সঙাই ফেষ্টিভেলদা টুরিজম চাউখৎহনবা খক্তা নত্তনা কালচারশু চাউখৎনবা হোৎনরি
ইম্ফাল, ডিসেম্বর ০৩ : হন্দক মণিপুর লৈঙাক্না শীন্দুনা নভেম্বর ২১দগী ৩০ ফাওবা নুমীৎ ১০নি চুপ্না চত্থখিবা ১১রকশুবা মণিপুর সঙাই ফেষ্টিভেলদা তোপ-তোপ্পা নাৎকী ওইবা মশক উবা ফংই। কুহ্মৈ অসিদা টুরিজম চাউখৎনবা খক্তা নত্তনা স্পোর্টস মরু ওইনা শগোল কাংজৈ, য়ুবী লাকপী, কাং, চৈবী, থাঙ-তা, মুক্না অমদি অরাম্বাই লংবনচিংবা কয়া পাঙথোকখি। অদুগা কালচারেলদা তোঙান তোঙানবা ত্রাইবশিংগী জগোয়শিং, মীতৈশিংগী মাইবী লাইচিং জগোয়, লাইবৌ জগোয়, খম্বা-থোইবী জগোয়, লৌরোক জগোয়, পুঙ-চোলোম, খুনুং ঈশৈনচিংবা উৎতুনা মপানগী লম কোয়বা লাকপশিংগী মীৎয়েং চিংশিনবা হায়রিবশিং অসি মুথৎতনা থম্লবদি ঐখোয়গী ইপা-ইপুনা থম্বীরম্বা তাঙলবা লন কয়া অসি কনবা ঙমগনি।
লৈঙাক্না পাঙথোক্লিবা সঙাই ফেষ্টিভেল অসিবু চহী খূদিংগী লেপ্তনা পাঙথোকপা ঙম্বা ওইবীয়ু। কূহ্মৈ অসিগীদমক থাগৎপসু ফোঙদোকচরি হায়না য়ুনাইটেদ কম্মিটি মণিপুর (য়ু সী এম) গী প্রেসিদেন্ট জয়চন্দ্র কোন্থৌজমনা ফোঙদোকখ্রে হায়না য়ু সী এমগী সেক্রেটারি আই পি আর লৈশেম্বা লমাবগী চেরোল অমনা ফোঙদোরক্লি।
ওক্রম মমাঙ লৈকায় কম্ম্যুনিটি হোলদা ৱান দে ফার্মারস ট্রেনিং প্রোগ্রামগী মনুং চন্না পাঙথোকখিবা থৌরম অদুদা চীফ গেষ্ট ওইনা থৌবাল এম সীগী এক্স-কাউন্সিল্লার ওক্রম ইনাওতোম্বী, প্রেসিদেন্ট ওইনা য়ু সী এমগী প্রেসিদেন্ট জয়চন্দ্র কোন্থৌজম অমদি গেষ্ট ওব ওনার ওইনা ওক্রম য়ুথ ক্লাবকী এদভাইজর য়াংলেম চাওবা, ইপসা থৌবাল ব্রাঞ্চকী প্রেসিদেন্ট বিশ্বর্জিৎ অকোইজম অমদি ওক্রম য়ুত ক্লাবকী এদভাইজর সিঙ্গাম নিংথৌনা মথংশিৎনা প্রেসিদিয়াম মেম্বার ওইনা শরুক য়াখি। লোয়ননা রিছার্স পার্সন ওইনা রিটায়ার্দ এস এম এস কে ভি কে থৌবাল সগোলশেম সুমঙ্গোল অমসুং বি টি এম আত্মা বিষ্ণুপুর সামোম বিদ্যালক্ষীনা শরুক য়াখি।
থৌরম অদুদা য়ু সী এমগী প্রেসিদেন্ট জয়চন্দ্র কোন্থৌজমনা মখা তানা ফোঙদোকখিবদা, ঐখোয়গী মণিপুর অসি ফুরুপ কয়ানা খুন্দাবা লমদমনি। ফুরুপকী খূদিংমক্কী চৎনরোল, নাৎকী ওইবা, কালচারগী ওইবা অমদি কষ্টমরি লো ময়েক শেংনা লৈজরি। মৈহৌরোলদগী লৈরক্লবা ফজখ্রবা চৎন-কাঙলোনশিং মাঙথরক্লিবসি কন্নবা হোৎনমিন্নসি হায়খি হায়রি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু