মণিপুরগী জুদোকা তাইবংঙানবী অমসুং নুংশিথোইনা গোল্ড, শিতলনা সিলভর লৌরে
ইম্ফাল, জুলাই ১৬ : চাইনিজ তাইপৈনা য়ূম্বু ওইদুনা চত্থিরিবা তাইপৈ এসিয়ান কেদেত অমসুং জুনিয়র কপ জুদো চেম্পিয়নশিপ ২০২৫ দা মণিপুরগী লৈশাংথেম নুংশিথোই চনু অমসুং খাইদেম তাইবংঙানবী চনুনা ইন্দিয়াগীদমক গোল্ড মেদলশিং লৌখ্রে, অদুগা মণিপুরগী নিংথৌজম সিতল সিংহনা সিলভর মেদল লৌখ্রে।
মফম অসিদা ফংবা পাউনা হায়, ইন্দিয়াগীদমক রিপ্রেজেন্ত তৌরিবী মণিপুরগী নুংশিথোই চনুনা জুনিয়র নুপীমচাগী কেজি ৫২ গী মখাগী কাংলূপ্তা মহাক্কী গোল্ড মেদল অদু লৌখি। নুংশিথৌইনা ফাইনেলদা য়ূম্বু চাইনিজ তাইপৈগী শেন য়ি হসিবু মায়থীবা পীদুনা মহাক্কী মেদল অদু লৌখি।
জুনিয়র নুপীমচাগী কেজি ৭০ গী মখাগী কাংলূপ্তা মণিপুরগী খাইদেম তাইবংঙানবীনা ইন্দিয়াগী মেদল তেলিদা গোল্ড অমা কন্ত্রিব্যুত তৌখি। তাইবংঙানবীনা মহাক্কী মেদল অদু লৌনবা হোৎনবদা ফাইনেলদা য়ূম্বু তাইপৈগী হুৱাং-ঝি-লিংবু মায়থীখি। নুপামচাগী কেজি ৯০ গী মখাগী কাংলূপ্তা মণিপুরগী নিংথৌজম শিতল সিংহনা সিলভর লৌখি। মহাক্না ফাইনেলদা য়ুম্বুগী লম্বাগী মখূত্তা মায়থীবা নংহৌখি।
ইন্দিয়াগী জুনিয়র জুদো তিম অদুবু মণিপুরগী খাইদেম গুনমণিনা কোচ ওইনা লূচিংলিবনি। ইভেন্ত অদুগী কেদেত নুপীমচাগী কেজি ৬৩ মখাগী কাংলূপ্তা কম্পিত তৌখিবী মণিপুরগী ময়াং ইম্ফাল কোঞ্চাক হৈগুম অয়িংবীদগী খুয়েন্থেম ইনাওবী সিংহ অমসুং থাজমানবী অনীগী মচানুপী মোনিকানা ফাইনেলদা য়ূম্বু চাইনিজ তাইপৈগী পাই য়ু-হসুৱানগঅ মখূত্তা মায়থীদুনা সিলভর মেদল অদু লৌখি। নুপীমচাগী কেদেতকী কেজি ৭০ গী মখাগী কাংলূপ্তা কম্পিত তৌখিবী মণিপুরগী বিপিলিয়া য়ুম্নামসু চাইনিজ তাইপৈগী লম্বাগী মখূত্তা মায়থীবা নংদুনা সিলভর ফংহৌখি। ময়াং ইম্ফাল পুলিস স্তেসন মনিংদগী য়ুম্নাম ব্রোজেন অমসুং লক্সমি দেবী অনীগী মচানুপী বিপিলিয়ানা ফাইনেলদা য়ুম্বুগী হুৱাং য়ু কিয়াওগী মখূত্তা মায়থীদুনা মহাক্কী মেদল অদু লৌহৌখিবনি।
ইন্দিয়াগী কেদেত জুদো তিম অদুবু মণিপুরগী ময়াং ইম্ফাল অনীলোংবী ইম্ফাল ওয়েস্ততগী এ সুরজিৎ মৈতৈনা কোচ ওইনা লুচিংখিবনি। সুরজিৎনা লুচিংখিবা ইন্দিয়াগী কেদেত জুদো তিম অদুনা অপূনবা মেদল ১৪ লৌদুনা চাউনা মায় পাকপা ঙমখি। মহাক্কী তিম অদুনা গোল্ড মরি, সিলভর অহুম, ব্রোঞ্জ তরেৎ য়াওনা পূন্না মেদল ১৪ অদু লৌখি।
সোর্স: পোক্নফম
0 কমেন্ট:
কমেন্ট তৌবিয়ু