• 834
• ১১ই ডিসেম্বর ২০২২ ইং
• Share on:

লৈকোলনা এম কে বিনোদিনিগী নীংশিং কুমওন থৌরম পাঙথোকখ্রে

ইম্ফাল, দিসেম্বর ১০ :মহারাজকুমারী বিনোদিনিগী চী ১০০ শুবগী ১১রকশুবা নীংশিং থৌরম লৈমরোল খোর্জৈকোল (লৈকোল) না শীন্দুনা চিঙ্গাংবম সঙ্গাইজাওবী অমদি অৱাং মায়কৈগী লৈকোলগী অইবীশিংগী স্পোন্সর মখাদা চঙাঙ্গৈদা লৈবা দিব্যা জ্যোতি আশ্রমদা পাঙথোকখ্রে। ঙসিগী থৌরম অসিদা এম কে বিনোদিনিগী মফমদা হৈকৎ লৈকৎ তমদুনা ঈকায় খুম্নবা উৎপগা লোয়ননা অইবা-অইবীশিংগী শৈরেং শৈদিন্নবগী থৌরমসু পাঙথোকখ্রে।

থৌরম অসিদা অথোইবা মীথুংলেন ওইখিবা হান্নগী মণিপুর ষ্টেট উইমেন কম্মিসনগী চেয়ারপার্সন ডা. চোংথাম যামিনিনা হায়খি, নুপীগী ইম্পৱারমেন্ট হায়বসিদা নুপীনা সনা য়াম্না শিবা, ফি ফজবা শেৎপদু নত্তে। নুপীশিংদা লৈরিবা মতিক ময়াই কয়াদু ফোঙদোকপা অমদি মতিং ফুদোকপা অদুবুনি। নুপীশিংগী হৌজিক উইমেন ইম্পৱারমেন্ট লৈরে হায়রগসু অমম অথেংবদা চৎপদা নুপীদুনা কিবা ফাওদ্রগসু নুপাশিংগী মীৎয়েংদা তোঙাল্লি। অদুনা নুপীশিংদা লৈরিবা মীৎয়েং অসি হান্না হোংদোকপা চঙই। লোয়ননা নুপাশিংগী য়াম্না মরুওইবা মীৎয়েং অমসুং ৱাখল্লোনসিনি।

হৌজিক্কি চরাংনরবা মতম অসিদা নুপীগী মতাংদা য়াম্না নৈনজবনি। ইমা কৈথেলদা য়েংলুরবসু নুপীনা লোইনা থাকপা, পাংবা ঙাক্তনি। অদুনা নুপীশিংগী ওইবদা খরদি ইম্পৱারমেন্ট হায়বসি নুপাশিংসু পীবীগদবনি হায়খি। প্রেসিদেন্ট কে এস ঐচ সুবদনিনা হায়খি, লৈকোলগী ওইবা লম অমা হায়বসি লৈঙাক্না পীগদবা লৈতবা মরম্না হৌজিক লৈকোলগী লম লৈনবা কন্না হোৎনরগনি। লৈকোলগী লম লৈরবা মতমদা ইমাসি বিনোদিনি অমসুং খাইদেম প্রমোদিনিগী মীতম শাগনি। মসিদা লৈকোলগী মেম্বারশিংনা খায়ননবগীদমক্তা হোৎনমিন্নরসি।

মীথুং ওইখিবা এম য়ুগী স্কুল ওফ হ্যুমেনিটিজ গী দিন প্রোফেসর নহাকপম অরুনানা হায়খি, ইমাসিদ থবক্তা অমসুং পুন্সিদা য়েংলবসু খঙজিনবা য়াবা ঙাক্তনি। চুড়াচান্দ নিংথৌ অমসুং ঙাংবী মহারানিগী মচানি হায়রগসু অইবী ওইবদা কোনুংগী মমি তাদবা অইবীনি। নুংগাইরক্তা চন্দ্রমুখি হায়বা লাইরিক অসিদা কোনুংগী য়াওদে শুপ্নগী মীনাই ওইনা লাকখিবা পুন্সি অমদা য়ুম্ফম ওইরগা ইবনি। ময়ুম থাদোক্তুনা অৱা-অনা কয়া থাদোক্তুনা লাকখ্রগসু হান্না চুখিবা কয়াদুদি কোকপা নত্তে লম্বোইবগী ফিজেৎতুনি শেৎলিবসি চুখিবদুদি কোকউ য়াদবা থেংনবগী ৱারিনী।

বর সাহেব ওংবী সনাতোম্বী হায়রিবা লাইরিকসি ফজদবা অমনি হায়না লোৎশিন্নরম্বনি। অদুবু হৌজিক্তি মণিপুর য়ুনিভার্সিটিদা এম এদা টেক্স ওইনা তম্লে। মতমদুদসু ইবদা ইরুনু মীনা পানিংলোই, ৱারী তানিংদবা ঙাক্তনি হায়রগসু অইবী অমগী মনিং তম্বদা ইখিবনি। অদুবু অইবীনা উরিবা মীৎয়েং অসিদি পুৱারীসু ওইরগদবা সনাতোম্বীদুদি নত্তে হায়খি।

সোর্স: হুইয়েন লানপাউ...