কাছার দিষ্ট্রিক্টতা পুঙগী ওজা নিলমনিদা এৱার্দ খুৎশিন্নখ্রে
ইম্ফাল, মার্চ ২৫ : আসামগী কাছার দিষ্ট্রিক্টকী মনুং চন্না লৈবা লামাগ্রামগী বামোন মান্দপতা পাঙথোকপা অচম্বা থৌরম অমদা গুরু পুঙ য়ৈবা খুমুকচম কামিনিবাবু সিংহ মেমোরিয়েল এৱার্দ ঙসি গুরু পুঙ য়ৈবা খুমুকচম কামিনিবাবু সিংহ মেমোরিয়েল ট্রাষ্ট কাছার দিষ্ট্রিক্টকী বাম মনুংখুনগী পুঙ য়ৈবা কোংখাম নিলমনিদা খুৎশিন্নখ্রে।
ঙসিগী এৱার্দ খুৎশিন্নবগী থৌরম অদুদা আসাম য়ুনিভার্সিটিগী হেদ ওফ মণিপুরী দিপার্টমেন্ট প্রোফেসর ডা. ঐচ নোনিকুমার, আসামগী এদিসনেল চীফ ইঞ্জিনিয়ার আর কে গোপালসনা অমদি গুরু পুঙ য়ৈবা খুমুকচম কামিনিবাবু সিংহ মেমোরিয়েল ট্রাষ্টকী চেয়ারমেন খুমুকচম কান্ত বিহারীনা চীফ গেষ্ট, স্পেশাল গেষ্ট অমদি প্রেসিদেন্ট ওইনা দেজদা ফমখি।
থৌরমগী মখা তারকপা ওইনা লৈখিদ্রবা গুরু খুমুকচম কামিনিবাবুগী ফোটোদা লৈ কৎপগা লোয়ননা মহাক্কী খুভমদা হৈকৎ লৈকৎসু তমখি। থৌরম অসিগা মরী লৈননা আসাম য়ুনিভার্সিটিগী হেদ ওফ মণিপুরী দিপার্টমেন্ট প্রোফেসর ডা. ঐচ নোনিকুমারনা ফোঙদোকখিবদা, ঙসি কাছারগী লামাগ্রাম হায়রিবা খুল অসিদা মতম অমগী শক্নাইরবা ওজা গুরু পুঙ য়ৈবা ওজা ওইরম্বা খুমুকচম কামিনিবাবুবু নীংশিংবা ওইনা মীওই ৫না শাবা গুরু পুঙ য়ৈবা খুমুকচম কামিনিগী অশেংবা সেবকশিংগী মনুঙদগী গুরু পুঙ য়ৈবা খুমুকচম কামিনিবাবু সিংহ মেমোরিয়েল এৱার্দ অসি পুঙ য়ৈবা ওজা কোংখাম নিলমনিদা খুৎশিন্নবনি।
এৱার্দ অসি হৌজিক্কী মতম অসিদা লৈজরিবা সঙ্কীর্ত্তন অমদি পুঙ য়ৈবশিং অসিদা অনৌবা ঈহৌ অমা শাগৎপগা লোয়ননা মণিপুরী কালচার অসিবু য়াম্না ফজবা মওংদা য়োকখৎনবগী পান্দমদা এৱার্দ অসি পীজবনি হায়না মহাক্না ফোঙদোকখি। এদিসনেল চীফ ইঞ্জিনিয়ার আর কে গোপালসানা ফোঙদোকখিবদা, ঙসি অসি ঐখোয়না চহী ৪২ রোমগী মমাঙদা তাইবং থাদোকখ্রবা খুমুকচম কামিনিবাবুগী লৈখিদ্রবা নুমীৎ অসিদা গুরু পুঙ য়ৈবা খুমুকচম কামিনিবাবু সিংহ মেমোরিয়েল ট্রাষ্টনা ওজাগী মহৈরোয়শিংদগী অমা খনগৎতুনা অহানবা ওইনা পুঙ য়ৈবা ওজা কোংখাম নিলমনিদা এৱার্দ অসি খুৎশিন্নবনি হায়না মহাক্না ফোঙদোকখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু