবা; মনিপুরগীদমক করিগুম্বা খরদি পাঙথোকচনিংবা অদুগুম্বা পুকচেল অদুগী মমিদি মখোয়গী খুৎইদা ময়েক শেংনা হেক হেক থোকলকই।
লোয়বা নাইদ্রবা পোলিতিকেল কনফ্লিক কয়াগী ৱাখৈদি করম্বা মতমদা কনা লাক্লগা পুরক্কনি কনানসু হায়বা ঙমদে। লীলা অমগী মনুংদা শান্নরিবা লোয়বা নাইদ্রবা লীলা কয়াগী ভাবক ওইরিবা মীচম মীয়ামদি ঙসিসু কাম্বি থক্তা থাংগৎলবা লেম্লৈগুম লৈরি। অসিগুম্বা পাউখুম ফংদ্রিবা ফিভম অমবু কবিনা কুপ্না নৈনদুনা ফোংদোকলক্লি মহাক্কী শৈরেং ‘পাউখুম’ হায়না মিংথোনবা অসিদা “ঈ কয়া য়াম্না পীরগা নীংতম্বা ফংঙি/ বাংলাদেশনা হায়- ‘ঐহাক খংঙি’।/ঈ কয়া য়াম্না হৈরগা সমুদ্র ঙাংঙি/ পেলেস্তাইন্না হায় ‘ঐহাক খংঙি’/ অঙৌবা খুনুগী ঈ ঙৌবরা নত্রগা ঙাংবরা/ কিউবানা হায় ‘ঐহাক খংঙি’।/ মণিপুর নঙ হায়ু- ঈ খুজোক কয়া পিরগা মীৎকুপ অমা শান্তি ফঙগনি?/ মনিপুরনা হায়- ‘ঐহাক হায়রোয়’।”/ লাঃ ৩০। নীংতম্বা অমসুং শান্তিবু খুৎতা পায়দুনা শান্নরিবা অঙম্বা মখোয়দা ইতৎ তত্তনা হংলিবা ৱাহংনি। মীচম মীয়াম্না ইন্তররোগেশন তৌবা মতম অমসু লাকপা য়ারি। মরমদি পাউখুম অমা পাম্লি মীয়াম্না শান্তি হায়বদুগী। শৈরেং অসিদা কবিনা শিজিন্নরিবা তেনখ্রবা ৱাহৈশিং অমদি ফোংদোক্লিবা ৱাখল্লোণ অসি অৱাংবা থাক অমদা নৈনবা য়ারি ‘ঐ হায়রোয়’ হায়বা পাউখুম অসিনা লোয়শিল্লিবসু য়াম্না ৱাহন্থোক লৈরি। য়াম্না ইচং থৌনা ইবা শৈরেং অমনি হায়না লৌদবা ঙমদে।
মতাং মতম চানা পুন্সিদা লৌখিদবা ৱারেপ্না করিগুম্বদা হঞ্জিন হঞ্জিন্না মৈশা লাংহনদুনা থম্মোয় লায়মন কাংদুনা লায়না ওইবসু য়াওদবা নত্তে। নুংশিবা কায়নবা, অপাম্বা থুংদবা হায়বসিসু পুন্সিগী হৌনশা ওইরি। নিংবা খুদিং লোয়না থুংলদি পুন্সিগী ফজবা মশক অদু মহাও লৈরমদবা য়াই। অশোয়বা থবকনা পুন্সিদা পারা অমদি হেক হেক তম্বি। অদুনা অশোয়বা থবক অসিসু খঙদববু তাক্লিবা ওজা অমনি হায়দবা য়ারোই। অদুনা কবি রাজেশসু মহাক্কি শৈরেং অমদা ইরকলি কাওবা লৈত্রবা “অশোয়বা থবক” অমা “মাবু নিংজররোই হায়না/ কাওজনিংনা লৈরে/ কাওজনিংবসে অশোয়বা ওইরে/ অশোয়বসিনা ঙহাক লৈতনা/ নিংশিংনা লৈরে”। লাঃ ১৩
থম্মোয় লৈকোলদগী লাপ্না লৈখ্রবী চান্নথোইরবী অমগুম্না শান্তি কৌবী লাইরেম্বী মহাকপু সিম্বোলিক ওইনা পুখৎতুনা ইবা শৈরেং অমনি “পাউখুম ফংদ্রবা ৱাহং”
নুংমিদাং ওইদ্রি/ মুরবা নোংনা মম্লে সন্ধ্যা/ কুপ্লে নীংকায়বগী মৈখুনা অতিয়াগী থৱানমিচাক/ চাক্লিবা কুপীগী নিক্লবা মৈরীদা হংজৈ- মাবু লাকওইদরো…পাউখুম ফঙদনা অদুম মাঙখ্রে/ সন্ধ্যাগী অমম্বদা/ শূণ্যগী মনুঙদা। লাঃ ২২। উনিংনা ঙাইরি কবিনদি অদুবু হায়বদি ঙমদে করম্বা মতমদা থৌজাল হৈবী মহাকনা খোঙদোই হুল্লক্কনি হায়বা। পাউখুম অদুতবু ঙসিসু ঙাইরি লাংতকননা। শৈরেং অসি য়াম্না তেল্লি অদুবু পীরিবা পাউজেল অসিদি মপাল নাইদে।
নুংশিবা হায়বসি থম্মোয়গী ৱানি হায়বসি মতম পুম্নমক্তা চুম্লগা লৈরি। চরৈ ফিগুম্না, সনা লুপাগুম্না লৈবা য়োনবা য়াদে। ফংনিংবা মতমদা ফংদে। হায়রুদ্রবসু লাকই। তান্নরুদ্রবুস ফংই। অদুনা নোংদম্বা নোংদোম্বী হায়দুনা লৈরম্লি মীওই মপোকসিদা। পুন্সি লৈপুন শেম্নখিবা শোন্নদুনা তাইবঙদা শিবা নাইদ্রবা ৱারী লীনরিবা শাবি শানৌশিংগী ৱারী মরক্তা কবিগী থম্মোয় লৈরাং মহাক অদুনা লমদম কৈদা লৈরিগবা হায়না উনিংনা ঙাইরিবা মিকুপ অদুদা ইরকপা শৈরেনি ‘ঈখৌলাংবা’ “নুংশিবা নঙনা করম্বা লমদমদা পুরক্লিমো?/ অসিদা থৱানমিচাক ময়ামদা য়েংলগা/ যুগ যুগকি প্রেমিক ময়ামগী মায়থোং উবা ফংঙি।/ অসিদা লৈরাং ময়াম্না হায়রি- থম্মোয়দা থম্মু…” লাঃ ২৩। কবিগী মপাল নাইদ্রবা পুকনিং অতিয়াদা থোকলগদবা নুংশি থৱানমিচাক অদুদি ঙসিসু অদুম্মক থম্মোয়দা লাইনিং ওইরিবগুম্না অপাবশিংদা ফাওহল্লি। কবিগী কলপনাগী তাইবঙ অসিমক তাইবঙগুম্না হেক হেক য়েকনবা হোৎনবদা মায় পাকনা উরি।
করম্বা মনিপুরীনা কাওবা ঙমগনি লায়রবা লৌমী শিন্মিশিংগী, মীচম মীয়ামগীদমক পুন্সি কত্থোকখ্রবা লময়ানবা হিজম ইরাবত মহাকপুদি। কুমজা কুমওন খুদিং মহাক্কি তর্পন কৎলিবা মনিপুরগী মীয়াম্না লোইজিং লোয়া খুদিংদা লৈবাক্কি লোইশঙ কয়াদা। অসিগুম্বা লময়ানবা মহাক্কি মপোক নুমিৎ অসিদা কবিনা উরি শান্তিগী সিম্বোল ওইরিবা অঙৌবা খুনুশিংনা শঙ্গু শঙ্গু হরাওনা শংবানবা অতিয়াদা মনিং তম্বা পাইবদু। পিক্লিবা অঙাংশিংদগী হৌদুনা অহল নহা খুদিং মশা খিংনা লময়ানব মহাকপু নিংশিংনা কুমওন থৌরম পাংথোকফম অমদা কবিসু শরুক য়ারখি লমদম তাম্না বাংলাদেশতগী লাক্লদুনা। মসিদা মহাকনা ফ্রি ভর্স্তা ইরি “৩০ সেপ্টেম্বর” ইম্ফালগী অতিয়া ঙসি হরাও-কুম্মৈ/ খুনুগী শঙ্গুসু পুল্লরে অতিয়াদা।/ ঙসি অতিয়াদা নুংশিৎতা/ হকচাংগী ঈ-দা, শরুদা…” ৱাহং অমা অমুক হংলি চমম্নবা অমগা লোয়ননা ‘ করম্বনা অশেংবনো?’ লাঃ ২৫। লুচিংবা শাবা অমদি নেতা শাবা ময়াম মরক্তা কবিদি ইঙক ঙক্লি। কুমওন কয়াদি পাংথোকখ্রে অদুবু লময়ানবা মহাক্কি ফিদম অমদি মহাক্কি লিকলম অদুদা করম্বা অশেংবা লুচিংবনা চৎলিবগে ঙসি হায়বা ফোংদোক্তবা ৱাখল্লোন অদুনা য়াংলেনদা ফুমদুনা থম্লি। শৈরেং অসি য়াম্না ৱাহন্থোক লৈ।
শান্তিবু মতম খুদিং লাইনিং ওইজবা অমদি নুংশিবদা থাজবা কবিগী পুকনিং ইহুল অদু মহাক্কি শৈরেং অসিদসু উবা ফংগনি।
অতিয়া উচেক অমসুং নঙ
গোধুলীদা য়ুম হল্লকপা উচেকগী মতুদা
নঙবু থীজৈ হন্না হন্না।
নোং মরক্তা শংবানবা অতিয়া উবদা
খল্লি নঙগী ইন্নাফিগী আচলনী হায়না।
ৱাখলগী করি অরানবনো?
নঙদী ঊচেককী মতুগুম নীংতম্মী
শংবানবা অতিয়াগুম শংবান্নৈ। লাঃ ৩২
0 কমেন্ট:
কমেন্ট তৌবিয়ু