সঙ্গীত নাতক এৱার্দি যদুমণি লৈখিদবদা অৱাবা ফোঙদোকখ্রে
ইম্ফাল, নভেম্বর ১০ : সঙ্গীত নাতক একাদেমি এৱার্দি অমসুং সাহিত্য একাদেমি দিল্লীগী বাল সাহিত্য পুরস্কর ২০২১ পীদুনা ইকায়খুম্নখ্রবা নিঙোম্বম যদুমণি সিংহ, থাংমৈবন্দ লাইরেনহঞ্জবা লৈকায়দা লৈবনা মশাগী অনাবা অমনা মরম ওইদুনা খঙহৌদনা লৈখিদবা মণিপুরী লিতরেরি সোসাইতি অমসুং হুয়েন লাল্লোং মণিপুর থাঙ-তা কলচারেল এসোসিএসন্না অৱাবা ফোঙদোকখ্রে। মণিপুরী লিতরেরি সোসাইতিনা শীন্দুনা ঙসি সোসাইতি অসিগী প্রেসিদেন্ত নাওরেম লোকেশ্বর সিংহনা থৌরম মপূ ওইদুনা নিঙোম্বম যদুমণি লৈখিদবদা অৱাবা ফোঙদোকপগী মীফম অমা পাঙথোকখি।
যদুমণিনা মণিপুরী সাহিত্যবু থৱায় য়াওনা নুংশিজবা মীশক অমা ওইনা মণিপুরী লোল অমসুং খোরিরোলবু চাওখৎনবা অমসুং মণিপুরী দ্রামাবু চাওখৎনবা হোৎনবদা অঙম্বা থৌদাং কত্থোকপগা লোয়ননা লৌরমখি। মহাক্না লৈখিদবা অসি মণিপুরী খোরিরোল অমসুং মণিপুরী দ্রামাগী মহুৎ শিনবা ঙম্লরোইদবা মাঙজবা অমনি হায়না ফোঙদোক্নখি।
মণিপুরী লিতরেরি সোসাইতিগী মেম্বরশিংনা মহাক্না খঙহৌদনা লৈখিদবদা মিনিত অনী তুমিন্না লৈদুনা অৱাবা ফোঙদোকপগা লোয়ননা মহাক্কী থৱায়না তাইবঙ মপূগী খুয়াদা ঈংনা চিক্না লৈরুনবা থৌনিখিবগা লোয়নন লৈখিদ্রবগী ইমুং মনুংগী অৱাবদসু সোসাইতিগী মেম্বরশিংনা শরুক য়ারি হায়রি।
অমরোমদা, হুয়েন লাল্লোং মণিপুর থাঙ-তা কলচরেল এসোসিএসন ইরিলবুংগী হোলদা এন যদুমণি সিংহনা লৈখিদবদা ঙসি এসোসিএসনগী ওজা, মহৈরোয়শিং, স্তাফশিংগা লোয়ননা অৱাবা ফোঙদোকপগী মীফম অমা পাঙথোকখ্রে।
পদ্মশ্রি এৱার্দি কে সনাথোইবা শর্ম্মানা ময়াই তাংবল লৌদুনা পাঙথোকখিবা মীফম অদুদা এসোসিএসনগী থবক থৌরম খুদীংদা শরুক য়াবতা নত্তনা অচৌবা থৌদাং কয়া য়ারম্বা, মণিপুর কলচর, থিএতর, দ্রামা অমদি থাঙ-তাবু মারেমগী মফম খুদীংদা মশক তাকপদা অচৌবা থৌদাং কয়া লৌরম্বা অদুবু শিংথানখি। লৈখিদ্রবগী থৱায়না মপুগী লৈকোলদা ঈংনা চিক্না লৈরুনবা মিনিত ২ তুমিন্না লেপ্তুনা মপুগী মফমদা থৌনিখি হায়রি।
সোর্স: পোক্নফম
0 কমেন্ট:
কমেন্ট তৌবিয়ু