অইবা-অইবীশিংগীদমক পাউ-চেশিংনা লৌরিবা থৌদাং শীংথানিংঙাই ওইঃ ক্ষেত্রিময়ূম সুবদনী
ইম্ফাল, মার্চ ১০ : মণিপুরদা ফোঙলিবা পাউ-চেশিংনা লমদম অসিগী অইবা-অইবীশিংদা লাইরিক ইন্নিংবগী ঈথিল পীদুনা লাক্লি। মহাক্কী ‘মালেম আতিয়া’ মিংথোনবা লাইরিক অসিমকসু নুমিৎ খুদীংগী ফোঙবা পাউ চে অমদা তাঙ্কক নাইনা হাপখ্রবা মতুঙদা লাইরিক ওইনা ফোঙবা ঙমজখিবনি। মণিপুরগী অইবা-অইবীশিংগীদমক পাউ-চেশিংনা লৌরিবা থৌদাং থোইদোক্না শীংথানিংঙাই ওই হায়না কে ৱাই এম তি (ক্ষেত্রিময়ূম য়াইমা মেমোরিয়েল ত্রাস্ত) গী চেয়ারপার্সন অমসুং অইবী ক্ষেত্রিময়ূম সুবদনীনা ফোঙদোকখ্রে।
সুবদীনা ৱাফম অসি ঙসি কে ৱাই এম তিনা শীন্দুনা মণিপুর প্রেস ক্লাবকী লোক্তাক হোলদা পাঙথোকখিবা ‘অঙাংগী সাহিত্যদা মালেম আতিয়া’ হায়বা সিম্পোজিয়াম হৌদোকপগী থৌরমদা ফোঙদোকখিবনি।
থৌরম অসিগী মতাঙদা কেএসঐচ সুবদনীনা হায়, ঐখোয় অইবা-অইবীশিংনা ইদুনা ফোংখ্রবা লাইরিকশিংগী মগুণ অসি লাইরিক অদুগী অইবশিংনা কৈদৌনুঙদা লেপ্পা য়ারোই। লাইরিক অদুগী অফ-ফত্তা পূম্নমক অসি নৈনবগী থৌরম পাঙথোক্লবা মতমদতা খঙবা ঙমগনি। মরম অসিনা ঐখোয়না ইদুনা ফোঙখ্রবা লাইরিকশিং নৈনবগী থৌরম পাঙথোকপা হায়বসি য়াম্না তঙাই ফদে খঞ্জদুনা ঙসিগী সিম্পোজিয়ামগী থৌরম অসি পাঙথোকপনি।
পাঙথোকখিবা সিম্পোজিয়ামগী মতাং অমা
সাহিত্য একাদেমি এৱার্দি আর কে ভুবোনস্নানা মোদরেতর ওইদুনা পাঙথোকখিবা সিম্পোজিয়াম অদুদা মণিপুরী দিপার্তমেন্ত, এম য়ুগী হেদ প্রোঃ লোইতোংবম বীরজিতা, ইম্ফাল কলেজগী প্রিন্সিপাল ওইরম্বা প্রোঃ মোইরাংথেম প্রিয়োব্রত, মণিপুরী দিপার্তমেন্ত এম য়ুগী এসোসিয়েত প্যোফেসার দাঃ ৱাহেংবম কুমারী চনু অমসুং মণিপুরী দিপার্তমেন্ত এম য়ু গী এসোসিয়েত প্রোফেসার দাঃ চিরোম রাজকেতননা রিসোর্ছ পার্সনংশিং ওইনা শরুক য়াখি।
প্রোঃ লোইতোংবম বীরজিতনা ‘মালেম আতিয়াদা ঊৎলিবা নুপীগী মশক’ প্রোঃ মোইরাংথেম প্রিয়োব্রতনা ‘মালেম অতিয়ানা খুন্নাইদা পীরিবা ঈথিল’, দাঃ ৱাহেংবম কুমারী চনুনা ‘মালেম অতিয়াদা ঊৎলিবা কত্থোকপগী মশক’ অমসুং দাঃ চিরোম রাজ কেতননা ‘অঙাংগী সাহিত্য অমা ওইনা মালেমগী অতিয়া’ হায়বা হীরমশিং অসিদা ৱা ঙাঙখি।
থৌরম অসিগী মনুং চন্না ক্ষেত্রিময়ূম য়াইমা মেমোরিয়েল ত্রাস্তকী মায়কৈদগী লমদমসিগী অইবা অহুম দাঃ য়ূম্নাম মহেন্দ্রকুমার, চিঙাংবম সঙ্গাইজাওবী অমসুং ময়াং লম্বম সুমতিদা কম্বল অমসুং শেলগী খুদোল পীদুনা ইকায়খুম্নবা ঊৎখি।
সোর্স: পোক্নফম
0 কমেন্ট:
কমেন্ট তৌবিয়ু