শক্নায়রবা অইবা ওইনাম তুনান (চনা লুখোই) লৈখিদ্রে
ইম্ফাল, দিসেম্বর ২৯: শক্নায়রবা অইবা অমসুং মীতৈ পুয়াগী ৱারী লিবা থোইদোক্না মীয়াম্না ‘চনা লুখোই’ হায়রগসু খঙনবা ওইনাম তুনান ঙসি লৈখিদ্রে। মহাক্না লৈখিদবা মতমদা মশাগী চহী ৭৪ শুখ্রে। মশাগী অনাবা অমদগী ইম্ফালগী নোর্থ এ ও সিদা লৈবা রাজ মেদিসিতিদা চয়োল অমা হেন্না লায়কন্নরম্লগা পুথরক্লবা মতুং মশাগী য়ূমদা ঙসি অয়ূক লৈখিদবনি হায়রি।
লৈখিদ্রবা ওইনাম তুনান (চনা লুখোই), ইং ১৯৫০ গী এপ্রিল ১০ দা ইম্ফাল ইস্ত দিস্ত্রিক্তকী মনুং চনবা চনা হায়রিবা খুঙ্গং অসিদা পোকই। অপোকপগী মিংনা লৈখিদ্রবা ওইনাম মণি অদুগা অপোকপীগী মিংনা ইরুংবম নিংঙোল অমু লৈমা কৌই। মশাগী চহী ১২ রোমতা ঙায়রিঙৈ মতমদগী হৌনা মীতৈ পুয়া ৱারী লিবদা মীয়াম্না খঙনবা হৌরকখি।
পুন্সিগী অঙনবা শরুক্তা কংলৈখোন অমদি খোল্লাওনচিংবদা পাউমী ওইনা হৌরকখি। লোয়ননা তোঙান-তোঙানবা পাউ-চেশিংদা কলমনিস্ত ওইনসু লৈরমখি।
শুমাঙ লীলা ইবা হৌরকপদগী মীয়াম্না মহাকপু ‘চনা লুখোই’ হায়দুনা শকখঙনরকখিবনি। মহাক্না হিংলিঙৈদা শুমাঙ লীলা ১৫০ গী মথক্তা ইরমখি। মহাক্না ইরম্বা লীলাশিংগী মনুংদা ‘ঈগী নোং’, কৈশামথোং থোইবী’, ‘চায়নপূং’ ‘নোংঙানখিদ্রবা অহিং’, ‘শজিবুগী নোং লৈ’, ‘খেবা চীংগী নাপোমদা’, ‘ইপাম মৈহৌরে’, ‘হিংবগী দাবী’, ‘কৈদৌঙৈ হিংগনি’, ‘অহিংনা ঙায়রি,’ ‘য়োৎকী কোলু’, ‘মিস শঙবান্নবী’, ‘কংলৈপাক্তা ১৭০৯’ অমসুং ‘লব ২০০০’ হায়রিবশিং অসি পনবা য়াই।
মহাক্কী লাইরিক ওইনা ফোঙখ্রবশিংগী মরক্তা ‘চরৈ হুইমদোন লৈমা’, ‘ঈগী নোং’, ‘সনাপাৎকী থারীকথা’, ‘চনিং লাইরেম্বী’, ‘হোতেল বোই’, ‘নুপী লালদা থৌনা ফবীশিং’. ‘শক্নায়বা তরানিথোই’, ‘তাইবঙ ইপাক লাল্লমদাই’ নচিংবা লাইরিকশিং পনবা য়াই।
মহাক্না ইরম্বশিংদা ফিল্ম ওইনা পুথোকখ্রবশিংনা ‘কৈশামথোং থোইবী’, ‘নুংশিবী অহিং’, ‘পাচা’, ‘সেকমাই তুরেল’, ‘লৈইসিগী ৱাংমদা’, ‘বোরা উচী’, অমসুং ‘খোমলাং লমন’ অসিনচিংবনি। মসিদা নৎতনা রেদিও লীলা কয়াসু ইরম্মী। মসিগী মনুংদা ওল ইন্দিয়া রেদিও, ইম্ফালদা পরী নাইনা শন্দোকখিবা ‘ঐখোয়গী ইচে’ পনবা য়াই।
অইবা অমা ওইরম্বদা নৎতনা সনামহি লাইনিংবু য়োকখৎবা হোৎনবদসু অচৌবা থৌদাং কয়াসু লৌরমখি। বাংলাদেশ, ম্যান্মা য়াওনা অতোপ্পা মীতৈ তাবা মফমশিংদা কোয়না চৎলগা মীতৈ লাইনিং হিংগৎহন্নবা হোৎনরমখি। মহাক মণিপুর য়ুনিবর্সিতি ওব কলচর লিংখৎনবা হোৎনবদা অচৌবা থৌদাং লৌখিবা মীশক অমসুনি। লোয়ননা য়ুনিবর্সিতি অসিগী ফেকলতি মেম্বার ওইনসু লৈরমখি। মহাক কংলা ফোর্ত বোর্দকী রিলিজিয়স কমিতিগী মেম্বার ওইরম্বদা নৎতনা দি দি কে ইম্ফাল অমসুং ওল ইন্দিয়া রেদিও ইম্ফালনা এপ্রুব তৌরবা মীতৈ পুয়াগী ৱারী লিবা অমসুনি।
থোইদোক্না অইবা অমা ওইনা শুমাঙ লীলাগী অথোয়-অহেন চাংম্নবদা বেস্ত স্কৃপ্তকী মনা ১৮ লক অদুগা সেকেন্দ বেস্ত স্কৃপ্তকী মনানা ৯ লক ফংখ্রে। লোয়ননা মণিপুর দিবলপমেন্ত ত্রস্ত, বাংলাদেশ ‘ঐখোয়গী পন্থৌ’ অদুগা আসাম মহিলা সমিতিনা ‘ঐখোয়গী পিবারেল’ হায়বা মিংথোন পীদুনা ইকায় খুম্নখি।
শুমাঙ লীলা ইবশিংদা অখন্নবা পীবা আই কে এ এম এৱার্দ, মীতৈ নেসনেল ফ্রন্ত, কংলৈপাক্না পীবা চীংমী-তম্মী নুংশি খূদোল মনা’, মণিপুর সাহিত্য পরিষদকী ‘খুমন্থেম কাওমচা নীংশিং সনাগী তকমান’, মণিপুর স্তেত শুমাঙ লীলা কাউন্সিলনা পীবা ‘নোংথোম্বম বিরেন্দ্রজিৎ এৱার্দ অমসুং ইবোয়াইমা শুমাঙ লীলা এৱার্দ হায়রিবশিং অসিসু ফংখ্রে।
অমরোমদা, শক্নায়রবা অইবা অমদি মীতৈ পুয়াগী ৱারী লিবা ওইনাম তুনান (চনা লুখোই) না লৈখিদবদা মহৈরোয় লূপ মণিপুরী স্তুদেন্তস ফেদরেসন (এম এস এফ), পেত্রিওটিক রাইতর্স ফোরম, মণিপুর, ৱাখল্লোন মান্নবা অপূনবা (ৱামা), কংলৈপাক অমসুং অরাম্বাই তেঙ্গোলগী মায়কৈদগী থম্মোয় শোক্না নুংঙাইতবা অমদি অৱাবা ফোঙদোক্নরকপগা লোয়ননা ইমুং-মনুংগী অৱাবদা শরুক য়ারি হায়না চেরোল থাদোক্নরক্লি।
সোর্স: পোক্নফম
0 কমেন্ট:
কমেন্ট তৌবিয়ু