মার্জিং পোলো কমপ্লেক্স হৈঙাংদা চহী অসিগী দিসেম্বর ২৮দগী লাক্লিবা মথং চহীগী জানুয়ারী ৮ ফাওবা ৬শুবা শিংজু ফেষ্টিভেল পাঙথোক্লগনি
ইম্ফাল, দিসেম্বর ০৪ :শিংজু য়োকখৎপা লূপ (এস ৱাই ও এল) ইম্ফাল মণিপুরগী মীৎয়েং মখাদা শিংজু ফেষ্টিভেল কম্মিটিনা শীন্দুনা তোঙানা তোঙানবা নাৎকী ওইবা থৌরম কয়াগা লোয়ননা মার্র্জি পোলো কমপ্লেক্স হৈঙাংদা লাক্লিবা দিসেম্বর ২৮ দগী মথং চহীগী জানুয়ারী ৮ ফাওবা নুমীৎ ১২ নি চুপ্না ৬ শুবা শিংজু ফেষ্টিভেল ২০২২ পাঙথোক্লগনি হায়না ফেষ্টিভেল কম্মিটি ২০২২ গী কনভিনার রাকেশ নাওরেমগী চেরোল অমনা ফোঙদোরক্লি।
সেভ অৱার ইন্দিজিনাস ফুদ, কালচার এন্দ ইন্দিগ্রিটি হায়বা ৱাখল্লোনগী মখাদা পাঙথোক্কদৌরিবা ফেষ্টিভেল অসিদা তোঙান তোঙানবা শিংজু মখলশিং, চীঞ্জাক মখলশিং, খুৎ-শা হৈবগী পোত্থোকশিং, লৈতেংগী ওইবা পোৎলমশিং, হেন্দলুম এন্দ হেন্দিক্রাফ্টকী পোত্থোকশিং, অঙাংশিংগী ওইবা অখন্নবা পোৎলমশিং অমদি তোঙান তোঙানবা ষ্টোল ১০০ ফেষ্টিভেল অসিদা মীয়ামগীদমক হাংগনি। ফেষ্টিভেল অসিদা লমদম অসিগী মীয়াম্না ফুদ ষ্টোল য়াওনা অতৈ ষ্টোলশিং ফম্বীবা য়াগনি হায়রি।
নুমীৎ ১২নি চুপ্না পাঙথোক্কদৌরিবা ৬শুবা শিংজু ফেষ্টিভেল ২০২২ অসি অয়ুক পুং ১১দগী নুমীদাং পুং ৮ ফাওবা নুমীৎ খূদিংগী কালচারেল প্রোগ্রাম কয়াগা লোয়ননা পাঙথোক্কনি। ফেষ্টিভেল অসিগী মনুং চন্না প্রমোসনেল ইভেন্ট ওইনা শিংজু রান (গো ম্যারাথোন রেস), ফ্রেন্দলি ফুটবোল মেচ, ট্রি প্লান্টেশন অমদি শিংজু সাইকল রেল্লি পাঙথোক্কনি। লোয়ননা ফেষ্টিভেল অসিগী মেন ইভেন্টস ওইনা ইন্দিজিনাস কালচার (ফোক সোং, ফোক দান্স, লিকোন, ইন্দিজিনস স্পোর্টসতা থাঙ-তা, কাঙ, মুক্না, য়ুবী লাকপী, লোয়ননা ফেষ্টিভেল অসিদা হাংগদৌরিবা ইন্দিজিনাস ফুদকী ষ্টোলশিংদা মণিপুর, আসাম, ত্রিপুরা অমদি বাংলাদেশকী মীওইশিংসু শরুক য়াগনি।
ফেষ্টিভেল অসিগী মনুং চন্না স্পেসল পেনা ফিউজন মিউজিক, মিউজিকেল নাইট, পুঙ-চোলোম, মিস শিংজু কন্টেষ্ট (শিংজু শকহেনবী চাংদম্নবা), সিম্পোজিয়াম ওন মেদিসিনেল প্লান্টস, সেভ অৱার পোনি হায়বা থীমদা অঙাংশিংগী ওইবা স্পোট পেন্টিং কম্পিটিসন, ইন্দিজিনাস শিংজুদা য়াওরিবা কান্নবশিং হায়বা থীমদা স্পোট এসে রাইটিং কম্পিটিসনসু পাঙথোক্কনি।
লোয়ননা চহী ১৮ গী মনুংদা লৈরিবা নুপা অমদি নুপগিী সোলো দান্স কম্পিটিসন, মিট দা ষ্টার্স এন্দ পার্সোনেলিটিজ, মীদিয়া ইন্সট্রাক্সন প্রেগ্রাম, নোকফদে, রাইটার্স মীট, শুমাং কুহ্মৈ, আর্ট এগজিবিসন, যোগ দেমোন্সত্রেসন, নেরেটিভ আর্ট, ফ্রী হেলথ কেম্প, বুক এগজিবিসন, ত্রাইবেল কালচারেল প্রোগ্রাম, মীতৈ পাঙলস কালচারেল প্রোগ্রাম, লিগেল এৱার্নেস প্রোগ্রাম, ব্লাদ দোনেসন কেম্প অমদি ট্রেদিসনেল কষ্টুমদা ফ্যাশন শো না চিংবসু পাঙথোক্কনি হায়রি।
ফেষ্টিভেল অসি পাঙথোকপগী মরুওইবা পান্দমদি ইরমদম মণিপুর অসিদা খুন্দামিন্নরিবা ফুরুপশিংগী ইপা-ইপুশিংনা নীংশিংবা থোক্ত্রবা মতমদগী হৌনা শিংজু হায়বা লমদমসিগী লৈবাক-লৈহাওদা হৌজবা মনা-মশিং খুদম ওইনা পেরুক, কোমপ্রেক, শিংজুপান, লফুথরো, হৈবী মনা, য়েন্দেম, ফৈজা, টোক্নিংকোক, থম্বৌ, তেংনৌমানবী, হৱাই মতোল, হঙ্গাম মতোল, লফু, চাকহৱাই, অৱাথবী, য়োংচাক অমদি ঈকায়থবীনচিংবা মতম-মতমগী ওইবা মেদিসিনেল ভেল্যু য়াওবা অশং-অমান্তনা শেশ্বা চীঞ্জাক মখল অমসু ওইরিবা শিংজু অসি য়োকখৎপনা লমদমসিদা হৌরিবা মেদিসিনেল প্লান্টশিং য়োকখৎপদা নত্তনা গ্রীন রিভোলুসন শাগৎমিন্নবা য়াই হায়বসিনা ফেষ্টিভেল অসিগী ইহান হানবা পান্দমনি হায়রি।
ফেষ্টিভেল অসিগী অকুপ্পা মরোল 9862100658, 7005834849 অমদি 7085806436 নচিংবদগী খঙবীবা য়াগনি হায়নসু চেরোলদুনা মখা তানা ফোঙদোরক্লি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু