ডা. ৱাই মহেন্দ্রকুমারদা সাহিত্য শ্রী এৱার্দ খুৎশিন্নরকখ্রে
ইম্ফাল, দিসেম্বর ১১ : ভারতিয় দলিট সাহিত্য একাদেমিনা শীন্দুনা পঙথোকপা ৩৮ শুবা নেসনেল কনফারেন্স ওফ দলিট রাইটার্সকী থৌরমদা সাহিত্যগি লমদা ইন্দিয়াগী শক্নাইরবা মীওই ২০ খনগৎপদা ইরমদম মণিপুরদগীসু ডা. ৱাই মহেন্দ্রকুমার য়াওরক্তুনা অম্বেদকর সাহিত্য শ্রী এৱার্দ ফংদুনা এৱার্দ অসি ফংবা অমত্তা ঙাইরিবা মীশক অমা ওইরে হায়না দলিট সাহিত্য একাদেমী মণিপুরগী সেক্রেটারি বি কে মঙাংনা থাদোরকপা চেরোল অমনা ফোঙদোরক্লি।
চেরোল অদুনা মখা তারদুনা হায়, নিউ দিল্লীগী জরোদা ভিলেজদা লৈবা পঞ্চসিল আশ্রমগী অম্বেদকর মান্দপতা হান্নগী সোসল জাস্টিস এন্দ ইম্পৱারমেন্ট, য়ুনিয়ন মিনিষ্টার ডা. সত্য নারায়ন জাতিয়ানা চীফ গেষ্ট ওইদুনা পাঙথোকখিবা থৌরম অমদা ডা. ৱাই মহেন্দ্র কুমারদা অম্বেদকর সাহিত্য শ্রী এৱার্দ অসি খুৎশিন্নরকখিবনি। তোঙান-তোঙানবা এক্সিলেন্সি, দিষ্টিংগ্যুইস সার্ভিসনচিংবা শীংথাবা য়াবা ডা. জিবন কুমার, ডা. অম্বিকা মরিং হংস, অসুলি অঙা, উইংখায়াই খামুই, তনরুই ভিলেজ হেদ, ডা. বাসুদেব থোকচোম, ডা. সুনিলদেব, লৌরেম্বম রামেশ্বর, লাইমরাম রাজেন, য়ুম্না রোমেন, মহেশ্বর থৌনাওজম, ডা. বিমোলা, ইরুংবম য়াইস্কুল অমদি ডা. সনাতোম্বনচিংবা মীওই কয়াসু মণিপুরদগী য়াওরি। অম্বেদকর সাহিত্য শ্রী এৱার্দ পীরকখ্রবা ডা. ৱাই মহেন্দ্রকুমারসু হৌজিক হৌজিক ভারতিয় দলিট সাহিত্য একাদেমিগী নেসনেল সেক্রেটারি ওইদুনা নোর্থ ইষ্ট ষ্টেটকী কোওর্দিনেটরসু ওইরি।
চেরোলদুনা মখা তারদুনা হায়, ডা. ৱাই মহেন্দ্রকুমার গ্লোবেল কোরোনা এৱার্দ কম্মিটি ইন্দিয়াগী কনভিনরগী থৌসু পুরি। সিঙ্গাপুর, ইন্দোনেসিয়া, থাইলেন্দ, ম্যান্মার, বাংলাদেশ, শ্রীলঙ্কা অমদি নেপালনচিংবা লৈবাকশিং অসিগী কান্ট্রি কোওর্দিনেটরগী ফমসু পুবদা নত্তনা খোরিরোল শন্দোকলূপ ৱাংজিংগী অচঙবা থৌমী অমদি মণিপুরী সাহিত্য পরিষদ থৌবালগী ভাই প্রেসিদেন্টকী থৌসু পুরিবা মীশক অমনি।
লমদম অসিগী অম্বেদকর সাহিত্য শ্রী এৱার্দ ফংলকখ্রবা ডা. ৱাই মহেন্দ্রকুমারনা কত্থোকপা অমগা লোয়ননা লিশাং শিৎনা লৈবাক মীয়ামগী য়াইফ থৌরাং অমদি সাহিত্যগী লমদা লাইরিক কয়া পুথোক্তুনা মশক থোকপা মথৌ নীংথিনা পাঙথোকপা অদুগুম্লবা মহাক্কী থবক থৌরমশিং অদুবু শকখঙবীরদুনা অসিগুম্লবা ভারতিয়া দলিট সাহিত্য একাদেমীনা শীনবা ৩৮শুবা নেসনেল কনফারেন্স ওফ দলিট রাইটার্সকী থৌরম অদুদা এৱার্দ অসি পীবীরকখিবনি। অম্বেদকর সাহিত্য শ্রী এৱার্দ অসি ন্যু দেল্লীগী অম্বেদকর মান্দপতা পাঙথোকপা থৌরম অদুগী নুমীৎ নীনি নুমীৎতা খুৎশিন্নরকখিবনি হায়রি। পনবা য়াবদ, ডা. ৱাই মহেন্দ্রকুমার তোঙান তোঙানবা মনা কয়াসু ফংখিবা লৈখ্রে।
সোর্স: হুইয়েন লানপাউ
0 কমেন্ট:
কমেন্ট তৌবিয়ু