ইম্ফাল, ওক্টোবর ২৮ : ফিক্সন এন্দ পোইত্রি ক্লাব, মণিপুর অমদি জে এন মণিপুর দান্স একাদেমী, ইম্ফাল পূন্না খূৎশম্নরগা ঙসি দি এম কলেজ কেম্পাস মনুংদা লৈবা জে এন মণিপুর দান্স একাদেমীগী ওদিতোরিয়ামদা পাঙথোকখ্রে। লোয়ননা শক্নায়রবী অইবী অরাম্বম ওংবী মেমচৌবীদা মহাকবি অঙাংহল শৈরেং মনা ২০২৩ পীদুনা ইকায় খুম্নবসু ঊৎখ্রে।

থৌরম অদুদা মণিপুর য়ুনিভার্সিতিগী স্কুল ওব হ্যুমেনিতিজগী দিন প্রোঃ নহাকপম অরুনানা চীফ গেস্ত, ফিক্সন এন্দ পোইত্রি ক্লাব মণিপুরগী প্রেসিদেন্ট দাঃ হৈস্নাম বুধিচন্দ্রনা প্রেসিদেন্ত, জে এন মণিপুর দান্স একাদেমীগী দিরেক্তর পি বিলাস অমসুং সাহিত্য একাদেমী এৱার্দি দাঃ শগোলসেম লনচেনবনা গেস্ত ওব ওনরশিং ওইনা শরুক য়াখি।

থৌরম অদুগা মরী লৈননা পোলেম নবচন্দ্র সিংহগী ‘শক্তম মচু মচু’ হায়না মিংথোনবা ৱারেং লাইরিক অমসু ফোঙখিবগা লোয়ননা ককচীংদগী য়েংখোম বিহারী, ইম্ফালদগী আই এস কাংজম অমসুং বিষ্ণুপুরদগী খাঙেম্বম ইবেতোন দেবী শক্নায়রবা অশৈবা অহুমবুসু তরাম্না ওক্তুনা ইকায়খুম্নবা উৎখি।

থৌরম অদুদা চীফ গেস্তকী ৱারোল পীরদুনা প্রোঃ নহাকপম অরুনানা হায়, মালেমগী ওইনা মার্চ ২১ দা ৱাল্ড পোইত্রি দে হায়না পাঙথোক্নরি। মসিগুম্না মণিপুরী লোলগীসু শৈরেংগী নুমিৎ অমা লৈফম থোকই হায়না হৌজিক কন্না শৈরৈং ইখৎলক্লিবা, মচী তুমখৎলক্লিবা মীরোল অসিনা মেরাগী থানিন নুমিৎতা মণিপুরী শৈরেং নুমিৎ হায়না পাঙথোরক্লিবা অসিদা ঐখোয়না পূক্নীং থৌগৎতুনা তরাম্না ওকফম থোকই। হৌজিক্তি গ্লোবেলাইজেসন অমসুং দিজি তেল ৱার্ল্ড ওইরবনিনা, মীওই অয়াম্বনা অৱা পোত্থানবসি সোসিয়েল মিদিয়াদা ওইনা পোত্থানরে। মতম অমদদি অৱা পোত্থানবা অসি আউতবুক পাবনা ওইনরম্মী। অদুবু মদুগী চৎনবী অমদি হৈনবদু ঙসিদি মাঙখ্রে। অসিগুম্বা মাঙশিল্লক্রিবা মরী অসি অমুক নৌহৌনা ঐখোয়না শমজিন্ননবা হোৎনবা তঙায়ফদে হায়না ফোঙদোকখি।

থৌরম অসিদা মরী লৈননা পাঙথোকখিবা শৈরেং শৈদিন্নবগী অহানবা সেসন্দা প্রোঃ পোলেম নবচন্দ্র চেয়ার লৌখি। সেসন অসিদা লমদমসিগী শক্নায়রবা অইবা ১০ না মশা-মশানা ইবা শৈরেংশিং পাথোকখি। অদুগা অনীশুবা সেসন্দা চোংথাম সুবদনীনা চেয়ার লৌদুনা পাঙথোকখিবা শৈরেং শৈদিন্নবগী থৌরম অদুদনা অইবা-অইবী ২০ হেনবনা মশা-মশানা ইবা শৈরেংশিং পাথোকখি।

সোর্স: পোক্নফম