মীয়াম্না হৈকৎ লৈকৎ তমদুনা অথৌবশিংগী নুমিৎ পাঙথোকখ্রে
ইম্ফাল, এপ্রিল ১৩ : থাংমৈবন্দ চৈরাওচীংদা লৈবা মেমোরিয়েল সাইটতা মীয়াম্না হৈকৎ-লৈকৎ তমদুনা এপ্রিল ১৩, অথৌবশিংগী নুমিৎ পাঙথোকখ্রে। চৈরাওচীংদা লৈরিবা অথৌবশিং বির টিকেন্দ্রজিৎ, থাঙ্গাল জেনারেল, পাওনা ব্রজবাসি, লময়ানবা ইরাবত অমদি আইননা থিংখ্রবা লানহৌলুপ আরপিএ/পিএলএগী লৈখিদ্রবা লান্মী ৯ গী খুভমদা অয়ুক পুং ৬ তগী পুলিসকী অকনবা চেকশিন থৌরাংগা লোয়ননা মীয়াম্না হৈকৎ লৈকৎ তমখি।
সিএসওশিংগী ইমা-ইবেনশিং, অহল-লমনশিং, তোঙান তোঙানবা ফুরুপ কয়াগী মীওইশিং, লৈখিদ্রবশিংগী ইমুং মনুংশিং অমদি মরী মতা য়াওনা হৈকৎ লৈকৎ তমখি অমদি অথৌবশিংগী মফমদা থাঙ-তানা ইকায়খুম্নবসু উৎখি। লোয়ননা মেডিকেলগী মতেং পীনবা রেড ক্রোস সোসাইটিগী কেম্পসু চীংথক্তা হাংখি। অতৈ মেডিকেল টিমশিংসু মতেং পাংনবা চীংখোঙদা লৈখি।
লৈখিদ্রবা ইমুং মনুংশিংগী মায়কৈদগী ক্বাকৈথেল মোইরাংপুরেল লৈকায়দগী লৈখিদ্রবা খুন্দ্রাকপম চাওবগী মনাও নুপী খুন্দ্রাকপম ওংবি মেধানা ফোঙদোকখিবদা চহি খুদিংগী এপ্রিল ১৩ দা অথৌবশিংগী খুভমদা লমদম অসিদা লৈমিন্নরিবা ফুরুপ কাংলুপ খুদিংমক্না শরুক য়ামিন্নদুনা অমত্তা ওইনা হৈকৎ লৈকৎ তমদুনা লাক্লি।
চহি খুদিংগী পিটিসনর ৯ না হায় কোর্টতা চে থারগা হৈকৎ লৈকৎ তমদুনা লাকপদু হন্দক চহিসিদসু কোবিদকী প্রোটোকোলশিং ঙাক্না হৈকৎ লৈকৎ তম্নবগী অয়াবা হায় কোর্টনা পীরকপগী মতুং ইন্না মীয়াম পুন্না হৈকৎ লৈকৎ তম্বনি। লাক্কদবা চহিশিংদসু মীয়াম পুন্না শরুক য়ামিন্নসি হায়না পোঙদোকখি।
নিংশিংবা য়াবদি, কুমজা ১৯৮২ গী আগস্ত ১৩ দা কোদোমপোকপিদা সেক্যুরিটি ফোর্সকা খুৎ থোক্নবদা আইননা থিংখ্রবা লানহৌলূপ আরপিএফ/পিএলএগী লান্মী ৯ লৈখিদবনি। থৌদোক অদুদা লৈখিদ্রবশিং অদুকি ক্বাকৈথেলদগী খুন্দ্রাকপম চাওবা এলাইজ রাজেন্দ্র, তেরা সাপম লৈরক্তগী মোইরাংথেম প্রেমকুমার, ককৱা নাওরেম লৈকায়দগী নাওরেম রাজেন, ককৱা নামৈরাকপম লৈকায়দগী থৌদাম লোকেন, লৈকায় অসিমক্তদগী থৌদাম কুঞ্জবিহারি, হৈরোক্তগী মাইবম পাকা এলাইজ চাওথোই, হৈবোংপোকপিদগী সোরোখইবম কামেশ্বর, মোরেদগী আরকে খোইরুম্বা এলাইজ গ্যানে অমসুং কৈশামপাৎতগী এল দিলিপনি।
নাকল অমরোমদা, কুমজা ১৯৮২ গী এপ্রিল ১৩দা সেক্যুরিটি ফোর্স অমসুং আরপিএফকী কাডরশিংগা খুৎ থোক্নখিবা কোদোমপোকপিগী মফম অমদি তেকচমদা লৈবা কুমজা ১৯৮১ দা সেক্যুরিটি ফোর্সকি খূত্তা লৈখিদবা আরপিএফকী কাডর ৭ কী নিংশিং ফুরাদসু ঙসি সিএসওশিং অমদি মীয়াম্না লৈ কৎনখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু