সাহিত্য একাদেমি এৱার্দ লাউথোকপদা দাঃ হাওবম নলিনী য়াওরে
ইম্ফাল, মার্চ ১৬ঃ সাহিত্য একাদেমিনা লৈবাক অসিগী অইবা-অইবীশিংদা লান্থোকপা লেমজনিংঙাই ওইরবা সাহিত্য একাদেমি এৱার্দ, ২০২৫ ফংলগদবশিং লাউথোকপদা মণিপুরী লোলগী ওইনা দাঃ হাওবম নলিনী দেবী য়াওরে। ঙসি লাউথোকখিবা সাহিত্য একাদেমি এৱার্দ, ২০২৫ ফংলবা লৈবাক অসিগী অইবা-অইবীশিং অদু একাদেমি অসিনা শকখঙলবা লোল ২৪ দা মখোয়না ফোঙখিবা তোঙান-তোঙানবা লাইরিকশিং দা য়ূম্ফম ওইরগা খনগৎলকখিবনি। মসিগী মনুংদা মণিপুরী লোলগী ওইনা দাঃ হাওবম নলিনী দেবীবু মহাক্কী 'কংলমদ্রিবা ঈফুৎ' হায়না মিং থোনবা ৱারী মচাগী লাইরিক অসিদা খনগৎলকখিবনি। সাহিত্য একাদেমি এৱার্দ, ২০২৫ গী মণিপুরী লোনগী ওইনা প্রোফেসার ঐচ ননিকুমার সিংহ, ইরুংবম বসন্ত সিংহ অমসুং দাঃ মংশাতাবম তুলেশ্বরী দেবীনা জুরি মেম্বরশিং ওইখি।
সাহিত্য একাদেমিগী সেক্রেতরি পল্লবি প্রসান্ত হোলকরনা থাদোরকপা চেরোল অসিনা হায়, সাহিত্য একাদেমি এৱার্দ, ২০২৫ লৈবাক অসিগী তোঙান-তোঙানবা শকখঙলবা লোল ২৪ দা ফোঙবা লাইরিক্কী অইবা অমদি অইবীশিংদা লান্থোক্লগনি। মনা অসিগীদমক খল্লবা অইবা-অইবীশিং গী লাইরিকশিংদা পোইত্রি ৮, নোবেল ৪, শোর্ত স্তোরি ৬, এসে ২, লিতরেরি ক্রিতিসিজম ১, ওতো বাইওগ্রাফি ১ অমসুং মেমোইর্স ২ য়াওরি।
মণিপুরী লোনগী ওইনা সাহিত্য একাদেমি এৱার্দ, ২০২৫ ফংলগদবী দাঃ হাওবম নলিনি দেবী ইম্ফাল ৱেস্তকী কাংঙবম লৈকায়দা ইং ১৯৫৬ তা পোকই। অপোকপা অমদি অপোকপীগী মিংনা মথংশিৎনা হাওবম ইবুঙোতোম্বী সিংহ অমসুং হাওবম ওংবী শখিতোম্বী দেবী কৌই। অপোকপা-অপোকপী অনীমক লৈখিদ্রে।
থোংজু পার্ত-২, কাঞ্চিপুরদা লৈবা দাঃ খাইদেম জয়চন্দ্রগা যূম্বাল পুন্সি খোঙদাদুনা মচানুপা ১ অমদি মচানুপী ১ লৈরে। মহৈগী থাক্না এম এম মণিপুরী অমদি পি ঐচ দিনি। দি এম কলেজ ওব তিচর্স এদুকেসনদা এসোসিএত প্রোফেসার ওইনা থবক্তগী পোত্থাখি।
দাঃ হাওবম নলিনী দেবী
অইবী অসিগী ফোঙখ্রবা লাইরিকশিংগী মনুংদা মীতৈ ময়েক্তগী বেঙ্গোলিদা ইথোকপা সনামনিক (১৯৮৫), বেঙ্গোলিদগী মীতে ময়েক্তা ইথোকপা সনামনিক (২০০১), ঙসিদি শক্লিংলক্লে ইমা (শৈরেং), কফিউ অহীং (ৱারী মচা), কংলমদ্রিবা ঈফুৎ (ৱারীমচা), ময়ায় চনবা যুগতা হিন্দু ধর্ম্মগী ঈথিল, হে লমকোয়বা (শৈরেং), নুংশিথোইবা (শৈরেং), চিরুগী খুনুং ঈশৈ অমসুং পুন কংনানবী অমদি অতৈ দ্রামাশিং হায়রিবশিং অসি পনবা য়াই।
অইবী অসি য়েন্দ্রেম্বম সুরলতা পুরস্কার এৱার্দ-২০২০, রাজকুমার মহাবীরসনা নীংশিং খোরিরোল মনা-২০২২, দিনেশ্বরী সাহিত্য মনা-২০২২ অমসুং দাঃ যামিনি দেবী এৱার্দ-২০২২ অসিনচিংবা মনাশিং অসি পীদুনা ইকায় খুম্নখ্রে। 'সনামনিক' অমদি 'ময়ায় চনবা যুগতা হিন্দু ধর্ম্মগী ঈথিল' হায়রিবা লাইরিক ২ অসি হৌজিক-হৌজিক মণিপুর য়ুনিবর্সিতি, মণিপুর য়ুনিবর্সিতি ওব কলচর, দি এম য়ুনিবর্সিতি অমসুং আসাম য়ুনিবর্সিতিদা তেক্সবুক অমদি রিফরেন্স বুক ওইনা মহৈরোয়শিংনা তম্নরি।
সোর্স - পোক্নফম
0 কমেন্ট:
কমেন্ট তৌবিয়ু