image

ইম্ফাল লিটারেচার ফেস্টিভেল ২০১৫ - কাউঙম্লরোইদবা মিকুপ খরা

(অহানবা শরূক)

ডিসেম্বরগী তাং ৩, ২০১৫; বাংলাদেশকী পূংজাদা অয়ুক ৯ তাবদা ঐখোয়’নী লৈবাক অমদগী অমদা চঙবগী চৎনবী-পথাপ পূম্নমক লোইরগা ইণ্ডিয়াগী চেকপোস্ট লান্দুনা আগরতলা শহরদা খোঙ হেক থাবদা নে’ তাই, মতম কুইনা উংখৎলুরবা শোরদো শাংনা হোন্থোকই। হন্দক্কী খোঙচৎসিদা ঐগী খোঙলোয় ওইরিবসি বাংলাদেশকী নুপী অইবীশিংগী মনুঙদা নাইতোম ওইনা চোংথোরকইবা কবি অয়েকপম অঞ্জু-নি। মশাগী শৈরেং লাইরিক অনী ফোঙলবনি, অমনা বাংলাদা অমনা মৈতৈরোনদা। ইম্ফাল লিটারেচার ফেস্টিভেল ২০১৫ য়াওননবা লাকপনি ঐখোয়’নী। বাংলাদেশতগী ঐখোয় মরীনি ফেস্টিভেল অসিদা শরূক য়াগদবা; কবি খোইরোম ইন্দ্রজিত অমসুং কবি হামোম প্রবিততি ঙরাংনা আগরতলাদা চংঙক্না লৈখ্রবনি। ঙসি অয়ুক পুঙ ১২-৩০ তাবদা ইম্ফালগীদমক্তা আগরতলাদগী পাইগদবনি। মদু নংননবনি অঞ্জু ঐখোয়’নীনা ঙসি অয়ুক ঙন্না চংঙকপা। মসি য়ৌরক্নবা হোৎনবদা ঐখোয়’নীনা ৱাখিবা, থেংনখিবা খুদোংথীবা ময়াম য়াম্না লাইনা থোকখিদে, শাংখ্রবা ‘ফিকশন’ অমগী শক্তমনি। চুম্না হোৎনরগা ভিসা ফংবা নংনরোই হায়না খনবদগী কনফারেন্স য়াওবগী স্পেশাল ভিসাগীদমক চে-চাং মেনশিন্দুনা ২৬ নভেম্বরদা ইশা-ইশানা চৎতুনা চিটাগাংদা লৈবা ইণ্ডয়াগী ডেপুটি হাই কমিশনারগী ওফিসতা পিশিনবনি। ডিসেম্বরগী তাং ২দা ডেলিভারী পিগনি হায়বদুদা ইম্ফাল চৎপগী থৌরাং পূম্নমক লোইদুনা অঞ্জু ঐখোয়’নী অমুক ১ ডিসেম্বর নুমিদাংগী ট্রেনদা চিটাগাং চৎলি। ২ তারিখ থুংলুরগা কোইচেন চেন্না হোৎনদুনসু ভিসা ফংবদা নুমিদাংগী পুঙ ৭-৩০ তাখি, ডলার এনডোর্সমেন্টকী থবক লোইরগা নুমিদাং পুঙ ৯দা অমুক ট্রেন তোংদুনা আখাউড়া পাংখি। নুমিদাং চুপ্পা আখাউড়া রেলস্টেশনদা লেল্লগা ঙসি অয়ুক ঙন্না বোর্ডার লানশিল্লকপনি। অদুননি আগরতলা টাউনদা হেক খোঙ থাবগা ঐখোয়’নীনা চনিং তানা শাংলবা নুংশাশোর অমা হোন্দোকখিবদো। আগরতলাগী ওজা এন. দিলীপনা ঐখোয়বু ওকপিরম্মি। ঐখোয়না হন্দক লাক্ননবা হোৎনবসিদা এয়ার টিকেটতগী হৌনা মরম পূম্নমক কূপ্না য়েংশিনববদা ওন্থোক্না ৱাবিখ্রবনি ওজা দিলীপ অমসুং ইম্ফালগী ফেস্টিভেল অসিবু শিন-লাংবিরিবা সংস্থান সাথৌলূপকী মহূৎ শিন্দুনা মরূ ওইনা হোস্ট ওইবিরিবা একাডেমী এৱার্ডি কবি শরতচান্দ থিয়াম। মখোয়গী লমনদি কৈদৌঙৈসু শিংঙম্লরোই। ওজা দিলীপকী য়ুমদা ইরু-মাইথজদুনা ইতৈমানা নুংশিনা শিন-লাংবিবা চাকলেন অদো য়াম্না হাউনা চারগা মতম নংননবা তহা তহা এয়ারপোর্ট য়ৌখি। এয়ারপোর্ট য়ৌবদদি অৱাবা পূম্নমক কাউখ্রে। বাংলাদেশকী ঐখোয় মরীগা লোয়ননা ত্রিপুরাদগী মরীনি পূন্না চৎমিন্নগদৌবা - কবি এন. দিলীপকী লুচিং মখাদা নহা কবি এন. রঘুনন্দ অমসুং ত্রিপুরাগী নৌনা মচীন তুমখৎলকইবী কবি কে. সারিতা সিংহ; মহাক্কা লোয়নরি মহাক্কী মনেম বৈজয়ন্তী দেবীসু। ফেস্টিভেলগীদমক চৎপা নত্রবসু ঐখোয়গী খোঙলোয় ওইমিন্নরুরে ঐগী এফবি ফ্রেণ্ড গুরুময়ুম বিপ্লব শর্মা। মাগী নুপী অঙাংসু য়াওরম্মি। ময়াম ৱা ৱা লাউনা চৎমিন্নবা য়াম্না নুংঙাইবা খোঙচৎ হায়বদো ওইরে।

 

XYZ

 

প্লেন মনুঙদা বিপ্লব, ঐ অমসুং অঞ্জু ফম্মিন্নৈ। অঞ্জুগীদি হন্দক্না অহানবনি আগরতলাদা লাকপা, প্লেন তোংবা অমসুং ইম্ফাল চৎপা। অদুনা মঙোন্দদি অঙকপগী অঙকপা ঙাক্তনি। এয়ার ইণ্ডিগো-গী প্লেনদো মিনিট নিফুমঙারোম অতিয়াদা পাইরুরগা মতম্না লাক্লবদা মশাইকোন তম্লবা চোকথরবা চেক্লাগুম তপ্না পাইথরকতুনা ইম্ফাল এয়ারপোর্টকী রানওয়েদা কন্না চেল্লম্বদগী লংজাদৌনা তপ্না তপ্না লেপ্লরবদা ঐনা অঞ্জুদা হায় - নঙনা মতম কুইনা মঙলকপা মঙ অমদি ঙসি তাইবং শক্তম লৌদৌরে, মণিপুরী জাতিগী হৌরকফম স্না লমদমনি হায়নরিবা স্না থম্বালগুম মকা ফন্না শাৎচরিবা মণিপুরগী খোইদৌ ময়াইদা থমচেৎকুম ঙান্থোইরিবা ইম্ফাল সিটিগী তম্পাক্তা অহানবা খোঙদোই হুনদৌরবনি নঙ ঙহাক্কী মনুঙদা। ৱা-দু তাবদা অঞ্জুগী মায়থোংদা করিগুম্বা মঙাল অমা ফাউরকপগুম তৌখি, মোমোন মীনোক অমগা লোয়ননা তপ্না হৌগৎলকখি কুমথবগী পরেংদা লেপ্ননবা। এয়ারপোর্টকী থৌরম পূম্নমক লোইরগা ট্রলি ব্যাগ ইন্দুনা থোরকপদদি ওজা শরতচান্দ থিয়ামনা লুচিংদুনা সাথৌলূপকী লুচিংবশিং লোইনা ঙাইনা লৈরম্লে ঐখোয়বু ওক্ননবা। সাথৌলূপকী প্রেসিডেন্ট এন. রবিচন্দ্র, হান্নগী প্রেসিডেন্ট উত্তম, মরূ ওইবা মেম্বার লম্বাময়ুম বিমোলনচিংবা মীওই কয়ানি নুংশিবগী শাংলবা পাম্বোম অনী তিংথোক্তুনা ঐখোয়বু তরাম্না ওকপিরম্বা। মদুদৈ চুমদ্রিং হোটেল ভৈগ্য। নম্বুল তুরেলগী হেক তোর্বান্দা লৈবা হোটেলনি। অদুবু নম্বুলগী শক্তম উরুবদদি পূক্নিং শোকখি; তুরেলগী থৱায় ওইরিবা ঈচেল লেপখ্রে, অমোৎ-অকায়না মশক মাঙহনখ্রে। তুরেলনি হায়না মশক খঙবা ৱারে। হোটেলদা চেক-ইন তৌবগা করিমত্তা পোত্থানদনা ঐখোয় ময়াম চৎলে ‘আইএসটিভি’গী স্টুডিওদা লন্নায় লেংবা শৈরেং পাবগী থৌরম’মা রেকর্ডিং তৌননবা। হোটেল ভৈগ্যদা লৈবসে ঐখোয় পূন্না মী ১৪নি; হান্না পঞ্জখিবা বাংলাদেশ অমসুং ত্রিপুরাগী মী মরী/মরী পূন্না নিপালগা লোয়ননা আপার আসাম হায়বদি হোজাইরোমদগী মী অনী, কাছাড়দগী অনী অমসুং জিরিবামগী অনী। হোজাইরোমগী কবি অনী এল. শ্রুতিকুমার অমসুং প্রেমবাবু সিংহ থুংঙদ্রি। অদুনা কাছাড়গী কবি এন. কে. হাওরম্বম অমসুং খাইদেম জাপান অমসুং জিরিগী কবি অনী থোকচোম শরত অমসুং মোইরাংথেম রোমিও য়াওনা ঐখোয় ১২ চৎলে আইএসটিভি-দা। অহানবদা বাংলাদেশকী কবি মরী, মথংদা আগরতলাগী কবি অহুমগা লোয়ননা ম্যানমারগী কবি হরিকুমার অৱাংতাবম মখোয় মরী অমসুং অরোয়বদা কাছাড় অমসুং জিরিগী পূন্না কবি মরী গ্রুপ ওইনা তোঙান তোঙান্না মথং মথং শৈরেং পারে, রেকর্ডিং তৌরে। সাথৌলূপকী সেক্রেটারী তোংব্রম অমরজিৎ অমসুং শক্নাইরবা কবি শরতচান্দ থিয়ামনা পূম্নমক কনডাক্ট তৌই। অরোয়বদা ঐগী ইন্টারভিউ অমসু রেকর্ড তৌরে। পনবা য়াবা অমনা, শক্নাইরবা জগোইগী আর্টিস্ট গীতাঞ্জলিসু ঐখোয়না হেক থুংঙবদগী ইম্ফাল হেক থাদোরক্ত্রিফাউবা ঐখোয়গা লোয়ননা’দুম লৈমিন্নরবনি। মাদি বাংলাদেশতসু অনীরক লাক্লম্লবনি। মহাক য়াওবদুনসু ঐখোয়দা য়াম্না হেন্না নুংঙাইব’মা পোকহল্লি, মতেংসু য়াম্না ওইখি। পূম্নমক লোইরগা নুমিদাংগী চাক চাবা চৎলে শক্নাইরবী কবি-অইবী ক্ষেত্রিময়ুম সুবদনীগী য়ুমদা। চাবগী থৌরাংসি শিনবদি ওজা শরতচান্দ থিয়ামনা শিঞ্জবনি, ভেন্যুদু ক্ষেত্রিময়ুম সুবদনীগীদা ওইবগী ৱানি। মথেল-মকোয় চংখোন্না য়াম্না নিংথিজনা শিনবা হন্দক্কী মণিপুর থুংলুবগী অহানবা চাকলেন চারগা জার্নিনা খরা চোকথনরবা ঐখোয় ময়াম খোংলৈ থুনা হোটেলদা হল্লকখি। অঞ্জুগীদি মণিপুরগী চাকসি মসিনা অহানবনি, চাক অনপ্পীদু হৈনরোয়দা খনবনি, অদুবু য়াম্না হৈননা হাউনা পেন্না চারকখি হায়না ৱারী তৌই। ঐনা ইদোমতা খনখি, অদুদি মহাক অসে মণিপুরগা য়াম্না চুনগদৌরিনা! ইম্ফাল লিটারেচার ফেস্টিভেল য়াওগনি হায়বগী নুংঙাইরবা মঙলান অমদা তাউদুনা লাকপা ঐখোয় ময়াম নুংঙাইরবা মঙ অমদা অহানবা নুমিদাং অদো নুংঙাইনা লেনখি।

 

XYZ

 

মণিপুরদা থুংলুবগী অহানবা নুমিদাং অসি নুংঙাইরবা মঙলান অমদা তুমখুন তাল্লুরবা বাংলাদেশ, ত্রিপুরা, হোজাই, কাছাড় অমসুং জিরিবামগী ঐখোয় কবি-অইবা মী ১৪ ডিসেম্বরগী তাং ৪গী অয়ুকতো ঙন্না হৌগৎনরগা ইরু মাইথজদুনা লোইশিল্লে; মদুদগী শীনবী-লাংবিরিবা কাঙবুশিংনা গাড়ি পুদুনা লাকপগা লোইনা থোক্নরে। সাথৌলূপকী উত্তম, বিমোলনচিংবা হৈশিংলবা ইচিন্নাও কয়ানা ঐখোয়বু কূপ্না শেন্নবিরি। অহানবদা শ্রীগোবিন্দজী খুরম্বা চৎলে, মদুদৈ থোরক্লগা ইবুধৌ পাখংবগী মন্দিরদা। লাই খুরম্বা লোইরগা লক্ষ্মী হোটেলদা অয়ুক্কী চাকলেন চারগা ঐখোয় ময়াম হোটেলদা হঞ্জিল্লে। ঙহাক্কী মনুঙদা লোইশিন্নরগা চৎলে কোনুং মমাঙদা লৈবা লময়ানবা শঙলেনদা, পুঙ ১ তাবদা ইম্ফাল লিটারেচার ফেস্টিভেল ২০১৫ হৌদোকপগী থৌরম মফমসিদা পাঙথোক্কদবনি। পিক্তক তৌবা হোল অদু মীনা পিক থনখি। পুঙ ১ খজিক্তং লৈথরকপদা থৌরম হৌরে। মণিপুর সরকারগী সোসিয়েল ওয়েলফেয়ার অমসুং কো-অপারেশনগী ওনারেবল মিনিস্টার এ কে মিরাবাই দেবীনা চীফ গেস্ট ওইনা থৌরমদুদা লৈতেংবিখি। আর্টস এণ্ড কালচারগী সেক্রেটারী শ্রী কে রাধাকুমার সিংহ, আইএএস-না ময়ায় তাংবল লৌদুনা পাঙথোকখিবা থৌরমদুদা স্পেশাল গেস্ট ওইবিখি ম্যানমারদগী লেংবিরকপা শ্রী কে সুন্দরগোপাল শর্মা অমসুং বাংলাদেশকী শ্রী এ কে শেরাম। থৌরমদুদা লান্থোক্কদবা নোংথোম্বম কুঞ্জমোহন প্রাইজ লৌবিগদবা অইবা আর কে ব্রজেন্দ্র সিংহসু (বিএস রাজকুমার হায়না ময়াম্না হেন্না খঙনবিবা) ডায়াসতা ফম লৌবিখি। য়াইফ-মৈরা চুখৎপিদুনা চীফ গেস্টনা থৌরম হৌদোকপিরবা মতুঙদা ফেস্টিভেলগী কনভেনর কবি শরতচান্দ থিয়ামনা কী-নোট এড্রেস পিবিখি। মথংদা বাংলাদেশকী নহা কবি অনীগী শৈরেং লাইরিক অনী - কোন্থৌজম সুরঞ্জিতকী ‘নোং অমদি উপাম্বি’ অমসুং চিংখৈ অঙোমগী ‘পেবেতকী পেনা’গী মখুম হাংদোকই। মথংদা আর কে ব্রজেন্দ্র সিংহদা নোংথোম্বম কুঞ্জমোহন প্রাইজ খূৎশিন্নখি। সাথৌলূপকী সেক্রেটারী তোংব্রম অমরজিৎনা কনডাক্ট তৌবা ফেস্টিভেলগী মরূ ওইবা থৌরম অসি এৱার্ড ফংলবা অইবা আর কে ব্রজেন্দ্র সিংহ, স্পেশাল গেস্ট এ কে শেরাম অমসুং কে সুন্দরগোপাল শর্মা, চীফ গেস্ট মিনিস্টার এ কে মিরাবাই দেবী অমসুং প্রেসিডেন্ট কে রাধাকুমার সিংহনা ৱা ঙাঙবগা লোয়ননা লোইশিনখি। মথংদা শৈরেং শৈদিন্নবগী সেশন অমা পাঙথোকই। মদুদা মণিপুরগী শক্নাইরবা কবি এস ভানুমতি দেবী, ম্যানমারগী হরিকুমার শর্মা অৱাংতাবম, বাংলাদেশকী খোইরোম ইন্দ্রজিত, ত্রিপুরাগী নিংথৌখোংজম দিলীপ অমসুং আসামগী এল শ্রুতিকুমারনা প্রেসিডিয়াম মেম্বার ওইবিখি। শৈরেং শৈদিন্নবগী থৌরমসিদা বাংলাদেশ, ত্রিপুরা, আসাম, জিরিবাম, ম্যানমার অমসুং মণিপুরগী কবি ২০ রোমনা লন্নায় লেংবা শৈরেং পাখি।

 

নুমিদাংদুদি ঐজ্ঞা লৈহাওথাবম শরত চন্দ্র শর্মা, ওজা নাওরোইবম ইন্দ্রমনি অমসুং ডা. চিরোম রাজকেতন মখোয় অহুম্না পূন্না লমশাংদা রাজকেতনগী য়ুমদা ওইনা চাক্লেন চাবগী থৌরম শীল্লে। চৎপগী লম্বীদা অমসুং মফমদুদা বাংলাদেশকী বিশগাঁওরোমদগী খুল হোংখিবা শাগৈগী অমসুং অতৈ অহল খরগা য়াম্না কুইরবা মতুঙদা উন্নরকখি, মদু ঐগীদমক্তদি য়াম্না নুংঙাইরবা ক্ষেণফম অমা ওইখি।

 

মথংগী নুমিৎ ডিসেম্বরগী তাং ৫ দদি ঐখোয় ঙন্না খোঙ শাল্লে লোকতাক তম্না। ইম্ফালদগী কিলোমিটার ৪৫ রোম থাপ্না খা-রোমদা লৈবা মোইরাংদনি লোকতাক লেকনা লৈরিবসে। মণিপুরগীতা নত্তে লেক অসি অৱাং-নোংপোক ভারতকী খ্বাইদগী চাউবা ‘সুইট ৱাটার লেক’নি। ২০০ স্কোয়ার কিলোমিটার পাক-শনবা লেক অসিগী শরূক অমদা স্কোয়ার কিলোমিটার ৪০ রোম পাক-শন্না লৈরি ফুমদিতনা থনগৎতুনা শেমখিবা ‘কৈবুল লমজাউ ন্যাশনাল পার্ক’, মালেমসিগী খ্বাইদগী চাউবা অতাউবা ‘ফরেস্ট রিজার্ভয়ের’, মসিদনি মণিপুরগী মাঙথরক্লিবা শঙাই শজিগী অরোয়বা শাইদাংফম ওইরিবসে। মোইরাংদা ইবুধৌ থাংজিংগী লাইশং লৈরি, লৈরি ‘আইএনএ মিউজিয়াম’নচিংবা ইতিহাসকী ময়েক লারবা খুদম কয়াদং। মদু পূম্নমক য়েংবা অমসুং লোকতাককী থাঙ্গ ঙারমলৈকাইদা ‘লোকতাক খোর্জৈ লূপ’কা খূৎ শম্ননা শীনবা ইম্ফাল লিটারেচার ফেস্টিভেলগী অনীশুবা নুমিৎকী থৌরমপরেং য়াওবা চৎপনি ঐখোয়। হোটেল ভৈগ্যদা লৈমিন্নবা বাংলাদেশ, ত্রিপুরা, আসাম অমসুং জিরিবামগী ঐখোয় কবি ১৪গা লোয়ননা সাথৌলূপকী লুচিংবশিং শরতচান্দ থিয়াম, এন রবিচন্দ্র, টি. উত্তম, লম্বাময়ুম বিমোল, হরিদাস খোংবান্তাবম, নেতাজীনচিংবা মরূ ওইবা থৌমীশিং অমসুং মণিপুরগী শক্নাইরবা কবি য়ুমলেম্বম ইবোমচা, মণিপুর ইউনিভার্সিটিগী লিঙ্গুইস্টিক্সকী হেড প্রোফেসর ৱাই. যশোবন্ত সিংহ, মণিপুরী ডিপার্টমেন্টকী হেড প্রোফেসর নাহাকপম অরুণা দেবী, থিয়েটরগী ডিরেক্টর থানিনলৈমনচিংবা মীথোই মীহেনলবা অতিথি কয়াদংসু ঐখোয়গী খোঙলোয় ওইরি। থাঙ্গদা চাগদবা ঙসিগী চাক্লেনসি ওজা যশোবন্ত অমসুং মহাক্কী মিসেস প্রোফেসর নাহাকপম অরুণা-না শীনবনি। লম্বীদা নম্বোলগী মনাক্তা লৈবা ‘মাইবম লোৎপ-চীং’দা ঙহাক লেপ্পি ঐখোয়। মফমসিদনি মালেমগী ওইবা অনীশুবা লাঞ্জাওদা অকনবা লানফম ওইখিবা, ১৯৪৪ খ্রিস্টকুমকী ২১ দগী ২৯ মে ফাওবা মতমদা জাপানগী লান্মীগা ব্রিটিশশিংগা অকনবা লান থেংনবদা মী য়াম্না শোক্নখি, জাপানগী লান্মী কয়াদংসু থৱায় থাখি। মখোয়বু নিংশিংদুনা মেমোরিয়েল অমা শাদুনা থম্লি। ঐখোয়সু লৈখিদ্রবা লান্মীশিংবু নিংশিংদুনা মিকুপ খরদং তুমিন্না লেপ্পগা শ্রদ্ধা উৎখি। মোইরাংদা আইএনএ মিউজিয়াম য়েংঙে। মমাঙথাবদা লাক্লম্বা খুদিংদা মিউজিয়াম থিংবা নুমিৎ ওইরমদুনা খক য়েংবা ফংখিদে। হন্দক্তি মদুগী পেন্দব’দুমা কোক্লে হায়বা য়ারে। লোকতাকতা হি অচৌবা অমা তোংদুনা ঐখোয় ময়াম কোইমিন্নরে। থাঙ্গ ঙারম লৈকাইদা নিংথিজনা শীনবা চাক্লেন চারে। য়াম্না নুংশিবদি ঐখোয়না থাঙ্গ ঙারম লৈকাইগী চাক শীল্লিবা ইমুঙদুদা চঙবা মতমদা মৈতৈগী চৎনবী মতুঙ ইন্না ঐখোয়বু ‘খোইজু-লৈখাম’ থানা মৈ ওক্লে, তাইরেল পুংফাইনা ঈশিং হাইদোক্তুনা শেংদোকপিরে। চাবা থকপা লোইরগা লৈকাইদুগী কমিউনিটি সেন্টারদা ইম্ফাল লিটারেচার ফেস্টিভেলগী নুমিৎ নিনি শুবগী থৌরম নিংথিজনা পাঙথোকয়ে। শৈরেং শৈদিন্নবা অমসুং মপুঙ ফারবা নৈন-মীফম লোইরগা ঐখোয় ময়াম অমুক ইম্ফাল পাংলক্লে। নুমিদাংগী চাকতি সাথৌলূপকী প্রেসিডেন্ট এন. রবিচন্দ্রনা হোটেল এয়ারলাইনসতা ওইনা শীল্লে।

                                                                                                                                                                                                    (মথং মথং)

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু