ত্রিপুরাদা মৈতৈশিং লুহোংবদা পোৎলোই লৈতবগী অৱাবা মায়োক্নহৌরি
ইম্ফাল, জানুয়ারী ০৮ : অদুঙৈ অৱা লানদগী লাঞ্জেন্নদুনা ত্রিপুরাদা লৈখ্রবা মণিপুরগী মৈতৈশিং ঙসিসু মফম অদুদা অদুম্মক চাদা-নাওদাদুনা খুন্দাহৌরি। হৌজিক হৌজিক ত্রিপুরাদা মৈতৈশিং পুন্না ১০৬২ রোম লৈরি। ত্রিপুরাগী খুঙ্গং ৭৪দা মৈতৈশিংনা মচোই-মচোই খুন্দারি। ত্রিপুরাগী গৌড়নগরগী খ্বাই হায়রিবা মফম অসিদনা মৈতৈনা খ্বাইদগী হেন্না মশীং য়াম্না খুন্দারি। মফম অসিদা মৈতৈ মচানা প্রধান, মেম্বার ফাওবা ওইরি।
ত্রিপুরাদা লৈবা মৈতৈশিং মখোয়গী লৈঙাক্তগী সিটিজেন অমা ওইবগী ফংফম থোকপা রাইট অদুম্মক ফংই। অদুবু ৱাৎলিবদি মীশিং য়ামদবনা মরম ওইদুনা মৈতৈশিংগী ওইবা থৌদোক-ৱাথোক কয়াদা লৈঙাক্কী মতেং ফংদবা অসিনি। মরম অসিনা মণিপুরদগী সী এস ওশিং অমদি লৈঙাক্না তোয়না লাকপীদুনা মখোয়গীদমক মীয়াম মমাঙদা লেপ্পীবগী অপাম্বা ত্রিপুরাগী মৈতৈশিংনা ফোঙদোকহৌরি।
ত্রিপুরাদা হৌজিক-হৌজিক পাউনা ব্রজবাসি, ইরাবত অমদি নুপীলালগী মীতমশিং তোঙান তোঙানবা মফম কয়াদা খিলহৌরি। মীতমশিং অদু মণিপুরগী সী এস ও অমদি লৈঙাক্কী মায়কৈদগী মতেং পাঙবীরক্তুনা মীতম খিল্লিবা মফমশিং অসি খরা পাকথোক চাউথোকহনবসু পাম্নহৌরি।
ইরাবতকী মীতম খিল্লিবা মফমশিং অদুদি লালসিং মোরা, আগরতলা, কামিনি কানয়ার স্কুল, খ্বাই গৌড়নগর অমদি ধর্ম্মনগরদনি। পাউনাগী মীতম খিল্লিবা মফমনা পুথিবা আগরতলা অমসুং গৌড়নগরদনি। ভাগ্যচন্দ্রগী মীতমসু মফম অনী হায়বদি আগরতলা অমসুং রাধানগরদা খিলহৌরি। মসিগা লোয়ননা নুপীলাল কমপ্লেক্সনা গৌড়নগরদা ওল মণিপুর য়ুনাইটেদ ক্লাবস ওর্গানাইজেসন (অমুকো) গী মতেংদগী কুমজা ২০২২ শঙ্গাখি হায়রি।
ত্রিপুরাগী মৈতৈশিংনা ঙসি লেপ্তুনা মশাগী হৌরকফম মণিপুরগী চৎন-কাঙলোন চেকশিন্না ঙাক্তুনা চৎনহৌরি। লূহোংবা, মী লৈতবগী থৌরমশিং, ইপান থাবনচিংবা থৌরম পূম্নমক মৈতৈ ইনাৎকী চৎন-কাঙলোন কায়দনা পাঙথোকহৌরি। অদুবু লাইবক থীবদি ত্রিপুরাদা মৈতৈগী ওইবা নট সঙ্গীর্ত্তন, মৈতৈগী ফোক সোংশিং অমদি জগোয়শিং হৈবা ওজা অশদগী হেন্না লৈহৌদ্রে।
ওজা এম বির সিংহনা মফম-মফম খূদিংদা চত্তুনা মৈতৈগী পূং-ঈশৈ জগোয়নচিংবা কয়া হৌরক্লিবা নহাশিংদা লেপ্তুনা তাকপী-তম্বীহৌরি। অদুবু হৌজিক মৈতৈশিংনা লুহোংবদা কৈন্যানা শেৎননবা পোৎলোই অমদগী হেন্না লৈতে। অদুসু অদুক্কী মতিক মল্লে। অদুনা অনৌবা পোৎলোই অমত্তং মণিপুরদগী খুদোল তম্বীরকপা পাম্নহৌরি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু