ৱাংলেম্বম নিরঞ্জনাদা অরাম্বম ইবুংঙোহল এন্দ বিনোদকুমারী লিটরেরি এৱার্দ পীরগনি
ইম্ফাল, ফেব্রুয়ারি ১৯ : পেত্রিওটিক রাইটার্স ফোরাম (পিএদব্লিয়ুএফ), মণিপুরনা চহি খুদিংগী পীদুনা লাক্লিবা অরাম্বম ইবুংঙোহল এন্দ বিনোদকুমারী লিটরেরি এৱার্দ, ২০২২ ৱাংলেম্বম নিরঞ্জনানা ইবা ‘য়েল্লম্মু নুংশিবা’ হায়না মীংথোনবা শৈরেংগী লাইরিক অসিদা পীদুনা ইকাই খুম্নরগনি হায়রি।
লাক্লিবা ফেব্রুয়ারি ২৫ গী নুংথিল পুং ১ তাবদা মণিপুর প্রেস ক্লাবতা পাঙথোক্কদবা অরাম্বম ইবংঙোহল এন্দ বিনোদকুমারী লৈখিদবগী নীংশিং থৌরমদা লেমজনিংঙাই ওইরবা এৱার্দ অসি নহা ওইরিবী অইবী ৱাংলেম্বম নিরঞ্জনাদা খুৎশিন্নগনি।
মশাগী চহি ৩৫ গী মখাদা লৈরিবা মণিপুর অমদি মণিপুরগী ৱাংমদা খুন্দারিবা মণিপুরী লোলগী অইবা/অইবীশিংনা ইবা শৈরেংগী লাইরিক্তা চহি খুদিংগী পীদুনা লাক্লিবা এৱার্দ অসিদা শেল ওইনা লুপা লিশিং ৫, সাইটেসন অমা, সাল অমা অমদি মেমেন্তো অমা য়াওরি।
এৱার্দ অসি ফংলগদবা অইবী ৱাংলৈম্বম নিরঞ্জনা কুমজা ১৯৯৯ গী নভেম্বর ২৪ দা ইম্ফাল ইষ্ট দিস্ট্রিক্টকী মনুং চনবা কোংবা উচেক্কোনদা লৈবা ৱাংলেম্বম জয়ন্তকুমার অমদি ৱাংলেম্বম ওংবী লাইশ্রম নিঙোল জয়মতি দেবী অনিগী মচা অহুমগী মনুংদা অনিশুবীনি। মণিপুর য়ুনিবার্সিটিদা মণিপুরী সাবজেক্টতা মাষ্টার লোইশিল্লবা মতুং হৌজিক হৌজিক ডিএম কলেজ ওফ টিচার এডুকেসনদা বিএত তম্লী।
এৱার্দ পীনবা খনগৎলবা নিরঞ্জনাগী য়েল্লম্মু নুংশিনা হায়না মীংথোনবা শৈরেংগী লাইরিক অসি কুমজা ২০২১ গী মার্চ ২১ দা সাহিত্য থৌপাং লুপকী ফিরাল মখাদা ফোঙখিবা অইবীগী ইহান হান্না খুৎ থাবা লাইরিকনি। লাইরিক অসিদা পুন্না শৈরৈং ৫৪ য়াওরি। মীতৈ ময়েক অমদি বেঙ্গোলি ময়েক অনিমক্তা ফোঙলিবা লাইরিক অসিদা এৱার্দ অসি পীনবগীদমক ফোরামগী এৱার্দ কম্মিটিনা ঙসি মীয়ামদা লাউথোকপনি।
নীংশিংবা য়াবদি, এৱার্দ অসি মমাংদা প্রশুরাম থিংনামচা, ৱাংথোই খুমন, জিতেন ওইনাম, রামেশ্বর শরুংবম, মৈ ভগৎ, রাজু মাইবম, খাংজ্রাকপম কৃষ্ণমোহন, লেনিন খুমনচা, ওকেন্দ্রো খুন্দোংবম অমদি য়ুম্নাম চনু ৱাংলেনথোইবী নচিংবা নহা ওইরিবা/ওইরিবী অইবা/ অইবীশিং অসিনা ফংখ্রে।
এৱার্দ অসি অরাম্বম ইবুংঙোহল অমদি বিনোদকুমারীগী মচানুপী অরাম্বম মেমে অমদি মহাক্কী মপুরোইবা লৈখিদ্রবা ডাক্তার নামরাম শরতনা হিংলিঙৈ মতমদ পিএদব্লিয়ুএফ, মণিপুরদা কৎলকপনি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু