পোক্নফমগী বোনি থোঙামচাদা আর কে সনাতোম্বা মেমোরিয়েল জার্নেলিস্ত এৱার্দ খূৎশিন্নখ্রে
ইম্ফাল, জুন ৩০ : কংলা লানপূং গী এদিতর ওইরম্বা আর কে সনাতোম্বনা লৈখিদবা নুমিৎ, জুন ৩০ অসিদা মহাকপু নীংশিংবগী থৌরম পাঙথোকখিবগা লোয়ননা পোক্নফমগী এসিস্তেন্ত ফিচর এদিতর বোনি থোঙামচা (বি-তেক) দা চহী অসিগী আর কে সনাতোম্বা মেমোরিয়েল জর্নেলিস্ত এৱার্দ-২০২৫ খূৎশিন্নখ্রে।
আর কে সনাতোম্বা মেমোরিয়েল ত্রাস্তন শীন্দুনা ঙসি নুংথিল পেলেস কম্পাউন্দদা লৈবা হিজাগং লেনদা লৈবা কোম্বীরৈ হাউসতা লৈবা ত্রাস্ত অসিগী ওফিসতা পাঙথোকখিবা থৌরম অদুদা লৈখিদ্রবা আর কে সনাতোম্বগী অপোকপী মঙ্গি শিজ, এ ব্রজকুমার শর্ম্মা অমসুং লৈহাও-থাবম শরতচন্দ্র শর্ম্মানা প্রেসিদিয়াম মেম্বরশিং ওইখি।
থৌরম অদুগা মরী লৈননা আর কে সনাতোম্বা মেমোরিএল ত্রাস্তকী চেয়ারমেন দাঃ আর কে নিমাইনা হায়, লৈখিদ্রবা আর কে সনাতোম্বা লাইবক থীবা থৌদোক অমদা জুন ৩০ দা লৈখিদবনি। মহাক্না লৈখিদ্রবা মতুংদা মহাক্কা লোয়নরম্বা মমান্নবশিং অমদি লৈখিদ্রবগী ইমুং-মনুংনা পূনশিন্দুনা ত্রস্ত অমা শেম্লগা মহাক্না পামজরম্বা জর্নেলিজমগী হীরম অসিদা লমদম অসিগী পাউমীশিংদা চহী খুদীংগী ওইনা এৱার্দ পীবগী থৌরম অসি হৌখিবা চহী ২০০৪ দগী চত্থরগা লাকখিবনি। হন্দক্কী পীরিবা এৱার্দ অসিনা ২২ শুবনি।
হন্দক্কী চহী অসিগী ওইনসু ঈ-পাউগী থবক তৌমিন্নরিবা এদিতরশিংগী মায়কৈদগী মগুন লৈবা রিপোর্তিশিং নোমিনেত তৌরকই। চহী অসিগী ওইনা ভিজুএল মিদিয়াগী অনী অদুগা প্রিন্তকী অহুম পূন্না নোমিনেসন মঙা ফংখি। জুরি তিম অমা শেম্লবা মতুং মখোয়না খনগৎলবা পাউমী অদুদা এৱার্দ অসি পীবনি। এৱার্দ অসি ফিল্ড রিপোর্তরদগী হৌরগা এসিস্তেন্ত এদিতর ফাউবগী থাক্তা লৈবা পাউমীশিংদা পীবনি হায়না আর কে নিমাইনা ফোঙদোকখি।
থৌরমগী অহানবা শরুক্তা লৈখিদ্রবা আর কে সনাতোম্বগী ফোতোদা শরুক য়াখিবা মীয়াম্না হৈ-লৈ কত্তুনা ইকায়খুম্নবা ঊৎখি। কংলা লানপূংগী হান্নগী এদিতর অমসুং কলচরেল এক্তিভিস্ত নিংথৌজা লানচানা লৈখিদ্রবা আর কে সনাতোম্বনা পাউ-চেগী লম অসিদা করি করম্বা অহোংবা মওং মতৌশিং পামজরম্বগে হায়বগী মতাঙদা মীয়ামদা পাউমদমখি।
চহী অসিগী ওইনা আর কে সনাতোম্বা মেমোরিএল জর্নেলিস্ত এৱার্দ ফংলবা পোক্নফমগী এসিস্তেন্ত এৱার্দ ফংলবা পোক্নফমগী এসিস্তেন্ত ফিচর এদিতর ওইরিবা বোনি থোঙামচা (বি-তেক) হৌখিবা চহী ১৫ রোম অসিদা শুমাঙ লীলা অমসুং মণিপুরী ফিল্মগী পাউদম কয়া পীবগা লোয়ননা হীরম অসিগী মতাঙদা নৈনদুনা লাক্লিবা পাউমী অমনি। বোনি থোঙামচা ককচীং দিস্ত্রিক্তকী মনুংচন্না লৈবা এলাংখানপোকপীদগী থোঙাম কামেশ্বর অমসুং থোঙাম বিনো অনীগী মচানুপা অহলনি। সাইন্স গ্রেজুএত লোইশিনখ্রবা মতুং, বোনি থোঙামচানা ঈ-পাউগী লমদা চঙদ্রিঙৈদা শক্নাইরবা থিএতরগী পার্সনেলিতি রতন থিয়ামগী মখাদা মালেমগী তোঙান-তোঙানবা লৈবাকশিংদা পারফোর্মেন্স পীরুরে। মহাক থিএতরগী দিরেক্তর অমসুং আর্তিস্ত ওইনা লৈরকপা মীশক অমনি। ফিল্মগী লমদা এফ তি আই আই পুনেদা ফিল্ম এপ্রিসিএসন কোর্সসু মপূং ফানা লোইশিনখ্রে। ঙসি ফংখিবা এৱার্দ অসিদা শেল ওইনা লুপা ২৫,০০০; সাইতেসন অমা অমসুং লেংয়ান ফি অমসু য়াওরি।
ঙসিগী থৌরম অদুগা মরী লৈননা কংলা লানপূংগী ১৬ শুবা ভোল্যুমগী অহানবা ইসুসু ফোঙখি। ঙসি ফোঙখিবা এদিসন অসিদা আর্তিকল ইরকখিবা অইবশিংবুসু ইকায়খুম্নবা ঊৎখি।
সোর্স: পোক্নফম
0 কমেন্ট:
কমেন্ট তৌবিয়ু