ইম্ফাল, আগস্ট ২০ : প্রোফেসার এম অক্ষয়কুমার সিংহনা এদিট তৌদুনা পুথোকপা ‘এন এন্থোলোজি ওফ মণিপুরী কলচর’ হায়না মিংথোনবা লাইরিক অমা হৌনবী মতুং ইন্না জৱাহরলাল নেহেরু মণিপুর দান্স একাদেমি ইম্ফালগী হোলদা ফোঙবগী থৌরম পাঙথোকখ্রে।

লাইরিক ফোঙবগী থৌরম অদুদা আর্ট এন্দ কালচার গবর্ণমেন্ট ওফ মণিপুরগী কম্মিস্নার এম জয়না চীফ গেষ্ট, জেএনএমদিএ ইম্ফালগী দাইরেক্টর পি বিলাসনা প্রেসিডেন্ট অমদি জেএনএমদিএ ইম্ফালগী গুরুহল (সঙ্কির্তন) দাক্টর লৈমপোকপম লাকপতিনা গেষ্ট ওব ওনার ওইনা শরুক য়াখি। স্কোলার অইবশিংদসু শিল্লি লাংলিবশিংগী মায়কৈদগী তরাম্না ওকপগা লোয়ননা খুদোলপোৎ পীদুনা ইকাইখুম্নবা উৎখি।

চীফ গেষ্টকী ৱারোলদা এম জয়না হায়, প্রোফেসার এম অক্ষয়কুমারনা এদিট তৌদুনা পুথোকপা ‘এন এন্থোলোজি ওফ মণিপুরী কালচার’ হায়না মিংথোনবা লাইরিক অসি য়াম্না অফবা মখলগী লাইরিক অমা ওইগনি হায়না খল্লি। মণিপুরী কালচারগী ওইবা মচাক কয়া অমা য়াওরবা লাইরিক অসি আর্টিকল ২৫ য়াওরি। স্কোলার ২০ না ইবা লাইরিকনি। কলচর তৌরিবা মহৈরোয় অমদি কলচরগী থবক তৌরিবা মীওইশিংদা লাইরিক অসি পারগা কান্নবা য়াম্না ফংগনি হায়না খল্লি। লোয়ননা মণিপুর য়ুনিভার্সিটি ওফ কলচরগী মহৈরোয়শিংসু য়াম্না কান্ননি হায়খি।

মহাক্না হায়, মপান লমশিংদগী লাকপা মীওইশিংনা এন এন্থোলোজি ওফ মণিপুরী কলচরগী লাইরিক অসি পারগা মখোয়না মণিপুরগী কলচরগী মরমদা হেন্না মমুৎ তানা খঙবা ঙমগনি। লাইরিক অসি পারগা মণিপুর অসি করিনো হায়বদুসু খঙবা ঙমগনি। লাইরিক অসি পারগা মণিপুর অসি করিনো হায়বদুসু খঙবা ঙমগনি। মণিপুরগী পুৱারীদগী হৌনা চৎনরক্লিবা কলচর অমদি নাৎ চৎনবীগী হৌরকফমসু লাইরিক অসিদা য়াওরি।

মণিপুরদা লৈরিবা স্কোলারশিংনা তোঙান তোঙানবা মখলগী কলচরগী লমদা থোইদোক হেন্দোক্না খঙলিবা, উরিবা, থবক ওইনা পাঙথোক্লিবা পুম্নমকশিং অসি নিংথিনা ইথোক্লগা থম্বীদুনা লাইরিক অমমম ওইনা ইদুনা পুথোক্লগদি তুংগী মীরোলদা হেন্না কান্নবা পীগনি। কালচার য়োকখৎপদা অফবা মখলগী লাইরিক ইবা মথৌ তাই হায়খি।

জেএনএমদিএ ইম্ফালগী দাইরেক্টর পি বিলাসনা হায়, প্রোফেসার এম অক্ষয়কুমারনা এদিট তৌদুনা পুথোকপা এন এন্থোলোজি ওফ মণিপুর কলচারগী লাইরিক অসি কলচরগী লমদা থবক তৌরিবা মীওইশিংগী ওইনদি য়াম্না কান্নবা পীরগনি হায়না খল্লি। লাইরিক অসি মহৈরোয় অমদি আর্টিষ্টশিংনা পাদুনা কলচরবু নিংথনা য়োকখৎনবা হোৎনমিন্নসি।

সোর্স: সঙাই এক্সপ্রেস