ময়েককি য়েৎনবা তোকসি, ঈপা-ঈপুনা থম্বীরম্বদু চৎহনসি
ইম্ফাল, এপ্রিল ১৩ : মালেমগী লৈবাকশিংগী মনুংদা পীকখ্রবা মৈতৈ/মীতৈ জাতিগী ইপা ইপুশিংনা থম্বীরম্বা লোন ময়েককী মতাংদা ঐখোয় মশেল য়েৎনবা তোক্তুনা লোন ময়েক অসিগী মতাংদা পুন্না ফম্মিন্নদুনা হেন্না চাওখৎহন্নবা হোৎনসি হায়না সুগনু এসেমব্লী কন্সটিটুয়েন্সিগী এমএলএ কে রঞ্জিৎনা ফোঙদোকখ্রে।
ঙসি আসামগী হাইলাকান্দি দিষ্ট্রিক্টকি লাইশ্রম খুনগী অহন ১২ অপোকপা মরুপ হাউনশঙ অমসুং ককচিং খুনৌ তোকপচীংদা লৈবা খা পানা লাইনিংথৌ থৌগল্লুপ অনিনা খুৎশম্নদুনা লাই খুন্দিন্নবা লুপনা ককচিং খুনৌদা লৈবা ইবুধৌ খম্লাংবগী মশাইগোন কম্ম্যুনিটি হোলদা মৈতৈ/মীতৈশিংনা হিন্দু লাইনিং চৎলুরবা তুংদা ইপা ইপুনা থম্বীরম্বা লাইনিংদা অমুক হঞ্জিল্লকখিবা নুমিৎকী চহী ৯৩ শুবা নিংশিংবগী পালন থৌরম পাঙথোকখ্রে।
ঙসিগী থৌরম অদুদা চীফ গেষ্টকি ৱারোল পীরদুনা সুগনু এসেমব্লী কন্সটিটুয়েন্সিগী এমএলএ কে রঞ্জিৎনা হায়, হৌখ্রবা ইপা ইপুশিংনা চৎনরম্বা লাইনিংবু অমুক হন্না চৎনবা হৌখিবা নুমিৎ অসি য়াম্না মরুওইবা নুমিৎনি, আসামগী হাইলাকান্দিদগী মৈতৈ ইপা ইপু কয়ানা মৈতৈ ইপা ইপুগী লাইনিং লিচৎপু য়োকখৎনবা লাক্তুনা শরুক য়ারিবা অসি থাগৎলি।
মৈতৈ জাতিদা অনি থোকপগী চৎনবী অসি য়ারিবমখৈ লৈহন্দনবা হোৎনমিন্নসি হায়বা ৱাফম থম্নদুনা এমএলএনা হায়, চহী লিশিং কয়াগী ইতিহাস লৈবা মৈতৈ জাতিনি। ঙসিদগী চহী ৩০০ রোমগী মমাং ১৭২৯ দা মতম অদুগী লৈবাক অসিগী নিংথৌ পামহৈবা নিংথৌগী মতমদা লমদম অসিগী লাইগী মশক ওইরবা পুয়া লাইরিক কয়া মৈ থাদুনা মাঙহনখি অমদি পুয়া ১২০ রোম মৈ থাবা অদুদা য়াওখি হায়বগী রেকোর্দ লৈরি হায়না পল্লদুনা এমএলএনা হায়, মমিং খঙদবা পুয়া কয়াসু মৈ থাবা অদুদা য়াওখি।
ইপা ইপুগী হৌরকফম, লম্মিৎ-তুমিৎ তাকপা লাইরিক, খুন্নাইগী চৎন কাংলোন, লাইনিং লাইশোলগী ৱারী তাকপা লাইরিক, নিংথৌরেলগী ৱারী, ময়েককী লাইরিক্নচিংবা য়াওনা তাংলবা লমদম অসিগী চৎন কাংলোন কয়া তাকপা পুয়া লাইরিক কয়া মৈ থাবা অদুদা য়াওখি হায়না এমএলএনা নুংঙাইতবা ফোঙদোকখি।
ইপুনা চৎলম্বা লীচৎ অদু মতম খরা মাঙলুরবা তুঙদা অমুক হঞ্জিনবা হৌরকখিবা নুমিৎ অসি য়াম্না মরুওইবা নুমিৎনি হায়না পল্লদুনা এমএলএনা হায়, মণিপুরদা খৃষ্টান অমুসং ইসলাম লাইনিং লাক্ত্রিঙৈ মমাং চহী কয়াগী মমাংদা মৈতৈ লাইনং অসি লমদম অসিদা লৈরকখি।
মালেমদা হৌজিক লোন ১৬৫২ রোম ঙাংনরি, মসি নত্তবা লোন কয়াসু লৈরি হায়না পল্রদুনা এমএলএনা হায়, মণিপুর নত্তনা অৱাং নোংপোক লমদমগী অতৈ ষ্টেটশিংগী মনুংদা ঙাংনরিবা লোনশিংগী মনুঙদা বেঙ্গলি ময়েক নত্তবা অতৈ অমত্তা লৈতে। অৱাং নোংপোক্কি অতৈ ষ্টেটশিংনা ঙাঙনরিবা লোনশিং অসি ইংলিস নত্রগা রোমনা, বেঙ্গলি ময়েক্তা ইবা ঙাক্তনি, অদুবু মণিপুরী লোনগী ওইনদি ইপা ইপুনা ময়েক অনি থম্বীরমই অমদি ময়েক ২৭ অমসুং ময়েক ৩৬ লৈরি হায়খি।
ঐখোয় মশেনগী মরক্তা ময়েক অদুনা চুমই, অদুনা লাল্লি হায়না য়েৎনবগী মহুত্তা ইপা ইপুনা পীকক্রবা ফুরুপ ঐখোয়গীদমক ময়েক অনি থম্বীরমই হায়বগী ওইনা চাওথোকচবা পোকসি হায়বা ৱাফম এমএলএনা থমখি। ময়েককী মতাঙদা য়েৎনবগী মহুত্তা চহী লিশিং কয়াগী মমাংদগী ইপা ইপুনা থম্বীরম্বা ময়েক অসি অফবা মায়কৈদা পুথোক্তুনা হেন্না চাওখৎনবা হোৎনমিন্নসি হায়না এমএলএ কে রঞ্জিৎনা ফোঙদোকখি।
থৌরম অদুদা ককচিং খুনৌদগী ময়াংলম্বম ইবোহন মঙাংনা থৌরম মপু ওইখি। মণিপুর লৈঙাক্কী ষ্টেট ইন্সটিট্যুট ওফ রুরেল দিবলপমেন্টকি জোইন্ট দাইরেক্টর ওক্রম লোকেন্দ্র অমসুং শক্নাইরবা অহল লমন কয়ানা গেষ্ট ওফ ওনারশিং অমসুং স্পিসিয়েল ইনভাইটিশিং ওইনা শরূক য়াখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু