ইমা কোম্বী লৈখিদবগী ১৯শুবা নীংশিং কুমওন পাঙথোকখ্রে
ইম্ফাল, ফেব্রুয়ারি ১ : অফস্পাগী মায়োক্তা খোঙজং চঙশিনখিবী মৈরা পায়বী লুচিংবী ইমা কোম্বী লৈখিদবগী ১৯শুবা নীংশিং থৌরম ঙসি পোইরৈ লৈমরোল মৈরা পায়বী অপূনবা মণিপুরনা শীন্দুনা ইমা কোম্বীগী য়াতাফম ওইখিবা লম্ফেল সনা কৈথেলদা পাঙথোকখ্রে।
পোইরৈ লৈমরোল মৈরা পায়বী অপূনবা মণিপুরগী ফাউন্দার প্রেসিদেন্তকী থৌরম পুরম্বী ইমা কোম্বীগী লম্ফেলগী সনাকৈথেলদা লৈবা য়াতাফম ফুরাদা মীয়াম্না হৈকৎ-লৈকৎ তমদুনা ইকায়খুম্নবা উৎখি।
থৌরম অদুদা লুপ অসিগী প্রেসিদেন্ত লোংজম মেমচৌবীনা হায়খি, ইং ১৯৮৫গী আগস্ত ২৫ দা থাংমৈবন্দ কব্রাবম লৈকায়দা লুপ অসি শেমখিবনি। ইমা কোম্বীগী লমজিং মখাদা মতম অদুগী সেক্যুরিতি পার্সনেল, আসাম রাইফেলস য়াওনা লালহৌবা নমথনবগী মিংদা মী কয়া ফাদুনা হাৎপা, নুপী ওইবী কয়া ইকায়খুম্নবা মাঙহনবগী থবক থিংনবা হোৎনখি। মতুংদা মৈরা পায়বী হায়না মিং ওন্দুনা ময়াই কাবা চীঞ্জাক থিংবা অমদি সেক্যুরিতি পার্সনেলনা মীচমশিং হাৎপা, ওৎপা-নৈনবা অসি থিংদুনা লাকখিবনি।
অহানবা নুপীলাল, অনীশুবা নুপীলাল থোকখ্রবা মতুংদা ঙসিদি অমুক অহুমশুবা নুপীলাল হায়রগদি দ্রাগসকী মায়োক্তা ওইগনি। ইমাশিংগী অকনবা খোঙজংদা মণিপুরগী মফম খরদা অফস্পা ১৯৫৮ লৌথোকখ্রবসু মফম কয়াদা এক্ট অসিগী মরুমদা মী কয়া অৱাবা মায়োক্নরি। লমদমসিদা থোক্লিবা দ্রাগস অমসুং ময়াই কাবা চীঞ্জাক হৌজিক চীংমী-তম্মী পূন্না চঙশিনহৌদ্রবদি তুংগী মীরোল অসি মুৎখ্রগনি হায়না মেমচৌবীনা ফোঙদোকখি।
মহাক্না হায়খি, অফস্পাগী মরুমদা মীচমশিংগী মথক্তা চত্থবা মীওৎ-মীনৈ অমসুং মীহাৎ-মীপুনগী মায়োক্তা ঙসিসু লুপ অসিনা লেপ্পা লৈতনা খোঙজং চঙশিনখিগনি। মহাক্না হায়, খুন্নাই অসিগী নহাশিংবু নিশাগী ঈপাক্তগী কলহৌনবগী পান্দমদা ইমা কোম্বীনা লুচিংদুনা ১৯৭৪ গী মতমদা নিশাবন্দ শাফোংখি। নিশাগী মায়োক্তা অকনবা ঈহৌ চঙশিল্লিঙৈ ১৯৮০ অফস্পা থমজিল্লক্তুনা শাশিন্নবা খুৎ থোক্নবগী থৌদোক কয়া চত্থরকপদগী মৈরা পায়বীগী ঈহৌ লাকখিবনি।
স্তেত অসিগী দিষ্ট্রিক্ত খুদীংমক্তা পোইরৈ লৈমরোলগী মশা লোইশঙ ২৪ থমদুনা অমদি মশা লোইশঙশিং অসিদগী লৈকায়-লৈকায়, খুঙ্গং-খুঙ্গং কয়াদা লূপ মচা-মচা শন্দোক্তুনা এক্ট অসিবু থেংনদুনা লাক্লি। অফস্পা অসি গ্রেটার ইম্ফালনা কোনবা মফম খরদগী লৌথোক্লবসু স্তেত অসিদগী মপূং ফানা লৌথোক্ত্রিবনা মৈরা পায়বীগী ঈহৈৗদি অদুম্মক মখা তানা হৌখিগনি হায়না মেমচৌবীনা ফোঙদোকখি।
থৌরম অদুদা মেপৱাক (মৈরা পায়বী ওয়েলফেয়ার এসোসিয়েসন কংলৈপাক) কী প্রেসিদেন্ত আর রেংসোঙাক কোইরেং, অমুকোগী প্রেসিদেন্ট নন্দো লুৱাং অমসুং তোঙান তোঙানবা ইমা লুপশিংগী থৌমী কয়াসু শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু