আপডেট:
image

নাউরিয়া ফুলোগী ১৩৪ শুবা মপোক নুমিৎ -- ডা. খুন্দোংবম গোকুলচন্দ্র

“হৌরো হৌরো পারিঘোই

মপুগী পাউবু লাকয়ে ইবুঙোশিং

হৌরো হৌরো পারিঘোই…”

মীতৈ হায়বা কাঙলূপসি ঙরাং নহান্ত মফম অসিদা লাক্লগা খুন্দারকপা নত্তে। মশাগী চহী লীশিং অনী হেনবগী ইতিহাস লৈজবা, মশাগী নাৎ, চৎনবী, অমসুং তো-তোপ্পা লাইনিং লাইশোল লৈজবা কাঙলূপনি। লাইবক থীবনা লমখাংদা মফমসিদা নৌনা চংলকখিবা লাইনিং লাইশোলনা, অমসুং মদুগা লোয়নদুনা লাকখিবা নাৎ অমসুং চৎনবনিা ঐখোয়গী হান্না লৈজরম্লিবা লাইনিং লাইশোল অমসুং হৌন লোনচৎশিংদুগা তোৎশিন য়ানশিন্নখিদুনা ঐখোয়গী অশেংবা মশক মাঙবা হৌখি, মীপোৎনা ইপোৎ ওইনা লৌখি। মসিগী নিংদোন পোম্বা হৌজিকসু কোক্ত্রি। মীগী মপোৎ মরলনা ঐগীনি হায়না খনখিবা অদু অদুক্কী মতীক মরু মরা তানা চঙখি, করি অমুক হায়রগনি ইশাগী লাইনিংবু, ইশাগী ইরোলবু শোকপা ফাওবা লাইনা পক্কদৌগুম খনবা মতাং য়ৌখি।

বাংলা অমসুং সংস্কৃতি ৱাহৈ শীজিন্নবা হৈবশিংবু অরেম্বা, লাইরিক হৈবা মী ওইনা লৌনরকপা মতম য়ৌখি। অয়ূক নুমিদাং শীজিন্নবা ৱাহৈশিং ফাওবা মীরোল চংশিল্লকখি। অদুবু লমদম অসিদা মীগী মনাৎ অমসুং মীরোলদা তাংজরগা অরেম্বা, লাইরিক হৈবা ওইনা লৌনবা মতমদুদা ঐখোয়না ঐখোয়গীনি হায়না লৌরুরিবা চৎনবীগী মপু ওইরিবা বাঙ্গালিশিংনা নম্না তাবা কাছার লমদমগী মীতৈশিংগী মফমদদি ইকাই ফিরুক খুম্বা মতম ওইখি। মখোয়গী হৌন-লোনচৎ, লাইনিং লাইশোলবু ৱায়রগা ঐখোয়গীনি হায়না চাউথোকচরিবা মীতৈশিংবু করেম্নফম, নোক্নফম ওইখি। 

অসুম্না ইকায়বা নংবা, মায় ফিরুক খুম্বগী মতম অদুদা, ইং কুমজা ১৮৮৮ গী থৱানগী ২২ নিং পানবা লৈপাকপোকপা নুমিত্তা কাছারগী হাইলাকান্দিগী লাইশ্রম খুনদা নাউরেম শাগৈদা নাউরেম চাউবা অমসুং লাইশ্রম নিংঙোল নাউরেম ওংবী থম্বৌ অনীগী মচা নুপা নিপান অমসুং নুপী অনী, পূন্না তরাগী মনুঙদা তরুকশুবা মচা ওইনা ফুল (ফুলো) না তাইবং ফাওরকখি।

অঙাং ওইরিঙৈদা মমা ইবেম্মা অমদি মপাবুংনা ফুল (ফুলো) হায়না কৌজৈ অদুগা ফন্দ্রৈনা খেৎপগুম মশা নাননা নীংথিজৈ হায়দুনা ফুন্দ্রৈ হায়নসু কৌনখি। লাইরিক য়াম্না ফনা হৌরকপা ফুলোনি। কাছার মাইকৈদা অহানবা এন্ত্রান্স পাস তৌবা মীশক্নি। মতম অদুগী এন্ত্রান্স হায়বসি কলকাতা য়ুনিভার্সিটিনা লৌবনি। হৌজিক্কী মেত্রিক পরিক্ষা অসিগুম্বনি। মতম অদুগী কলকাতা য়ুনিভার্সিটিগী জুরিসদিক্সন্দদি হৌজিক্কী নোংচুপ বেঙ্গল বাংলাদেশ পূল্লিঙৈ, ষ্টেট মচা মচা লৌথোক্ত্রিঙৈগী অপূনবা আসাম অমসুং মতমদুগী বর্মাসু য়াওরগনি।

অসুম্না হৌরকখিবা নাউরিয়া ফুলোগী মমিং অসি ঙসিদি মীতৈ খুন্নাইগী কাউবা য়াদবা মিং অমা ওইরে। মসিগী মরম হায়ববু মশাগী লাইনিং থাদোক্তুনা অতোপ্পা লাইনিংদা তাংজরুবগী ইকায় ফিরুক খুম্বগী অসি মঙাইরে হায়না খনবা থা য়ৌরকপদা মহাক্না মীতৈ ঐখোয়গীসু মশাগী লাইনিং লাইশোল, লোল ময়েক লৈজৈ হায়দুনা শিরুরবা মীতৈ লাইনিংগী হিংগৎ ঈহৌ অমা শাগৎপগী অহানবা খুৎমাবা ওইখি।

হান্নগী চৎনরিবা লাইনিং থাদোক্তুনা অনৌবা লাইনিং অমা চৎননবা হোৎনৈ হায়বগী লৈকাই খুননা মাংই হায়না ইন্থোকপিবগী অৱা কোঙ্গাই নংখিবা অহানবা মীশক্নি। অদুবু মহাক্না তৌরিবদু লাল্লি হায়না চংজখিবা মীশক নত্তে নাওরিয়া ফুলদি। মাঙলুরবা মশাগী অরিবা লাইনিং লাইশোল অমুক হিংগৎনবা অনৌবা থৌনাগা লোয়ননা চংশিল্লক্রিবা ফুলনি। তাংজরুবা লাইনিংনা মরু মরা তাখিবদগী লূপতুনা লৈখ্রবা ইরৈবাকচাশিংবু, “হৌরো হৌরো পারিঘোই/ মপুগী পাউবু লাকয়ে ইবুঙোশিং/ হৌরো হৌরো পারিঘোই/ পোকলেন পোকপা য়েওললে/তুংনা মাঙ ওইরকলে/ সিৎলুবা নুংশিৎ হল্লক্লে/ পংধরুবা সিংলী হৌরকলে।” হায়দুনা হৌদোকখি।

কাউথোক্লুরবা ঐখোয়গী হৌন লোনচৎ অমুক হল্লক্লে অদুনা পারিখোই হৌরো নশাগী, খুন্নাইগী, ফুরুপকী থৌ পাঙথোক্লরো হায়না তুমখুল হুল্লিবা মীতৈশিংবু হৌদোক্লম্মী। ঐখোয়গী নত্তবা কয়ানা ঐখোয়গীনি হায়দুনা শীজিন্নরিবশিং অসি থাদোক্লসি, ইশাগী লৈজরিবা কয়াসি চৎনহল্লসি হায়দুনা তুমখুন তান্দুনা লৈগদবা মতম নত্তে হায়দুনা, “য়াহৌরসি ইবংঙোশিং/খঙনরসি ওজাশিং/ নোংপোক মাইগৈ ঙানখরে/ ৱাবা উচেক খোংখরে/ নোংচুপ নোংসু হাংখরে/ মায়কৈ মায়থোঙ শেংখরে” হায়না অমুক্কসু ঐখোয়বু হৌদোক্তুনা লম্বী তাকপীরম্মী।

লাইনিং লীচৎ অমা লৈ হায়বসি ইরায় লায়না হায়বা য়াবা নত্তে। অমুক্কা হেন্না ইশাগী লাইনিং লীচৎ অমা লৈজরম্মী হায়বসিগী অরংবা কাঙ্খুল মুৎপগুম্না লৈখ্রবা মতম অমদা ইনৌ নৌনা চিংথোরকপা হায়বসি অরায়বা নত্তে। লাইনিং লীচৎ, হায়বদি ধর্ম্ম অমা লৈ হায়গে হায়রবদি লাইনিং লীচৎ অদুগী থাজনবা শেম্বীবা মপু অমা লৈ হায়বসিদা থাজগদবনি, লাইনিং-লীচৎ অদুগী অশেংবা লাইরিক, হোলি বুক লৈগদবনি, মশাগী তোঙানবা লাইনিং লাইশোল লৈজগদবনি, লাইনিং লীচত্তুগা মরী লৈনবা হরাও কুহ্মৈ লৈগনি অমদি লাইনিং লীচত্তুদা থাজবা থম্লিবা লাইনিংথৌ লাইম্মেশিংগা মরী লৈনবা মিথোলোজিকেল ষ্টোরিশিং লৈগদবনি। য়ামদ্রবদা হায়রিবশিং অসি য়াওদনা ঐখোয়গী নৎত্রগা ফুরপ অমগী মশাগী লাইনিং অমা লৈরি হায়বসি য়াদে।

অদুনা মীপাল তাংবা লাইনিংনা ঐখোয়গী হৌনা লোনচৎ, চৎনবী, কালচার পুম্নমক য়োৎশিনখ্রবা মতমদুদা ঐখোয়গীসু ইশাগী লাইনিং লীচৎ অমা লৈ মদুগী মরী লৈনবা মতীক চাবা মগুণ লৈবা অচঙবা পূম্নমক লৈ হায়না পুথোকপসি অরায়বা নৎখিদে। অদুবু পূম্নমক অদু লাইনিংহলনা পুথোক্তুনা পীখি। পূম্নমক অসি পুথোক্নবা হোৎনবদা মীয়াম্না ইকায় খুম্নরিবা পুলিস ওফিসারগী ফম ফাওবা থাদোক্তুনা মজাতিগীদমক্তা হোৎনখি।

নাউরিয়া ফুলোগী পুন্সি অমদি মহাক্না ইরম্বা অমসুং তৌরম্বশিং অসি য়েংলুরবদি মায়থোঙ য়াম্না মীশক অমনি। মহাক্না ইরম্বশিং অসি কূপ্না নৈনরবদি মণিপুরী খোরিরোলগী খুৎমাবা অশৈবা অমসুনি হায়বদা হায়মনবা থোক্তে। অসিদা নত্তনা খুন্নাইগী ওইরিবা প্রোব্লেমশিংবু কূপ্না য়েংলগা মদু কোক্নবা ৱাখৈ অমা পীবা য়াবা ৱাখল্লোন পীবা, সোসিয়েল ইস্যু অমসুং মদুগী ওইথোকপা য়াবা সোলুসন সাজেস্ট তৌবা অইবনি হায়না লৌবদসু লানদে। মহাক্না ইং ১৮৮৮ দা পোক্লগা ইং ১৯৪১ গী জুনদা লৈখিদবা, শুপ্নগী চহী ৫৩ খক্তমক হিংলম্বগী মনুংদা ইং ১৯৩০দগী ১৯৪০ ফাওবা চহী ১১ খক্তগী মনুংদা লাইরিক পূন্না ১৯ ইরম্মী। ইরম্মিবা লাইরিকশিং য়াম্না কূপ্না নৈনবদা মতমদুদা অনৌবা ওইনা থোকপা থিমশিং ওইবতা নত্তনা খোরিরোলগী ওইনসু, লাইনিং লম্বীগী ওইনসু মগুণ লৈবা লাইরিকশিংনি।

মহাক্না ইরম্বা লাইরিকশিংগী অপূনবা ইদিসন হৌজিক্তি পুথোক্লে। মহাক্না ইরম্বা লাইরিক ১৯ মক থেংনদ্রবসু – অপোকপা মপুগী তুংনফম, গৌড় ধর্ম্ম চৎলকপা মতাং, হৌনবুঙ অমসুং লান্নবুঙ, নিংথৌরেল পামহৈবা, তেংবানবা অমসুং লাইনিংথৌ লাইপাউ, অহল য়াথং, মীতৈ হৌভম ৱারী, থা-ইন-নোংইন, অথোইবা শৈরেং, খুদা নিপান অমসুং ঐগী ৱারেং হায়রিবা লাইরিক তরামাথোই অসিদি মীপুম খুদিংমক্না পাদুনা মহাও তংহন্নীংই। মসি পারুবদা শোয়দনা মশানা মশাদা য়েলম্বা মীৎয়েংগী অশেংবা মশক উরক্কনি হায়বদা হায়মনবা থোক্লোই।

মহাক্না ইরম্বা লাইরিকশিং অসি মুন্না য়েংলুরবদি কাঙলূপ অনী থোক্না খায়দোক্লগা থম্বা য়াই। অমনা ঐখোয়গী খুন্নাইদা চৎনরিবা লোজিকেল ওইদবা নৎত্রগা মমূৎ তানা খঙলগা চৎনবসু নত্তবা ওইবশিং অসিগী মাঙজবশিং পুথোক্তুনা তাকপা অমদি অদুগুম্বা ঐখোয়গী মাঙনবা ওইরিবা চৎনবীশিং অদু থাদোকসি হায়বগী পাউজেল পীরিবা লাইরিকশিং, অদুগা অতোপ্পা কাঙলূপ অমদনা তাইবংপান মপুগী মতীক মগুণ শকপা, মাবু খঙননবা হোৎনজবগা মরী লৈনবা লাইরিকশিংনি। কাঙলূপ অনী অসিদা য়াওরিবা অসি অমমমতং খূদম ওইনা লৌখৎপা য়াই।
খুন্নাইবু কূপ্না য়েংলগা করেম্নবগুম হায়রকপদা, “হরি সংকীর্ত্তন হায়রিবসিদি পূক্নিং ৱারক্নবগীদমক্তনি। অদুম্না মতীক চাউখ্রবা হরি সংকীর্ত্তনসিগী ময়ায়দা তাইবংগী অপাম নুংশি থুংননবগীদমক তৌরিবা বিবাহসিদা খ্বাইদগী মমাঙদা লেন্নবগুম নুপীগা নুপাগা অনীবু লৈ হুক্নহনবসিদি, লঙজবা ওইগদ্রা হায়না চেৎনা খনজৈ। বিবাহদা, রিপুদমন ওইরিবা হরি সংকীর্ত্তন তৌবসিনরা, বিবাহ ওইখিবা নুপী-নুপাশিংনা চাদা নাওতা কৌনা ফংলিবা অমসুং থুনা থুনা খায়নরিবসিবু? অরান খুভম ঈশৈ শকপসিনরা মতৈ মনাও পুন্সিনদ্রিবসিবু? অরান খুভম ঈশৈ শকপসিনরা, বিদুরগুম্না লায়রবনা পৎ তৎলিবসিবু? অমসুঙ অসুম্না বিবাহ মন্ত্রনা সিদ্ধ ওইখ্রবী নুপীদুনা, বিধবা ওইরগা অমুক হন্না ম
ৱা​ নাইবাসিবু য়াগদৌরিব্রা?” (ঐগী ৱারেং, লা. ১৪৮)। অদুগা কাঙলূপ অমদনা তাইবং মপুগী মতীক ময়ায় শোন্দুনা অরান খুভম ফংনবগী খৌরাংবা, মাগী তুংনফম অমসুং ফংনফমবু থিজরিবা মঙোন্দা চংজবনি, “ইপুরোইদি ইবুংঙো/ ননাই ওইনা লৈজগে/লাইনিংথৌদি ইবুংঙো/ পুক্নিং চেৎনা নীংজগে” (অপোকপা মপুগী তুংনফম, লা.২৮)।

নাউরিয়া ফুলোগী মরীদা থিবা য়াবা, নৈনবা য়াবা কয়া অমা লৈরি। হন্দক্কী চহী অসিদা তারিবা মহাক্কী চহী ১৩৪ শুবা মপোক নুমিৎকী থৌরমদা মাগী মতীক মগুণ অখঙ অহৈশিংনা শোয়দনা শক্নারক্কনি, শোন্নরক্কনি, অমসুং নৈনরক্কনি। মখা তানা মাগী মরমদা হেন্না হেন্না খঙনবা নৈনরক্কনি নৈনফম থোকই। মহাক্না ইরম্বা খরা সিল্লেবাসতা হাপ্তুনা তম্নরিবা অসিনসু হেন্না নৈননবগী মরম অমসু ওইগনি। অদুগা মাইকৈ অমরোমদগী য়েংলবসু মহাক্না মীতৈ হায়বা কাঙলূপ অসিগী ইকায়বা নংনা লৈরিবা মতাং অমদা ঐ লৈরি মীতৈ হায়বসি মশাগী লাইনিং লাইশোল হৌন লোনচৎ লৈজবা কাঙলূপ জাতি অমনি হায়না মতমদুদা লৈবাক্না মাংই হায়না ইন্থোকপীবফাও য়াওনা অৱাবা নুংঙাইতবা কয়া খাঙলগা মীতৈ ঐখোয়বু তৌবিমল খঙবা উৎফম থোকই।

ঐখোয়গী ইপা ইপুবু মশক তাকপা, মখোয়গী মফমদা তৌবিমল খঙবা উৎপা হায়বসি ঐখোয়গী তৌদবা য়াদবা ইথৌনি। অমরোমদসু ইপা ইপুগী মফমদা ইকায় খুম্নবা উৎপা ঙমদবা মীদুদি তাইবং মপুনসু চানবিরোই। মহাকপু নীংশিংবা হায়বসিমক ঐখোয়গী ফজরবা হৌন লোনচৎপুসু উৎপনি।   

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু