আপডেট:
image

পুৱারীগী নুপীলালনা হৌজিকসু নুপীশিংদা পীররিবা থৌনা লীংজেল


আগরতলাদগী ফোংবা মরূপ (৫৪ শুবা চহী, ২৯ শুবা মশীং, ৯ ডিসেম্বর, ২০২২) চেফোংদা ইদিতোরিয়েল ওইনা ফোংখিবনি।] 

চহী খুদিং চহীগী লোইরমদাইগী ডিসেম্বর থা অসিনা হেক য়ৌরকপদা মণিপুরগী নুপীগী পুৱারীদা খ্বাইদগী শৈথানরিবা ‘নুপীলাল নীংশিং নুমিৎ’ নত্রগা ‘নুপীগী নুমিৎ’ ডিসেম্বর ১২ হায়বা নুমিৎ অসি মণিপুরতা নত্তনা অৱাং নোংপোকতা মৈতৈনা তাবা মফম খুদিংদা মরু ওইনা নুপীশিংনা নীংশিংদবা ঙমদে। নুমিৎ অসি নুপীশিংগী অমদি খুন্নাইগী মফমদদি চাওরবা থৌদোক নীংশিং নুমিৎ অমনি।

ইং কুমজা ১৯৩৯ গী হায়রিবা নুমিৎ অসিদা মণিপুরগী ইমা ইবেল নুপীশিংনা মতম অদুগী বৃটিশ অমদি লৈঙাক্কী মায়োক্তা উৎখিবা মখোয়গী থৌনা লীংজেল অদুনা ঙসিসু খুন্নাই অসিগী নুপীশিংদা মমিৎ মনা শীংহনবগী নুমিৎ অমসু ওইদুনা লাক্লি। মালেমদা লৈবাক কয়াদা নুপীগী ঈহৌ কয়া থোকখিবা য়াওখ্রে। অদুবু মণিপুরদি নিংথৌ লৈঙাক চৎনরিঙৈ মতমদগী হৌনা লান তোয়না থোকপা লম অমনি। মপানগী য়েক্নবশিংগা নত্তে হায়রগনা মনুংগী ঈ মরীশিংগী মরক্তা মকা ফোংনবু ওইরো, থনুংদা ওমশিন্দুনবু ওইরো লানগী নুংশিৎ অমদি লোয়চেন্নগল্লি। অদুনা হায়নরিবনি শাফম লানফম লৈবাকনি মণিপুর।

অনীরক শুবা ওইনা ইমা ইবেল নুপীশিংনা খুৎসু-খুৎলায় হেক ইপায় পায়দুনা লৈঙাক থৌশিলগী মায়োক্তা থেংনখিবা লান অদুনি পুৱারীগী নুপীলাল। ইং ১৯০৪ দা মতম অদুগী বড়সাহেবকী বাঙ্গলো মৈনা চাকখিবগী মতাংদা মৈ অদু কমদৌনা হৌখিবনো থিগৎপগী মহুত্তা লৈঙাক্না থোকখিবা হুকুম অদুগী মায়োক্তা নুপীশিংগী লান অহানবা ‘নুপীলাল’ হায়না ময়াম্না খঙনরি। মথং ইং ১৯৩৯ গী অনীশুবা নুপীলাল ইতিহাসকী লমায়দা শীংথাবা ওইনা রাজনীতিগী মমিদা খুন্নাই অসিবু য়াহৌরকপগী মরম অমসু ওইখি।

অদুবু অহানবা, অনীশুবা নুপীলালগী মতুং নুপীগী ঈহৌ অদু মুৎখ্রবরা তুমিন লৈখ্রবরা? লৈতে ঙসিসু মণিপুরী খুন্নাইদা নুপীগী ঈহৈৗ নুপীগী থৌদাং নুপীলাল লেপ্পা নাইদ্রি। ঙসিসু নিশাগী মায়োক্তা, কোরাপশনগী মায়োক্তা, আর্ম ফোর্সেস পৱার এক্ট মায়োক্তা ইরোম চনু শর্মিলাবু করম্না কাওগনি? ইতিহাসতি ঙসিমক নত্রবসু হয়েংদি শোয়দনা ময়ামদা মমি তারক্কদবনি। মসিমক্না ঙসিসু নুপীশিংবু থৌনা লীংজেল হাপকৎলক্লি।

কর্টেসি - মরূপ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু