image

অলিম্পিক মেদেলিষ্ট মিরাবাইনা মণিপুরদা তংদু লৈতাবা হঞ্জিলহন্নবা প্রাইম মিনিষ্টার, হোম মিনিষ্টারদা হায়জখ্রে

নিউ দিল্লি, জুলাই ১৮ : ইন্দিয়াগী ওয়েটলিফটিং লিজেন্দ অমদি টোকিয়ো ওলিম্পিক গেমসকী সিলভার মেদেলিষ্ট সাইখোম মিরাবাই চনুনা হৌখিবা নিংথৌকাবা নুমিৎ সোসিয়েল মেদিয়াদা ভিডিও অমা থাগৎলদুনা মহাক্কী ময়ুম লমদম মণিপুরদা তংদু লৈতাবা অমুক হঞ্জিলহন্নবা প্রাইম মিনিষ্টার নরেন্দ্র মোদি অমসুং হোম মিনিষ্টার অমিত শাহদা হায়জখ্রে।

মশাগী চহী ২৭ শুরবী মিরাবাই চনুনা মহাক্কী ভিদিওদা পীবা পাউজেল অদুদা হায়, মণিপুরদা থোক্লিবা ঈরাং অসিনা মরম ওইদুনা শান্নরোই কয়ানা ট্রেনিং কেম্পশিংদা শরুক য়াবা ফংদ্রে অমদি অঙাংশিংগী লাইরিক-লাইশু তম্বদসু চাউনা অপনবা পীরে।

হান্নগী ৱার্ল্ড চেম্পিয়ন মিরাবাইনা হায়, ‘মণিপুরদা থোক্লিবা ঈরাং অসি থা অহুম ফাজিল্লক্লে অদুবু হৌজিক ফাওবা তংদু লৈতবা পুরক্ত্রি। ঈরাং অসিনা মরম ওইদুনা শান্নরোই কয়ানা ট্রেনিং তৌবা ফংদ্রে অমদি মহৈরোইশিংসু লাইরিক-লাইশু নিংথিনা তম্বা ফংদ্রে। মীওই কয়াগী পূন্সি মাঙখ্রে অমদি য়ূম কৈ কয়া অমসু মৈ চাকখ্রে।  ঐগী য়ূমসু মণিপুরদনি। হৌজিক ঐ য়ুনাইটেদ ষ্টেটসতা লৈদুনা লাক্লিবা ৱার্ল্ড ওয়েটলিফটিং চেম্পিয়নশিপ্স অমসুং এসিয়ান গেমসকী শেম-শাবগা লোয়ননা ট্রেনিং তৌরি। ঐ মণিপুরদা লৈত্রবসু ঈরাং অসি করম্বা মতমদা লোইরক্কদগে হায়না মতম পুম্বদা খল্লি।’

টোকিও অলিম্পিক গেমসতা নুপীগী কেজি ৪৯ কাঙলুপ্তা সিলভার মেদেল লৌবগী উৎখিবা মহাক্কী শীংথানিংঙাই ওইরবা পার্ফোমেন্সকী মতুংদা মণিপুর লৈঙাক্না স্পোর্টসকী এসিষ্টেন্ট সুপেরিটেন্দেন্ট ওফ পুলিশ ওইনা হাপখিবী মিরাবাইনা মখা তানা পল্লদুনা হায়, ‘ঐনা ঐখোয়গী প্রাইম মিনিষ্টার নরেন্দ্র মোদি অমসুং হোম মিনিষ্টার অমিত শাহদা হায়জরি মদুদি হৌজিক লৈরিবা মণিপুরগী ঈরাং অসি য়াম্না থুনা লোইশিনবীদুনা মণিপুর মীয়ামগী পূন্সি কনবীয়ু অমদি মণিপুরদা হান্না লৈরম্বা তংদু লৈতাবা ফীবম অদুদা অমুক হঞ্জিলহনবীয়ু।’
হৌখিবা মে ৩দগী মণিপুরদা কাঙলুপকী ঈরাং অমা হৌরকখিবগা লোয়ননা করিগুম্বা য়াম্না থুনা তংদু লৈতাবা পুরক্ত্রবদি মখোয়গী মেদেলশিং হন্দোক্কনি হায়না ইন্দিয়াগী কয়ারক হন্না মিংচৎ পুরকখ্রবা ষ্টেট অসিগী থোইদোক হেন্দোক্না মমিং লৈরবা এঠলেট কয়া অমনা ফোঙদোকপা লৈখ্রবনি।

হায়রিবা এঠলেটশিং অদুগী মনুংদা ইন্দিয়ান ফুটবোল টিমগী হান্নগী কেপ্টেন ওইনাম বেম্বেম দেবি, ওয়েটলিটার কুঞ্জরানি দেবি, বোক্সার লাইশ্রম সরিতা দেবি অমুসং এল ইবোমচা সিংহ অমদি জুদোকা শুশিলা দেবি, লিকমাবমসু য়াওখি। এঠলেটশিং অসিনা  মণিপুরদা লাকখিবা হোম মিনিষ্টার অমিট শাহদা মেমোরেন্দম অমা পীশিল্লদুনা ষ্টেট অসিদা য়াম্না থুনা তংদু লৈতাবা অমুক পুরক্নবা তকশিনখি।

রাজ্য সভাগী হান্নগী এমপি অমদি অলিম্পিক গেমসকী ব্রোঞ্জ মেদেলিষ্ট বোক্সার এমসি মেরি কোমসু মণিপুরগী ঈরাং অসি লোইশিন্নবা প্রাইম মিনিষ্টার নরেন্দ্র মোদিদা আপিল তৌবা ভিডিও অমা থাদোকপা লৈখ্রবনি।

সোর্স: সঙাই এক্সপ্রেস  

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু