ক্ষেত্রিময়ুম সুবদনিদা হৈস্নাম বসন্তকুমার এৱার্ড খুৎশিন্নখ্রে
ইম্ফাল, এপ্রিল ২৩ : সাহিত্য থৌপাং লুপনা চহি খুদিংগী লান্থোক্তুনা লাকপা হৈস্নাম বসন্তকুমার এৱার্ড চহি অসিগী ওইনা শক্নাইরবী অইবী ক্ষেত্রিময়ুম সুবদনিদা খুৎশিন্নখ্রে। সাহিত্য থৌপাং লুপ অমসুং অশৈলুপ মণিপুরনা পুন্না খুৎশম্নরগা মণিপুর লেজিসলেটিব এসেমব্লি আর্কাইবস এন্ড ম্যুজিয়ম ওল্ড এসেমব্লিগী ওডিটোরিয়ামদা পাঙথোকখিবা মালেমগী লাইরিক্কী নুমিৎ অমসুং খোংজোম নুমিৎকী ১৩৩ শুবা নিংশিং থৌরমগা লোয়ননা এৱার্ড অসি লান্থোকখিবনি।
এৱার্ড অসি অইবী অসিনা লিটরেচরগী লমদা পীরিবা কন্ট্রিব্যুসন অদুবু শকখঙবা ওইনা খুৎশিন্নবনি। এৱার্ড অসিদা সাইটেসন, লেংয়ান অমদি শেল ওইনা লুপা ১০,০০০ য়াওরি। থৌরমশিং অদুগা লোয়ননা বুক রিভিউ অমসুং পাঙথোকখি। মদুদা ডাক্টর লাইরেনলাকপম ইবেমহল অমসুং নন্দো নিঙোম্বনা ‘মণিপুরী খোরিরোলদা খোংজোম লাল হায়বা লাইরিকসিগী মতাংদা ৱা ঙাংখি। লোয়ননা শক্নাইরবা কবি নহাকপম বিরেননা থৌরম মপু ওইদুনা শৈরেং শৈদিন্নবা অমসু পাঙথোকখি। মদুদা শক্নাইরবা কবিশিংনা লৈবাক নিংবা শৈরেংশিং লান্থোকখি। থৌরম অদুদা মণিপুরী সাহিত্য পরিষদ, ইম্ফালগী প্রেসিদেন্ট লোংজম জয়চন্দ্র অমসুং অশৈলুপ মণিপুরগী প্রেসিডেন্ট দিলীপ ময়েংবমনা মথংশিৎনা চীফ গেষ্ট অমসুং প্রেসিডেন্ট ওইনা শরুক য়াখি।
সাহিত্য থৌপাং লুপকী প্রেসিডেন্ট তোংব্রম অমর্জিৎনা থৌরম অদুগা মরী লৈননা হায়, ৱার্ল্ড বুক ডে অসি কুমজা ১৯৯৫ গী এপ্রিল ২৩ দা হৌদোকখিবনি। নুমিৎ অসি পালন তৌবগী মরম অসি লাইরিক পাবগী হৈনবী অসি মরু ওইনা নহাশিংদা লৈহন্নবনি। লাইরিক হায়বসি খ্বাইদগী লীরবা নোলেজ ফংফমনি। অদুনা সাহিত্য থৌপাং লূপনসু ৱার্ল্ড বুক ডে অসি ২০১৮ দগী পাঙথোক্তুনা লাকই অমদি নুমিৎ অসিদা হৈস্নাম বসন্তকুমার এৱার্ডসু খুৎশিন্নদুনা লাক্লি।
এৱার্ড অসি ডিআইপিআরগী ডাইরেক্টরসু ওইরিবা হৈস্নাম বালকৃষ্ণনা মহাক্কী অপোকপা হৈস্নাম বসন্তকুমারগী মিংদা কৎপনি। এৱার্ড অসি অইবশিংদা মখোয়গী কন্ট্রিব্যুসনদা য়েংলগা ২০১৮ দগী পীদুনা লাকপনি। অহানবা ওইনা ওজা নোংমাইথেম তোম্বীদা এৱার্ড অসি খুৎশিন্নখি। মথং মথং কৈশাম প্রিয়োকুমার, নাওরোইবম ইন্দ্রমনি, চিংথাম জামিনিনচিংবা শক্নাইরবা অইবা কয়াদা খুৎশিন্নখ্রে।
চহি অসিগী ওইনা লৈকোলগী প্রেসিডেন্টসু ওইরিবী অইবী, ফিল্ম মেকার, ফিল্ম প্রডুসর, স্ক্রিপ্ত রাইটারসু ওইরিবী অঙাংগী সাহিত্যদসু খুৎ থারিবী শক্নাইরবী অইবি ক্ষেত্রিময়ুম সুবদনিদা খুৎশিন্নবনি হায়খি।
ৱার্ল্ড বুক ডে অসিদা চহি খুদিংগী য়ুনেস্কোনা পৃথিবীদা লৈরিবা লৈবাকশিংসিগী কেপিটেল সিটি অমমম খনগৎলগা ৱার্ল্ড বুক কেপিটেল হায়না লাউথোকই। মসি লাউথোকপসিদা নিউ দিল্লীসু য়াওখ্রে। হন্দক চহিগী ওইনা এক্রা (ঘানা) য়ুনেস্কোগী ৱার্ল্ড বুক কেপিটেল লাউথোকখ্রে হায়বা ৱাফমসু তোংব্রম অমর্জিৎনা থমখি।
মহাক্না হায়, মীয়ামদা হেন্না লাইরিক পানিংনবা, হৌরক্লিবা নহারোলশিংদা লাইরিক পাবনা অফবা খুন্নাই অমা পুরকপা ঙমগনি অমদি লৈবাক অসিবু লমজিংলগা চৎপা ঙমগনি হায়বগী ৱাখল্লোনদা সাহিত্য থৌপাং লূপনসু নুমিৎ অসি পাঙথোকপনি। নুমিৎ অসিদা সাহিত্য থৌপাং লুপনা অশৈলুপকা খুৎশম্নরগা খোংজোম ডেগী থৌরমসু পাঙথোকপনি। লৈবাক অসিগী ওইনা নুমিৎ অসি য়াম্না মরু ওইবা নুমিৎ অমা ওইবনি। অথৌবশিংদা শৈথাবা শৈরেং শৈদিন্নবা অমগা লোয়ননা পাঙথোকপনি হায়নসু ফোঙদোরকখি।
অমরোমদা বুক ডিজিটাইজেসনগী অচৌবা ওয়েব অমদি লাক্লে। লাইরিকশিং অসি হার্ড কোপিদগী সোফ্ট কোপিদা ডিজিটেল ফোর্মেটতা তৌনরক্লে। লোয়ননা ডিজিটেল লাইব্রেরিগী মুভমেন্ট অমসু লাক্লি। অদুবু লাইরিক ওইনা পায়রগা পাবগি হেভিটতুদি অদু লৈবনিনা অইবাশিংদা য়াম্না চাওবা চৈথেংমক্তি লৈত্রি। অদুবু হোংলক্লিবা পোৎসি খঙনা অইবশিংনসু মসিগী বিনিফিটসি লৌরগা চঙশিনবা মথৌ তাই হায়নসু মহাক্না ফোঙদোকখি।
সোর্স: সঙাই এক্সপ্রেস।
0 কমেন্ট:
কমেন্ট তৌবিয়ু