জুদোকা লিন্থোই চনম্বম বাল পুরস্কার এৱার্দ ফংলগনি
ইম্ফাল, জানুয়ারি ১৯ : চহী ৫-১৮ ফাওবদা লৈবা অঙাং শিংনা তোঙান-তোঙানবা হীরমদা থোইদোক হেন্দোকপা থবক তৌবগীদমক পীবা প্রধানমন্ত্রি রাস্ত্রিয়া বাল পুরস্কার-২০২৪ ঙসি লাউথোকখিবগা লোয়ননা মণিপুরগী জুদো শান্নরোয় লিন্থোই চনম্বম য়াওরে।
কেতেগোরি তরেৎ ব্রেবরি, আর্ত এন্দ কলচর, এনবাইরোনমেন্ত, ইনোভেসন, সাইন্স এন্দ তেক্নোলোজি, সোসিয়েল সার্বিস অমদি স্পোর্তসতা থোইদোক-হেন্দোকপা মিংচৎ কয়া পুরকপগীদমক পীবা প্রধান মন্ত্রি রাস্ত্রিয়া বাল পুরস্কার এৱার্দ অসি পীনবগীদমক ঙসি অঙাং ১৯গী মমিং লাউথোকখি। এৱার্দ অসিদা মেদেল অমা, সার্তিফিকেত অমসুং সাইতেসন বুকলেত অমা য়াওরি।
এৱার্দ অসি থা অসিগী ২২ দা বিজ্ঞান ভবনদা পাঙথোক্কদবা থৌরম অমদা ইন্দিয়াগী প্রেসিদেন্তনা খূৎশিন্নগদবনি। এৱার্দ খূৎশিন্নবগী থৌরম অসি লোইরবা মতুং থা অসিগী ২৩ দা অঙাংশিং অসিগা প্রাইম মিনিস্তর নরেন্দ্র মোদিগা ৱারী শানগনি। এৱার্দ ফংলবা অঙাংশিং অসি চহী অসিগী জানুয়ারি ২৬ তা পাঙথোক্কদৌরিবা রিপব্লিক দেগী থৌরমগা শরুক য়াহনগনি।
ঙসি লাউথোকখিবা প্রধানমন্ত্রি রাস্ত্রিয়া বাল পুরস্কার -২০২৪ অসিদা ব্রেবরি কেতেগোরি, সাইন্স এন্দ তেক্নোলোজি অমসুং ইনোভেসনদা অঙাং অমমম, সোসিয়েল সার্বিসতা অঙাং মরি, স্পোর্তসতা অঙাং মঙা অমসুং আর্ত এন্দ কালচারদা অঙাং তরেৎনি। অপূনবা অঙাং ১৯ অসিগী মনুংদা নুপামচা মাপল অমসুং নুপীমচা তরানি। অঙাংশি অসি স্তেত অমসুং য়ুনিয়ন তেরিতোরি ১৮ দগী খনগৎলকপনি।
এৱার্দ ফংদগবা অঙাংশিং অসিগী মনুংদা থৌনা ফবগী কেতেগোরিদা এৱার্দ ফংলিবা মহারাস্ত্রদগী আদিত্য বিজয় ব্রহ্মানে অসি লৈখিদ্রবা মতুংদা পীবনি। এৱার্দ ফংগদৌরিবা অঙাংশিং অসিগী মনুংদা অৱাং নোংপোক্কী স্তেতশিংদগী পূন্না অঙাং মরি য়াওরি। মখোয় অদুদি সোসিয়েল সার্বিসতা জোৎস্না আক্তার অমসুং সাইয়াম মজুমদারনি। স্পোর্তসকী কেতেগোরিদা মণিপুরগী লিন্থোই চনম্বম অমসুং অরুনাচল প্রদেশকী জেসিকা নেয়ি সারিংনি।
সোর্স: পোক্নফম
0 কমেন্ট:
কমেন্ট তৌবিয়ু