নুমিৎ নীনি চখগদবা 'মীত দ ওথর্স' ঙসিদগী হৌদোকখ্রে
ইম্ফাল, মার্চ ১৫ঃ চীফ মিনিস্তরগী আর্তিস্তশিংগী তেঙবাং (সি এম এ তি) গী মীৎয়েং মখাদা প্রোগ্রেসিব রাইতর্স এসোসিএসন (পি দরিয়ু এ), মণিপুরনা শীন্দুনা নুমিৎ নীনি চখগদবা 'মীত দ ওথর্স' ঙসি মণিপুর প্রেস ক্লবকী লোক্তাক হোলদা হৌদোকখ্রে।
থৌরম অদুদা আর্ত এন্দ কলচর, গবর্নমেন্ত ওব মণিপুরগী জোইন্ত দিরেক্তর জি ধর্মদাস শর্ম্মনা চীফ গেস্ত অমদি পি দব্লিউ এ মণিপুরগী প্রসিদেন্ত ইবোসনা খুমন্না প্রসিদেন্ত অমসুং সাহিত্য একাদেমী এৱার্দি অইবা বি এম মাইস্নাম্বা, ওরিএন্তেল কলেজগী এসিস্তেন্ত প্রোফেসার দাঃ সরাংথেম সোভারানী দেবী অমসুং রিসার্ছ স্কোলার চনম্বম শর্মিলা দেবী অনীনা মোদরেতর ওইনা শরুক য়াখি।
হীরম অসিগা মরী লৈননা পি দব্লিউ এ মণিপুরগী একজিক্যুতিব মেম্বর রন্ধিরকুমার য়েন্দ্রেস্বমনা হায়, অইবা অমগী নোবেল, দ্রামা, ৱারীমচা, শৈরেং নৎত্রগা ৱারেং অদুদা অপাবশিংনা শুমহৎখিদুনা অইবা অদুগা উননিংলকপা অমদি অইবদুগী মরমদা খঙনিংলকপা অসি নৈনরিবা অমদি অপাবগী মফমদা তত্তনা থোক্লিবা থৌদৌক অমনি। অপাবগা অইবগা উনবা হায়বসিমক য়াম্না নুংঙাইবা মীকূপ অমা ওইবদা নৎতনা পাক্কা হেক্তা ফংদবা অমসুনি। অসুন্না অইবা অদুগা হকথেংননা উনবা অসিমকসু য়াম্না নুংঙাইরবা তাঙলবা লাইবক ফবা মীকূপ অমনি। মসিদগী অপাবা অমসুং অইবা অনীমক্তা ইন্সপিরেসন ফংই। মসি খল্লগা প্রোগ্রেসিব রাইতর্স এসোসিএসন্না থৌরম অসি শীঞ্জবনি হায়না ফোঙদোকখি।
সোর্স - পোক্নফম
0 কমেন্ট:
কমেন্ট তৌবিয়ু