মৈতৈগী য়েক সলাই অমসুং মিংগৌদা মীৎয়েং অমা --যমুনা লাইয়েঞ্জম
মৈতৈ ইপা-ইপুশিংনা ঈ ঈরিগী লমদা করম্না অসুক ৱাংনা চহী লীশিংনা খুজিং ওইরগা হৌখ্রবা মতমদগী হৌনা খঙলম্লিবনো? ইপা-ইপুশিংসি লাইগা পাংখক ওইনা ৱাখল খন্থবা ঙম্বা অরুবা হীরমদা কুপ্না মুন্না থিবা ফুরূপনি হায়বদা মতিক চায়। ঈ তিন্নবা মশেল য়েক্কা য়েক্কা লৌনা লৈনবা, য়ুম্বানমিন্নবা ফত্তে হায়বসি ঙসিদি সাইন্সকী ওইবা মীৎয়েংদগী অখঙ-অহৈ কয়ানা য়াম্না মরিক চুম্না ৱাফম কয়া থম্নরক্লে। মৈতৈ ফুরূপসিগী থায়নগী অহলশিংগী ৱাখল্লোন অসি মখোয়গী চাদা-নাউদা ওইরিবা ঙসিগী মীরোল ঐখোয়না অমুক্কা হেন্না নৈনদুনা অমসুং থিজিন্দুনা অৱাংবা থাক্তা থম্ফম থোকই।
যমুনা লাইয়েঞ্জম
মৈতৈ হায়বা ফুরূপসি লিরবা পুৱারী লৈজবা, চৎনবী নাৎ, ফিজেৎ, লোল অমসুং ময়েক লৈজবা মরীল লৈবা, থৌনা ফবা, লিংজেন খাবা অমদি মীনা লাকচবা য়াদবা মীওই কাঙলুপনি। মমাংঙৈদগী হৌনা মালেমগী ফুরূপশিংগী মরক্তা মশক থোক্না লৈরক্লবনি। লাইওইখ্রবা অহল লমন, ইপা-ইপুশিংনা লৈখায় তানা ইতোপ তোপ্পা তোঙান্না ঐখোয়গী চৎনবী ময়াম অমা শেমদুনা থম্বিরম্মী, মসিমক মৈতৈ হায়বা ফুরূপ ঐখোয়গী য়াম্না চাওথোকচনিংঙাইনি।
মণিপুর পুৱারীগী মতুংইন্না ঙল্লিঙৈ মতমদা তম্পাক লমদম অয়াম্বনা মশীং য়াম্লবা মীওই কাঙলুপ কয়ানা চোইনা খুন্দা লৈতাদুনা লৈরম্মী। মতমদুদা মপাঙ্গল কন্না মনীং মখা তম্না পাম্লম্বা মীওই কাঙলুপশিংবু সলাই অমমম ওইনা খঙনরম্মী অমসুং অসিগুম্বা ঈতিন্নবা কাঙলুপ অসি মশীং মাপল শুরম্মী। মতমগী মতুং ইন্না চাউরাক্না চহী ১৮৫০ রোম চঙনা তম্পাক লমগী অপূনবা শক্তম অমা শাগৎলকপগী মতাংদা সলাই হায়না খঙনরিবা ফুরূপ মাপল অসিদগী পুনশিল্লক্তুনা মৈতৈগী তরেৎ তরেৎকী খুজিংদা য়েক তরেৎ অসি ওইরকখি। মখোয় অদুদি-মঙাঙ, লুৱাং, খুমন, অঙোম, মোইরাং, খা-ঙানবা অমসুং সরাং লৈশাংথেম অসিনি।
ঈ মশেল লৌন লৈনবা য়াদে হায়বা চৎনবীসি থাক ৱাংবা ৱাখল্লোন অমগী খুদমনি। য়েক থোক্নবা মশেল লৌনবা ফত্তে হায়বসি লাইওইখ্রবা মখোয়না ঙল্লিঙৈ মতমদগী হৌনা খঙলকই। মরম অসিনা নিয়মসিগী ৱাংমদা চারৌ মৌরৌনবদা অকনবা অথিংবা থম্লম্লিবনি। মমাংঙৈগী চৎনবীদা ইপা ইপুশিংনা মচা মমৌ থিবদা হায়না-শিংনদুনা থিবগী চৎনবী লৈরম্মী। মৌ হায়বা মতমদা য়েক তিন্নবা লাইরুক তিন্নবা অমত্তা হায়নরমদে, মৌ ওইনরমদে। মতমদুদা অসিগুম্বা চৎনবী অসি চেকশিন্না ঙাক্না চৎনরম্মী। হৌজিক্কী মতমদদি লাইৱাগী মশক ওইরবা পাউতাক কয়াসি খরা লায়থোকপগুম তৌরে। মসিমক্তি ফুরূপ অসি ময়েং তারক্নবা মরমনি হায়না অখঙ অহে ওজা গুরু কয়ানা ৱাখল্লোন ফোঙদোক্নরক্লি। মরম অসিনা ঙসিদি মৈত্রবাক্কী মীওই খুদিংমক্না মমা মপা ওইরিবা অমসুং হৌরক্লিবা নহা, পাখং লৈশা ওইরিবা পুম্নমক হীরমসিগী মতাংদা ৱারী ৱাখোঙ কয়া থিজিন্দুনা কান্নবা ৱাফম কয়ামরুম খঙজিনবগী তঙাইফদমা অমা ওইরে।
য়েক মশেল হায়বদি হৌরকফম ঈ তিন্নবা মলেল লৌনা লৈনরবদি পুন্সি নুংশাংবা ওইদে, মখোয়না পোকপা মচা মশু পুন্সিদে, শোয়নাইবা থোক্কল্লি, হকচাং পঙথবগী লায়না লৈগল্লি, মীওই লাল্লুপ চাদবা, ঙাওফৈদা ওইগল্লি।, অসিগীসু মথক্তা মখোয়গী পুন্সিদা নুঙাইফম খঙদবা অমসুং মচা পোক্তবা নচিংবা কয়ামা থোক্কল্লি হায়বগী অচেৎপা থাজবা অসি লৈবনা মমাংঙৈগী অহল-লমন য়াম্না কিনা লুনা লৌনরম্মী। মৈতৈগী চৎনবীদা চেকশিন্না শাগোন্ননা লৈরক্লবা ওইবনা য়েক থোক্নবা নুপা-নুপী লৌন লৈনরবদি অফবা তানখৎপা থবক থৌরম অমতং তৌরকপদা থৌদাং য়াহনদে। খুদম ওইনা হায়রবদা অপোকপা খুরুম্বদা য়েক লৌনবা মৌ য়াওহন্দবা অসি ঙসিসু অদুমক চৎনদুনা লৈরি।
মৈতৈ ইপা-ইপুশিংনা ঈ ঈরিগী লমদা করম্না অসুক ৱাংনা চহী লীশিংনা খুজিং ওইরগা হৌখ্রবা মতমদগী হৌনা খঙলম্লিবনো? ইপা-ইপুশিংসি লাইগা পাংখক ওইনা ৱাখল খন্থবা ঙম্বা অরুবা হীরমদা কুপ্না মুন্না থিবা ফুরূপনি হায়বদা মতিক চায়। ঈ তিন্নবা মশেল য়েক্কা য়েক্কা লৌনা লৈনবা, য়ুম্বানমিন্নবা ফত্তে হায়বসি ঙসিদি সাইন্সকী ওইবা মীৎয়েংদগী অখঙ-অহৈ কয়ানা য়াম্না মরিক চুম্না ৱাফম কয়া থম্নরক্লে। মৈতৈ ফুরূপসিগী থায়নগী অহলশিংগী ৱাখল্লোন অসি মখোয়গী চাদা-নাউদা ওইরিবা ঙসিগী মীরোল ঐখোয়না অমুক্কা হেন্না নৈনদুনা অমসুং থিজিন্দুনা অৱাংবা থাক্তা থম্ফম থোকই।
চীং-তম নুংশিনগদৌবনি, মখোয়-ঐখোয় হৌমিন্নরকই, ফুরূপ তিন্নৈ হায়বসিদি চৎনবীসিনা তাকই। খূদম ওইনা মৈতৈগী য়েক সলাই লৈবগুম চীংমী ঈচিন-ঈনাওশিংগী ফুরূপ খরদসু য়েক সলাই লৈ, মদুদি-তাংখুল, লমকাং, মোনসাং, কোইরেং, মোয়োন, মরিং, কবুই, কোম, চোথে অমসুং খারম নচিংবনি। হায়রিবা ফুরূপশিংসিগী ওইবা লোনসু লৈজৈ অমসুং মমাংঙৈদগী মখোয়গী য়েক সলাই তরেৎ খাইদোক্তুনা চৎনবী ঙাক্তুনা লৈরকই, মখোয়গী মরক্তসু সনামহি লৈমরেল লাই য়ুমদা লাৎতুন লৈবা য়াওই।
মৈতৈগী চৎনবীদা য়ুমদা লাই লাৎপসি য়াম্না মরুওইবা অমনি। লাইনিংথৌ সনামহি, লৈমরেন অমসুং ইমোইনা য়ুম খুদিংগী খুভমশেমদুনা লাৎপগী লৈরকই। মৈতৈ ইপা-ইপুশিংনা য়ুমলাই থমদুনা লাৎপসিমক মমাংঙৈদগী কায়দনা অসুম চৎনরকপনা ঙসি ফাওবা ঙাক্না লৈরক্লি। অসিগুম্বা লুরবা চৎনবীসি ফজনা মরা চেৎনা লৈরকপসিনা খুন্নাইসি মীৎয়েং শানবা নে তাবা ফুরূপ অমনি হায়না তাকই।
মৈতৈ ফুরূপকী ওইনা য়েক সলাই মখল তরেৎ ময়েক শেংনা খাইদোক্তুনা লৈরম্বগুম ঐখোয়গী মীংগৌসিসু য়াম্না ফজনা নিয়ম অমা নাইনা থম্বিরম্বা চৎনবী অমনি। ইশাগী লোন অমসুং ময়েক মওং তানা লৈজরম্বগুম ফজখ্রবা অথোইবা চৎনবী কয়া ইপা ইপুশিংনা লৈ-পরেংগুম পরেং শানা শেমদুনা থম্বিরম্মী। মীংগৌ হায়বসিসু য়াম্না লুবা ফুরূপ অমগী চৎনবীনি। মৈতৈ ঐখোয়গীদি ঈ মরিদগী শেম্বা য়াম্না নিয়ম নাইনা কৌনবা মীংগৌ পথাপনি হায়না থমজনিংই। মসিগী খুদম খরদং পল্লবদা-ইমা-ইপা, ইপু-ইবেন, ইতৈমা, ইনম্মা, ইশেন, ইপনধৌ, ইম্মানথৌ, ইখুরা, ইন্দোমচা, ইনে, ইকুবোক, ইনেমবোক ফজবা মীংগৌ পরেংনি। মীংগৌগী নিয়মসি ফজনা ঙাক্না চৎতবা তারবদি লমচৎ শাজৎতা হোংলক্কনি, অকায়বা লৈগনি, মরমসিনা ইপা-ইপুশিংগী হাক্তক্তগী লৈরক্লবা চৎনবী অসি কায়দনা থমদুনা শীজিন্নবা চুমগনি।
মৈতৈ খুনাইদা মকুবোক মনেমবোক অমসুং মতৈ অমদা উৎলিবা মৌশিংগী চৎন কাঙলোন কায়দনা থম্বা ফৈ। ‘মতৈ’ থোকপা অমদা ‘ইতৈ’ হায়নদি কৌদদুনা তাচৌ, তায়াই, তাতোন, য়াম্বুং কৌবদগী কোইনবগী মহুত্তা মচিন-মৌপুৱাগুম তোরো খোন্দানদুনা ইশম শম্লবগী মতৌ অসি চৎনবী অমশুম তৌনরকই। মৌশিংনা মতৈ উবদা থেংনবদা মকোক খুমদুনা কোইনা ইকাই খুম্নবা উৎপগী চৎনবীসি য়াম্না ফজৈ লমচৎ নাইবী মৈতৈ নুপীগী শক্তম তাকপদা মসিসু মৈতৈ খুন্নাইগী অৱাংবা থাক্তা লৈজবা চৎনবীনি।
মৈতৈ ঐখোয়গী ফজখ্রবা মীংগৌ পরিংসি খুন্নাইসিদা অহল লমনবু ইকাইখুম্নবা, থকসি খাসি নাইনা চৎনবগী পারা তম্বীবা ওইনসু লৌশিনবা য়াই। ইথক থোংবদা কৌগদৌবা, ইখা থাবশিংদা কৌগদৌবা মখল শুনা লৈরিবনি। মসিগী নিয়মসি কায়দনা চৎনরবদি নুংশিনগনি অমসুং নুংশিনরবদি খৎন চৈনবা, ঈরাং থোকপা, লান নচিংবা অমত্তা মীওইবা মরক্তা থোক্লোই, ইংনা চিক্না পানবা তংদু লৈতাবা খুন্নাই ওইগনি।
[আগরতলাদা পাংথোকখিবা ( ২৪/৮/২০২৪ ইং)‘মণিপুরী ল্যাঙ্গুয়েজ, লিটরেচর এ্যন্ড কালচার’ নেশনেল সেমিনারদা পাথোকখিবা ]
কোর্টেসি : মরূপ
0 কমেন্ট:
কমেন্ট তৌবিয়ু