সোবিতা মাইবমদা মাদার তেরেসা নেসনেল এৱার্দ অমদি ডা. অম্বেদকর ফেল্লোশিপ এৱার্দ পীরক্লে
ইম্ফাল, মার্চ ২৬ : দলিট সাহিত্য একাদেমী মণিপুর, ইন্দিয়াগী ১২ শুবা মপোক কুমওন থৌরম ঙরাং আসামগী গুৱাহাতিদা পাঙথোকখিবগা লোয়ননা লৈপাকসিগী থোইদোক হেন্দোক্না কত্থোকপগা লোয়ননা মীয়ামগীদমক থবক তৌরিবা মীওইশিংদা লেমজনিংঙাই ওইরবা নেসনেল অমদি ইন্টারনেসনেল এৱার্দশিং খুৎশিন্নদুনা ঈকায় খুম্নবা উৎলকপদা মণিপুরদগী সোবিতা মাইবমসু য়াওরক্লে।
ঙরাং পাঙথোকখিবা একাদেমী অসিগী চীং লেম্লবা মপোক কুমওনগী থৌরম অদুদা সোবিতা মাইবমদা ডা. অম্বেদকর ফেল্লোশিপ নেসনেল এৱার্দ ২০২২ অমদি মাদার তেরেসা নেসনেল এৱার্দ ২০২৩ পীদুনা ঈকায় খুম্নখি। সোবিতা মাইবমদা হ্যুমেনিটি সার্ভিসকী লমদা কত্থোকপগা লোয়ননা হোৎনরক্লিবা শীংথানিংঙাই ওইবা থবক থৌরম কয়াবু শকখঙলদুনা লেমজনিংঙাই ওইরবা এৱার্দশিং অসি পীদুনা ঈকায় খুম্নখিবনি।
এৱার্দশিং অসি ফংলবী সোবিতা মাইবম কুমজা ১৯৭৩ গী সেপ্টেম্বর ১৬ তা থৌবাল নোঙাংখোং বামোন লৈরক্তা লৈবা ৱাইখোম ইবোপিশক অমদি ৱাইখোম ওংবী মঞ্জুরি অনীগী মচা নুপী ওইনা তাইবংদা খোঙদারকখি। কুমজা ১৯৯৪ দা ৱাংজিং বাজার থোং ৱাংমদা লৈবা মাইবম প্রেমকুমারগা য়ুম্বাল লম্বীদা খোঙদাদুনা মচানুপা অমা অমদি মচানুপী অনীগী মমা ওইরবী সোবিতা মাইবম হৌজিক হৌজিক মণিপুরদা মীওইবা খুন্নাইনা অৱা-অনা হেক তারকপা মতমদা মতেং পাংনবগী ৱাখল্লোন্দা লিংখৎখিবা লাইক মাইন্দেদ গ্রুপ ( এল এম জি), মণিপুরগী অচঙবা থৌমী অমসু ওইরি। মসিগীসু মথক্তা লৈমরেম্বী ওল্ড এজ হোম, সোসল রিফোর্মস রি-ওর্গানাইজেসন থৌবাল দিষ্ট্রিক্ট, ৱাংজিং বাজার কো-ওপারেটিভ সোসাইটিগী সেক্রেটারি ওইনা মীয়ামগীদমক কত্থোকপগা লোয়ননা থবক তৌরি।
সোবিতা মাইবমনা শাংলবা চহী ২০গী মথক্তা তৌরকখিবা শীংথানিংঙাই ওইরবা থবক থৌরম কয়াবু শকখঙলদুনা অসিগুম্বা এৱার্দশিং পীরকপদা হরাও নুংঙাইবসু ফোঙদোরক্লি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু