কলমগী ২২ শুবা মপোক কুমওন থৌরম পাঙথোকখ্রে
ইম্ফাল, ফেব্রুয়ারী ৯ : কংলৈপাক লোয়নশিল্লোন অপূনবা মরূপ (কলম) গী ২২শুবা মপোক কুমওন থৌরমগা লোয়ননা মনা য়েন্থোকপা অমদি তরাম্না ওকপগী থৌরম অমা ঙসি মণিপুর প্রেস ক্লাবতা পাঙথোকখ্রে।
থৌরম অদুদা মৈনম ভোরোতকী ‘মমি শেংখিদ্রবা নুংশিবা’ হায়রিবা লাইরিক অসিদা হাওবম (হাওবা) সনাজাওবা নীংশিং লোয়নশিল্লোন মনা, থোকচোম নিংঙোল খুন্দোংবম ওংবী গুনমনি লৈমগী ‘ঈগী লৈই’ দা য়ূম্নাম ইবোবী নীংশিং লোয়নশিল্লোন মনা, ক্ষেত্রিময়ূম সুবদনিগী লাইরিক ‘অশেংবা ইরল’ দা শগোলশেম তরুনি নীংশিং লোয়নশিল্লোন মনা, তখেল্লম্বম দ্বিজো সিংহগী ‘খোঙ্গুলগী মমি’ দা কলম লোয়নশিল্লোন মনা অমদি মিতম শাবা হকপা লাইয়েকপা চবুংবম ইবোতোম্বী খুমনদা থিয়াম ইনাওমচা নীঙশিং লোয়নশিল্লোন থৌগল মনা খূৎশিন্নখি। মনাশিং অসিদা সাইতেসনা, শাল অমদি শেলগী মনা য়াওখি।
থৌরম অদুদা লাইনিংথৌ সনামহী তেম্পল বোর্দকী সেক্রেটারি মাইস্নাম শিবদত্ত লুৱাংনা চীফ গেস্তকী ৱারোল পীরদুনা হায়, ঙসিগী থৌরম অসিদা লোনয়ান য়াওদবা ঐখোয়গী লৈজরিবা অশেংবা ইরোল অসি য়োকখৎনবগী পান্দমদা মনাশিং পীরিবা অসি নুংঙাইবা ফাওই। অসিগুম্বা খোঙথাং অসিদা লমদম অসিদা লৈমিন্নরিবা পূম্নমক্না পূক্নিং থৌগৎফম থোকই হায়খি। অইবা-অইবীশিং অসি অরায়বা অমত্তা নত্তে। মখোয় অসি মথৌনা মরীংজেল লৈবা অখাঙ কনবা মীওই ঙাক্তনি। কনাগুম্বা অমনা অইবা অমা ওইগে হায়বদা হেক্তা য়াবা নত্তে হায়খি।
অমরোমদা মহাক্না মখা তানা, ঐখোয়গী ইপা-ইপুশিংনা থম্বীরম্লিবা লনগৈশিং অসি মফম মতম চানা তাশীনহৌদবনা ঙসি মীতোপ মীয়ানচাশিংনা থেংখাং কয়াদা ঐখোয়দা অকনবা শাফু কয়া পীরক্লি। মরম অদুনা হৌজিক ওইরিবা লৈবাক্কী ফীবম অসিদা লৈবাক্কীদমক চেন-চোংলিবশিংনা পূন্না কো-ওর্দিনেসন পীনদুনা জ্ঞান তানা থবক তৌমিন্নবা তঙায়ফদে। ঐখোয় পূন্না খূৎশম্নদুনা ঈরমদম অসি কনমিন্নসি হায়নসু ফোঙদোকখি।
থৌরম অদুদা কলমগী ঙমথং য়াইতোংবী হাওবম চিত্রানা প্রেসিদেন্ত অমসুং জোন-৩ থৌবালগী রিতয়ার্দ দি আই য়েংখোম ইন্দিরানা গেস্ত ওব ওনার ওইনা শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু