অথৌবা চিত্তরঞ্জন লৈখিদবগী কুমওন থৌরম পাঙথোকখ্রে
ইম্ফাল, আগস্ত ১৬ : মণিপুরগী আর্মদ ফোর্সেস স্পিসিএল পৱার্স এক্ত লৌথোকউ হায়বা দিমান্দ তৌরদুনা ইং ২০০৪ গী আগস্ত ১৫ দা মশানা মশাবু মৈ থাজরগা আগস্ত ১৬ তা লায়কন্নবা ঙমদনা থৱাইনা পোন্থা পীখিবা অথৌবা পেবম চিত্তরঞ্জন মঙাং লৈখিদবগী ২০ শুবা কুমওন ঙসি কিয়াম্বা নীংশিং শঙলেন বিষ্ণুপুরদা পাঙথোকখ্রে।
মণিপুর স্তুদেন্তস ফেদরেসননা শীন্দুনা বিষ্ণুপুর কোনুংদা লৈবা অথৌবা চিত্তরঞ্জনগী মীতম অমসুং মহাক্না মৈ থারগা চেল্লকপদা অরোইবা ওইনা তুশিনখিবা বিষ্ণুপুর ম্যুনিসিপাল কাউন্সিল চঙফমদা থম্বা ফোতোদা মীয়াম্না লৈ-শু কৎখি। থৌরম অদুদা পোইরৈ লৈমরোলগী প্রেসিদেন্ত সোরাইশম মেমচা, অমুকোগী প্রেসিদেন্ত পিঐচ নন্দো লুৱাং, কোহরগী চেয়ারমেন ফুলিন্দ্রো কোন্সম, অমাৱাভাগী প্রেসিদেন্ত ৱাই কুঞ্জরাণি অমদি এম এস এফকী প্রেসিদেন্ত হিজম রোসননা প্রেসিদিয়ম মেম্বরশিং ওইনা শরুক য়াখি।
প্রেসিদেন্তকী ৱারোল পীরদুনা হিজম রোসননা ফোঙদোকখিবদা, মালেমদা চৎনদ্রবা অমুবা আইন অসি মণিপুরদা থমজিন্দুনা ইন্দিয়াগী লান্মীশিংনা মণিপুরদা নুপী, অঙাং য়াওনা মী কয়াবু ওৎ-নৈবদা নত্তনা হাৎপনচিংবা থৌদোক চত্থরিবা অসিবু পেন্দবা ফোঙদোক্তুনা হায়রিবা আইন অসি মণিপুরদগী লৌথোকউ হায়বা দিমান্দ তৌদুনা চিত্তরঞ্জননা মশাবু মশানা মৈ থাজদুনা শিজখিবনি। ইন্দিয়া লৈঙাক্না চত্থরিবা থৌওং অমদি মণিপুরদা থোক্লিবা কাঙলূপকী ঈরাং অসি মায়থিবা পীনবা অমত্তা ওইনা হোৎনমিন্নসি হায়না রোসননা ফোঙদোকখি।
অমরোমদা, অথৌবা পেবম চিত্তরঞ্জন মঙাং লৈখিবদগী ২০ শুবা কুমওন থৌরম জিরিবামদসু পাঙথোকখ্রে। এম এস এফ, দিস্ত্রিক্ত কমিতি জিরিবামনা শীন্দুনা জিরিবামগী বাবুপারাদা লৈবা দিস্ত্রিক্ত কমিতি অসিগী ওফিস্তা ঙসি লৈখিদ্রবা অথৌবা চিত্তরঞ্জন মঙাংগী ফোতোদা জিরিবামদা লৈবা তোঙান-তোঙানবা মৈরা পায়বী লূপশিং অমদি সি এস ও কয়াগী লুচিংবশিংনা শরুক য়াদুনা লৈ-শু কৎখি। নুমিদাংদসু কংলাগী নোংচুপ থংবা গেতমমাঙদা এম এস এফকী থৌমীশিংনা কেন্দল থান্দুনা অথৌবা পেবম চিত্তরঞ্জনগী মফমদা ইকায়খুম্নবা ঊৎখি।
সোর্স: পোক্নফম
0 কমেন্ট:
কমেন্ট তৌবিয়ু