ডা. চোংথাম যামিনিদা লাইফ টাইম এচিভমেন্ট এৱার্দ লান্থোকখ্রে
ইম্ফাল, জানুয়ারি ১৪ : ক্ষেত্রিময়ূম য়াইমগী ১১৮ শুবা মপোক নুমিৎ থৌরমগা মরী লৈননা ক্ষেত্রিময়ুম য়াইমা অমসুং থম্বাল দেবী লাইফ টাইম এচিভমেন্ট এৱার্দ ডা. চোংথাম নিঙোল যামিনিদা লান্থোকপগী থৌরম অমা ঙসি জে এন মণিপুর দান্স একাদেমীগী ওদিটোরিয়ামদা পাঙথোকখ্রে।
ক্ষেত্রিময়ূম য়াইমা মেমোরিয়েল ত্রাষ্টনা শীন্দুনা পাঙথোকপা থৌরম অদুদা এম এল এ খুমুকচম জয়কিষননা অথোইবা মীথুং ওইখি। মহাক্না মহাক্কী ৱারোল পীবদা হায়খি, লাই লৈতে হায়বা য়াদে, লাই লৈ। অহলশিংনসু লাই য়াম্না থাজবা ওইবগা লোয়ননা অহলশিংদা তোঙানবা মতিক-ময়াই অমদি অদুম য়াওই। ঐখোয় মীওই খূদিংমক লাইবু থাজৈ। লাইদা নিজবদা থৌজাল পীবী। ফত্তবা থবক তৌবদা লাইনা চৈরাক পী। অফবা থবক তৌবদনা লাইনা থৌজাল পী। মানা-মানা তৌজরিবা থবকশিং অদুগী মতুংইন্না লাইনা মহয় শোয়দনা পীবীরে।
মহাক্না মখা তারদুনা হায়খিবদা, হৌজিক লৈরিবা লৈবাক্কী ফীভম অসি য়াম্না তংদু লৈতাদবা, পোটিসিয়নশিং মরু ওইনা ঐখোয় অসি মীয়াম্না থিনা-থিনা চৈনফম হায়বদু ওইরে। অদুবু মরাল লৈতবা মীওই কয়াগী পূন্সি মাঙহল্লিবা, তূম্ফম-চাফম খঙদনা লৈরিবশিংদা লংজরিবা কয়া অসি লাইনা শোয়দনা চৈরাক পীরকখিগনি। লাইনা পুরকপা মায়কৈ লাকখিনি। ঐনা মানা ঙাংবনা য়াবা নত্তে। লাইনা ৱারক্লকখিনি। অদুনা লাই খুরুমসি হায়খি।
অখন্নবা মীথুং ওইখিবা এম এল এ থাংজম অরুনকুমারনা হায়খিবদা, ওজা হায়বসি হীরম খূদিংমক্তা য়াওদবা য়াদে। খুন্নাই অসিদা ওজাগী থাক য়াম্না ৱাংই। মহৈরোয়শিংবু অফবা লম্বীদা পুরকপা ঙম্লিবসি ওজাননি। অদুনা ওজা হায়বসিনা খুন্নাই অমবু অফবা থাক্তা শেমগৎপদা অচৌবা থৌদাং লৌরিবনি হায়খি। ঙসিগী থৌরম অদুদা জে এন মণিপুর দান্স একাদেমীগী দিরেক্তর পি বিলাশনা থৌরম মপূ ওইনা শরুক য়াখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু