আপডেট:
image

বামসাস-কী ৭ শুবা ইন্টারনেসনেল কনফারেন্স ওন মণিপুরী লিটারেচার এন্ড কালচার ২০২২ পাংথোকখ্রে

সিলেট, নভেম্বর ০৫ : মণিপুরী লোন অমসুং সাহিত্য অসি য়াম্না লিরবা অমসুং মশাগী চংখোল্লবা ইতিহাস অমা লৈজে। অদুবু বাংলাদেশতদি মশীং লীকপা অমসুং ময়াম্না শৌগৎপিবা ৱাৎপদগী হায়রিবা মণিপুরী লোন অমসুং সাহিত্য অসি চাওখৎপগী লম্বীদা থোইনা মতীকচানা খোঙ-থাংজনবা ঙমদ্রি। অদুনা, লমদমসিদা মণিপুরী লোন অমসুং সাহিত্যবু মতম মতমদা লান্না উৎপীবা নৎত্রগা ওন্নতৈনবা মওংদা উৎপীবা কয়ামসু য়াওরকই, অদুনা খুদোংথীবা কয়াসু নংলি। মরম অদুনা ঐখোয় ময়াম লীংজেন মান্নদুনা অমত্তা ওইবা ৱাখলদা ইশা ইশাগী লোন ঈনাৎপু য়োকখৎপা মথৌ তায়। ইমালোননা ৱা ঙাঙবদা, সাহিত্য চর্চা তৌবদা করিমতা ইকায়নিঙাই অমদি হঙ্গোয়নিঙাই লৈতে। মফম অসিদসু ইমালোন অমদি ঈনাৎ নোংমা নোংমাগী মকা ফন্না শাকাইরক্কনি। -ৱাফম খরসি ঙরাং পাংথোকখিবা ৭সুবা ইন্টরন্যশনাল কনফারেন্স ওন মণিপুরী লিটরেচর এন্ড কালচর’২২ থৌরমদা ৱাঙাঙলোয়শিংনা হায়খিবনি।

 বাংলাদেশ মণিপুরী সাহিত্য সংসদ(বামসাস) না হৌখিবা চহী ৪৭ চুপ্না মায়কৈসিদা লৈরিবা অপল-অথিং কয়াবু কোকহনবতা নত্তনা চাওখৎপগী লমজেলবুসু মপুঙ-মরৈ ফাহন্ননবা লেপ্তনা হোৎনদুনা লাক্লি। মদুগী খোঙথাং অমা ওইনা ঙরাং ইরাই নুমীৎ, ৪ নভেম্বর ২০২২দা সিলেটকী জেলা পরিষদ হোলদা ৭ শুবা ইন্টারন্যাশনেল কনফারেন্স ওন মণিপুরী লিটারেচার এন্ড কালচার ২০২২’ অমসুং ‘নীলিমা সিনহা মেমোরিয়েল এৱার্দ’ য়েন্থোকপগী থৌরম অমা লমদমসিগী অফাওবা কবি-সাহিত্যিক কয়াগা লোয়ননা মণিপুর অমসুং ত্রিপুরাদগী শক্নাইরবা কবি-অইবা-অইবি কয়াগা লোয়ননা অয়ুকতা মৈরা চুখৎতুনা হৌদোকপিখি।

   শক্নাইরবা অইবা নভেলিষ্ট ক্ষেত্রিময়ুম বীর সিংহ (ক্ষেত্রি বীর)দা ‘নীলিমা সিনহা মেমোরিয়েল এৱার্দ ' খুৎশিন্নবা

 

বামসাস-কী প্রেসিদেন্ট শক্নাইরবা অইবা এ. কে শেরামনা থৌরমমপু অমসুং জেনারেল সেক্রেটারী অইবা নামব্রম শংকরন না কন্ডাক্ট তৌখিবা অহানবা সেশনদা অথোইবা মিথুংলেন ওইনা সিলেট জেলা পরিষদকী চীফ এ্ক্সিকিউটিব অফিসার সন্দীপ কুমার সিংহ, নীলিমা এস সি সিনহা ট্রাষ্টকী চেয়ারমেন এডভোকেট এস সি সিনহা, মণিপুরী সাহিত্য পরিষদ, মণিপুরগী জেনারেল সেক্রেটারি ড. এলাংবম প্রিয়ব্রত সিংহ, শক্নাইরবা অইবা মণিপুরী সাহিত্য পরিষদ ত্রিপুরাগী এক্স জেনারেল সেক্রেটারি এল. বীরমঙ্গল সিংহ লোয়ননা মণিপুরী সাহিত্য পরিষদ ত্রিপুরাগী জেনারেল সেক্রেটারি থৌদাম নীলকুমার সিংহনা শরুক য়ারদুনা মমল লৈরবা ৱারোল কয়াসু থম্বিখি।
থৌরম অসিদা মণিপুরগী শক্নাইরবা অইবা নভেলিষ্ট ক্ষেত্রিময়ুম বীর সিংহ (ক্ষেত্রি বীর)দা ‘নীলিমা সিনহা মেমোরিয়েল এৱার্দ ' খুৎশিন্নদুনা ইকায় খুম্নবা উৎখি। 

অনিশুবা সেশন, কবি সম্মেলনদা অথোইবা মীথুংলেন ওইনা শাজজালাল য়্যুনিভার্সিটি ওফ সাইন্স এন্ড টেকনোলোজি, বাংলা ডিপার্টমেন্টকী প্রফেসর অইবা জফির সেতু অমসুং অখন্নবা মীথুংলেন ওইনা মণিপুরী সাহিত্য পরিষদ, মণিপুর'গী জয়েন্ট সেক্রেটারী ড. এল রামেশ্বর সিংহ শরুক য়াখি। হায়রিবা কবি সম্মেলন অসিদা লোন কয়াগী অইবা-অইবিশিংনা বাংলা অমদি মৈতৈলোনসু য়াওনা মফম অসিদা খুন্দারিবা অতোপ্পা লোন কয়াগী শৈরেং শৈদিন্নখি। থৌরম অসিদা বাংলাদেশকী  শক্নাইরবা অইবা শেরাম নিরঞ্জননা থৌরম মপু ওইখি। 

নুংথিলগী অরোইবা সেশন, নৈনা-মিফমগী তাঙ্কক অমা
 

নুংথিলগী অরোইবা সেশনদা বামসাস-কী এডভাইজর এডভোকেট এস সি সিনহানা ময়াইতাংবল লৌরগা নীহার রঞ্জন শর্মা না কন্ডাক্ট তৌদুনা পাংথোকখিবা নৈনা মীফম অদুদা অথোইবা মীথুংলেন ওইনা বাংলাদেশ প্রগতি লেখক সংঘ, সেন্ট্রেল কমিটিগী প্রেসিদেন্ট অইবা গোলাম কিবরিয়া পিনু অমসুং অখন্নবা মীথুংলেন ওইনা সিলেট ইন্টারনেশনেল ইউনিভার্সিটি, হিউমেনিটিজ ফ্যাকাল্টিগী ডিন প্রফেসন ড. আবুল ফতেহ ফাত্তাহ, কুমিল্লা ইউনিভার্সিটিগী বাংলা ডিপার্টমেন্টগী হেড, প্রফেসর ড. জি এম মনিরুজ্জামান, মণিপুরগী অইবা ড. এলাংবম প্রিয়ব্রত সিংহ অমসুং ত্রিপুরাগী অইবা এল বীরমঙ্গল সিংহনা শরুক য়ারদুনা মমল লৈরবা ৱারোল কয়াসু থম্বিখি। নৈন-মিফম অদুদা বাংলাদেশকী অইবা অমসুং বামসাসকী প্রসিদেন্ট এ কে শেরামনা  'বাংলাদেশে মণিপুরী সাহিত্যের স্বপ্নযাত্রা' মীংথোনদা বাংলাদেশতা মণিপুরী সাহিত্যগী খোংচৎকী মতাংদা কী-নোট পেপার অমা পাথোকখি। মথংদা থৌরমদুদা শরুক য়াবিরবা গেষ্ট ময়াম্না  বামসাসগী চৈফোং ‘মৈরা’ গী ৬০ শুবা ইস্যুগী মায়খুম হাংদোকপিখি। 

 মণিপুরদগী আর কে গীতাঞ্জলি দেবী, রাজকুমারী এলিজাবেথ অমসুং থোইবীসানা

 

অরোইবদা ঈশৈ-জগোয়গী থৌরম অমসু পাংথোকখি। কেএইচ সমেন্দ্র সিংহনা কন্ডাক্ট তৌখিবা কালরারেল ইভেন্ট অদুদা  বামসাস-কী চিলড্রেন আর্টিষ্টশিংগী কোরাস ঈশৈগা লোয়ননা বাংলাদেশকী শক্নাইরবা শৈশকপা বিধান সিংহনা ঈশৈ অমসুং "একাডমি ফর মনিপুরী কালচার এন্ড আর্টস(এমকা)গী আর্টিষ্টিশিংনা জগোয়গী থৌরম উৎখি। অরোয়বদা ইম্ফাল, মণিপুরদগী লেংবিরকপা আর্টিষ্ট আর কে গীতাঞ্জলি দেবী, রাজকুমারী এলিজাবেথ অমসুং থোইবীসানাগী জগোয়না ঈশৈ-জগোয়গী থৌরম লোয়শনখি।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: