image

চাউবা অমসুং সনাথোইবদা পদ্মশ্রী পীখ্রে

ইম্ফাল, জানুয়ারি ২৭ : রিপাব্লিক ডেগা মরী লৈননা পদ্মশ্রী এৱার্দ লাউথোকপদা মণিপুরদগী হান্নগী দিপুটি সিএম অমদি য়ুনিয়ন মিনিষ্টার থৌনাওজম চাওবা অমসুং শান্নবগী লমদা মশক নাইরবা থাঙ তাগী গুরু ককচিংতাবম সনাথোইবা য়াওরে। পদ্মশ্রী এৱার্দ ১০৬ কী মনুংদা পদ্মভিভুষন ৬, পদ্ম ভুষন ৯ অমদি পদ্মশ্রী ৯১ য়াওরি। পদ্মশ্রী ৯১ অদুগী মনুংদা ভেটরান পোলিটিসিয়ান টিঐচ চাওবনা পাব্লিক এফিয়ার্সকী মরমদা মনা অসি ফংবনি অদুগা কে সনাথোইবনা স্পোর্টসকী লমদা লেমজনিংঙাই ওইরবা মনা অসি ফংবনি।

পনবা য়াই, ভারত রত্ন, পদ্মভিভুষণ অমদি পদ্ম ভুষনগী মথংদা পদ্মশ্রী অসি লৈবাক অসিগী খ্বাইদগী ৱাংবা সিভিলিয়ান্দা পীবা মনাগী মরিশুবা মফমদা লৈরিবনি। ১৯৫৪ দগী পীবা হৌখিবা পদ্মশ্রী এৱার্দসকী শরুক অমা ওইরিবা পদ্মশ্রীগী মনা অসি পাব্লিক এফিয়ার্সকী লমদা মণিপুরদগী মনা ফংবা অসি টিঐচ চাওবনা অহানবনি।

থৌনাওজম চাওবা ১৯৩৭ কী মে ১০ দা বিষ্ণুপুর ডিষ্ট্রিক্টকী উৎলৌদা পোকখি। অপোকপগী মীং টিঐচ হেরা অদুগা অপোকপীনা টিঐচ ইবেমচানি, অনিমক লৈখিদ্রে। ইম্ফালগী দিএম কলেজদা আইকোম তম্লকপা টিঐচ চাওবা নম্বোলদা লৈবা লৈরেন গার্লস হায় স্কুলদা ওজা ওইরম্মী। ১৯৭০ দগী সোসিয়েল ৱার্ক তৌবা হৌরকখি অমদি মশাগী চহী ৩৫ শুবা মতমদা ১৯৭২ দা ফুল ফ্লেজেদ মণিপুর এসেমব্লিদা অহানবা ওইনা এমএলএ কাখি। ১৯৭২ দগী ১৯৯৫ ফাওবা টার্ম মঙারক নম্বোল এসিদগী এমএলএ কারমখি। ইন্নার মণিপুর পর্লিয়ামেন্টরি কন্সটিটুয়েন্সিদগী অহুম্লক এমপি ওইনা কারমখি।

মহাক মণিপুর লেজিসলেটিব এসেমব্লিগী দিপুটি স্পিকার, মণিপুরগী মিনিষ্ঠার ওফ ষ্টেট, কেবিনেট মিনিষ্টারগী ফম পুরম্বগী মথক্তা য়ুনিয়ন মিনিষ্টার ওফ ষ্টেটসু ওইরমখি। বিজেপি, মণিপুরগী প্রেসিদেন্টকী ফমসু টার্ম অনিরক পুরমখি। ইলেক্তোরেল পোলিটিক্সতগী পোত্থারবা হৌজিক কেভিকে, বিষ্ণুপুরগী চিয়ারমেন অমদি পন্ডিত দিন দয়াল উদ্যায় ইন্সটিট্যুট ওফ এগ্রিকালচারেল সাইন্সেসকী মেনেজিং চিয়ারমেন ওইরি।

অতোপ্পা পদ্মশ্রী এৱার্দি গুরু ককচিংতাবম সনাথোইবনা হায়, হৌখিবা মতম খরসিদা থাঙ-তা হায়বসি মীয়াম্না য়াম্না পাম্নরক্লে অদুবু হান্নদি অসুম্না ওইরম্বা নত্তে। থৌবাল দিস্ট্রিক্টকি ৱাঙ্খেমদা পোকখিবা সনাথোইবা মহাক্কী মখুরা (মমারোমগী)গৌর কিশোর (পদ্মশ্রী) গী মখাদা য়াম্না নহা ওইনা থাঙ-তাগী ট্রেনিং ফংখিবনি।

মতম অমদা থাঙ-তাগী মশান্নদা নুপীশিং ইয়াও য়াওরমদে, অদুবু হৌজিক্তি নুপীশিংসু মশান্না অসি ফজনা শান্নরে হায়না পল্লদুনা থাঙ অমদি তা শীজিন্নদুনা অমদি খূৎলায় অমতা য়াওদনা শান্নবা মখলগী মার্সিয়েল আর্ট মশান্না অসি মণিপুরদা মতম শাংনা অথীংবা লৈরম্মি হায়না মহাক্না ফোঙদোকখি।

হৌখিবা চহী ১৮৯১ গী এঙ্গলো-মণিপুরী ৱারনা বৃটিশনা মণিপুরবু মায়থীবা পীদুনা খুদুম চনশিনখ্রবা মতুংদা থাঙ-তা শান্নবা অমদি প্রেক্টিস তৌবা বৃটিশনা থিংজিনখিবদগী লোন্না শান্নবা নত্তনা ফোংনা শান্নবা ঙম্লমখিদে হায়বা ৱাফম মহাক্না থমখি। অদুবু মহাক্কি মখুরা গৌরকিশোর য়াওনা থাঙ-তাগী গুরুশিংনা হোৎনবদগী হৌজিক্তি থা-তাগী মশান্না মণিপুর মনূংদদা নত্তনা মণিপুরগী মপান্দাসু শান্নরে হায়না মশাগী চহি ৬৭ শুরবা সনাথোইবনা ফোঙদোকখি।

চহি ৬৭ শুরবসু নুমিৎ খূদিংগী পূঙ্খায় অমদি মিনিট ৪৫ ফাওবা লেপ্পা লৈতনা প্রেক্টিস তৌরিবা সনাথোইবনা হায়, অসুম্না শান্নবা অসিনা মীৎ-না শিংবগা লোয়ননা হকচাং য়ৌনা অমদি ফনা লৈবা ঙম্মি হায়না মহাক্না মখা তানা ফোঙদোকখি।

সোর্স: সঙাই এক্সপ্রেস   

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু