আপডেট:
image

পুন্সি অমসুং খুনাইগী চেন্থরক্লিবা ঈচেলবু য়েক্লিবা মংসাতাবম সেমসন মীতৈগী “খোঙচৎ” সোলো আর্ট একজিবিসন, ২০২৩

মদম অমগী শকয়েং মিংশেল ওইরিবসি লমদম অদুগী কলা সংস্কৃতিদনি চাওখৎপগী লমওন চৈ ওইরিবসু কলচরনি অমসুং কলা অসিননি কলা সংস্কৃতিদা য়াওরি ঐখোয়গী নাৎ, চৎনবী, পুন্সি মহিং, লোল, ময়েক, ফিজেৎ চাকচা, খুনাইলোল চীনবুংদা পথাং পুথাং লান্না লাকপা ৱারী শিংবুল কয়া লেপ্তনা শম্থদুনা লাক্লি ঐখোয়গী কলা সংস্কৃতিদা। ৱারীসু লীরি মণিপুর খুনাইনা কমদৌনা হিংদুনা লাক্লিবা হায়বগী মসিগী ময়েক লারবা মমিসু তাদনা তোক্তে ঐখোয়গী ভিজ্যুএল আর্টতা অৱা-নুংঙাইনা থল্লবা, কপ্পা নোকপনা মফেল ফেল্লিবা তাইবঙ মীওইবগী পুন্সিদা ভিজ্যুএল আর্টকি কলা অসিনা মপাউ অমদি তম্লি অদুগা তাইবঙ পুন্সিবু  হেন্না ৱাহন্থোক লৈনবা মচাকশিং পীরি অহিংবা খুনাইগী লেপ্তনা চেন্থরক্লিবা ইচেলগী মশক অমসু উহল্লিবা অয়েকপা লাইশিংদা, স্কল্পচরদা অমদি তোঙানবা ভিজ্যুএল আর্টকি মেদিয়মশিংদা।      

 

অঙাং ওইরিঙৈদগী হৌনা লাই য়েকপা হায়বসিদা ঙাওজদুনা লাকখি সেমসনসু অফাওবা আর্টিসশিংগী লাই কয়া য়েংদুনা মতৌ তমদুনা য়েকলকখি পেন্টিং কম্পিতিসনশিংদা শরুক য়ারকখি ইং ১৯৯৫তগী হৌরদুনা কলাগী, ফাইন আর্টসকি লমসিদা মায়পুনদুনা লেপ্পা লৈতনা অমদি থৌনা লৈনা মহাক্কী খোঙচৎ অমদি হৌদুনা  লাকখি খোঙচৎ অসিদা চোকথবা লৈতনা চংশিল্লকলি ঙসিসু কলাদা লুপচবা নহা অমা ওইনা ইম্ফাল আর্ট কোলেজতগী গ্রাফিস্কতা স্পেসেলাইজ তৌদুনা বি এফ এ লোইশিনখিমসিগী মতুংদা ইন্দিরা কলা সঙ্গিত ভিস্বাভিদিয়ালায়া, খায়রাগার্হদগী গ্রাফিস্কতা এম এফ এ লোইশিনখি।  

 

মহাক্কী অয়েকপা লাইশিং অমসুং স্কল্পচরশিং তোঙান তোঙানবা আর্ট একজিবিসনশিংদা উৎখিবা লৈরে স্তেট,নেস্নেল অমসুং ইন্তরনেস্নেল থাক্কী আর্ট একজিবিসনশিংদসু লেপ্তনা শরুক য়াদুনা লাক্লিবা আর্টিস অমনি অসিতসু নত্তনা আর্ট একজিবিসন কয়াদা মনা মথুমশিং ফংদুনা ইকায়খুম্নবা ফংখ্রবা নহা আর্তিস অমনি। মহাকনা ফংখ্রবা নীংশিংনিংঙাই ওইবা মনা মথুমশিংগী মরক্তা মণিপুর স্তেত আর্ট এক্সপোজিসন এৱার্দ, মণিপুর স্তেত কলা একাদেমি এৱার্দ, ৮৩শুবা এন্যুএল ওল ইন্দিয়া আর্ট একজিবিসন এৱার্দ, অহানবা এম কে প্রিয়াব্রতা সিংহ মেমোরিয়েল আর্ট এৱার্দ অসিনচিংবা এৱার্দ কয়ানা ইকায়খুম্নখ্রবা আর্টিসনি সেমসন মীতৈ। মনিপুরদা ভিজ্যুএল আর্টকী লমদা হৌরক্লিবা আর্টিশ কয়াবু মখোঙ শোমদুনা হেন্না অৱাংবা থাক অমদা পুখৎনবা হোৎনরিবা আর্টকি লূপ অমা ওইরিবা আর্টস সোসাইতি মনিপুরগী অচংবা থৌমী অমা ওইদুনা আর্ট একজিবিসন কয়া শিন্নবা হোৎনবদা মহাক্কীসু চাওরবা থৌদাং লৌদুনা লাক্লি। অসিগুম্বা লূপ অসিগী ত্রেজরর অনীরকসু ওইদুনা হোৎনরকখি অমসুং জোইন্ট সেক্রেটরিসু ওইখ্রে। অদুগা আর্ট সোসাইতি অসিগী সেক্রেটরি ওইদুনা থবক থৌরম কয়াদা আর্টস সোইসাইতিগীদমক হোৎনদুনা লাকলি। হৌজীকসু সোসাইতি অসিগী একজ্যুকিতিভ মেম্বর ওইদুনা থবক কয়া পায়খৎলি। মনিপুরগী কলা সংস্কৃতিবু অৱাংবা থাক অমদা পুখৎনবা হোৎরিবা লৈঙাক্কী লোইশঙ অমসু ওইরিবা মণিপুর স্তেত কলা একাদেমিদা সেমসনসু স্তেন্দিং কমিতি অমসুং জেনরেল কাউন্সিলগী মেম্বরসু ওইরি। মনিপুরগী অমত্তা ঙাইরবা চাওথোকচনিংঙাই ওইরবা ভিজ্যুএল আর্টকি মহৈশঙ অমা ওইরিবা ইম্ফাল আর্ট কোলেজগী গ্রাফিক্স দিপার্টমেন্তা রেগ্যুলর ফেকল্টি ওইনা লৈদুনা মহৈরোই কয়াবু চোকথবা লৈতনা লমজিং লমতাকপীরি। মসিগী মহৈ ওইনা নহারোল কয়া ঙসিদি ভিজ্যুএল আর্টকি লমসিদা মশক নাইরবা অমসুং মনিপুরবু মালেমদা মশক তাকপদা মখোয়সু থৌদাং লৌরক্লি। মসিমক পুকনিং থৌগৎনিংঙাইনি।

 

ইংনা চিকনা লৈজননিংবা মণিপুর খুনাইদা অমম্বা অহিংগুম্না মংলাকনখিবা থৌদোক কয়া মিৎমাংদা থোকখ্রে। নীংশিংলুবদা অকি-তুজুংনিংঙাই ওইরবা থৌদোকশিংদু করম্নদি হেক কাওবা ঙমগনি। মুৎপদি নাইরোই তমথিরবা মীনুংশি য়াওদ্রবা ৱারীশিংদু। তমথিরবা আর্ম ফোর্সেস স্পেসিয়েল পাৱর এক্ট ১৯৫৮কি মরুমদা মরাল লৈজদ্রবা মীচম কয়াগী পুন্সি কয়া ইন্সরজেন্সি লাকশিনবগী মিংদা খাংউথক্তা পিখম্নহনখিবা, মসিনা মরম ওইদুনা খুনাইদা ওইহল্লকখিবা অকি-তুজুংনিংঙাই ওইরবা থৌদোকশিং মমি তাদনা তোক্তে আর্টিসশিংগী কেনভাস্তা। মংসাতাবম সেমসনসু অসিগুম্বা খুনাইগী লুরবা তাংককশিংদা তুমিন্না লৈথোকপা ঙমখিদে। অদুনা মহাক্কি কেনভাস্তা মমি তারকখি তম্থিরবা ব্লেক লো অমগী মখাদা মণিপুর খুনাইদা হিংলিবা মীচম মীয়াম্না কয়া য়াম্না অৱাবা মায়োকনরিবা, অহিংগুম্না অকিবা ফাওরিবা, মংলাকনগুম্না পোত্থাফম খঙদ্রিবা হায়বদু মহাক্কি আর্ম ফোর্সেস স্পেসিয়েল পাৱর এক্ট ১৯৫৮ হায়রিবা পেন্তিং অসিদা। অসিগুম্বা পেন্তিং অসিদা তারিবা মণিপুর খুনাইগী অশেংবা শক্তম অমদি মচুশিংনা ইরিবা চেনবা য়াদ্রবা অকিবনা থল্লবা পুৱারী অসিগীদমক লেমজনিংঙাই ওইরবা মণিপুর স্তেত কলা একাদেমি এৱার্দ ২০১৫সু খুৎশিন্নখি সেমসনদা। গ্রাফিক্সতা স্পেসেলাইজ তৌরকখিবা আর্টিস অমা ওইবনা মহাক্কি অয়েকপা লাইশিংদা য়াম্না ইন্ত্রিকেট ওইবা খুৎয়েক অমা হেক হেক উবা ফংই লাই অয়াম্বদা। মহাক্কী বেড দ্রিম অসিদসু অসিগুম্বা এবস্ত্রেক ওইবা থিমদা মং-হাদা উবা মশক অমা য়েক্লি। অদুগা লৈঙাক্লোন হায়না মিংথোনবা লাই অসিদসু ফম্নাই থৌগল তৌরিবা অচৌ অশাং কয়াগী পুন্সিগা মীচম মীয়ামগী পুন্সিগা লৈরিবা গেপ, হং লাইগুম্না মখোয়না শান্ননিংবা মওংদা লৈঙাক্লিবা অদুগুম্বা সিস্তেম অদুগী ময়েক লারবা মশক অমা উবা ফংই। অচুম্বদি করিনো হায়বা খঙলবসু লেম্লৈ ঙানা লাইজ ঈরোন্নুংদা ৱা ঙাংগে তৌবদা ঈশিংনা পল্লি হায়বগুম্না মীচম্না মীয়াম্না অশেংবা অচুম্বা ৱা হায়বা ঙাংবা ঙমদবগী মতৌ অদুসু ফোংদোক্লিবা লাই অমনি লৈঙাকলোনঅসিগুম্বা ৱাহন্থোক লৈরবা লাই অসিদা অহানবা মহারাজকুমার প্রিয়াব্রতা মেমোরিয়েল এৱার্দসু ফংখি।  

 

মনিপুরদা মরু ওইনা ভিজ্যুএল আর্টকি খোঙচৎ অমদি হৌদুনা তপ্লবসু তপ্না লেপ্তনা লাক্তুনা ঙসিদি মলেমগী হোংলক্লিবা য়াওলদা ঐখোয়গী আর্টিসশিংসু থৱায় য়াওনা চংশিন্নরকলি। ইন্দিয়াগী মরু ওইবা আর্ট ইন্সতিত্যুটশিংদা তম্লুদুনা অমসুং লেপ্তনা তম্নরক্তুনা তোঙানবা মনিপুরগী আর্টকি মশক অমদি লেপ্পা ঙম্লক্লি। অসিগুম্বা ইহৌ অসিদা লমদম অসিগী আর্টিসশিংবু হেন্না মশক তাকপদা মতেং ওইনবা অমদি পুকনিং থৌগৎপগী খোঙথাং অমা ওইনা ওজা শিজগুরুময়ুম ইমোবী শর্ম্মনা মহাক্কী আই আর্ট গেল্লরিদা শকনাইরবা আর্টিসশিংগী সোলো আর্ট একজিবিসন শিনবা হৌরক্লি। অসিগুম্বা খোঙথাং অসিগী শরুক অমা ওইনা নহা ওইরিবা আর্টিস মংসাতাবম সেমসন মীতৈগীসু পুন্না অয়েকপা লাই অমসুং স্কল্পচর য়াওনা আর্ট ৱার্ক ৭০ হেন্না হৌখিবা ফেব্রুৱারি ১৯-২৩, ২০২৩দা থাংমৈবন্দা লৈবা আই আর্ট গেল্লরিদা উৎখি। একজিবিসন অসিগী মিংথোলনি খোঙচৎ। মিংথোল অসিমক ওন্থোকনা চান-চুননা থোনখি। লেপ্নাইদ্রবা পুন্সি খোঙচৎ অমসুং খুনাইগী চেন্থরক্লিবা ইচেলবু মহাক্কি কেনভাস্তা লাচল্লি চেকশিন্না। এক্সিবিসন হৌদোক্লদুনা আর্ট এন্দ কলচরগী মনিপুর লৈঙাক্কী কমিসনরসু ওইরিবা এম জোয়না মনিপুরগী আর্টিসশিংনা অসিগুম্বা আর্টকি ইনিসিএতিব কয়া লৌখৎলকলিবা পুকনিং থৌগৎখি অমদি লৈঙাক্কি মায়কৈদগীসু পাংথোকপা য়াবশিং পাংথোকনবা হোৎনগনি হায়বা ৱাফমশিং ফোংদোকখি। অমসুং অসিগুম্বা সোলো একজীবিসন অসি পাংথোকপগী তঙাইফদবা লৈ হায়বিখি। মশক থোকপা লৈবাক মীয়ামগীদমক লাই য়েকপা হায়বসিসু য়াম্না মরু ওই হায়খি। হেন্না পুকনিং থৌগৎনিংঙাই ওরিবদি হায়রিবা সমসনগী সোলো আর্ট একজিবিসন অসিদা লমদম অসিগী মীয়াম্না শকখঙনরবা শকনাইরবা ভীজ্যুএল আর্টিসশিং মরু ওইনা ওজা থোইদিংজম তোম্বী, ওজা য়েন্দ্রেম্বম ইবোচাওবা, য়ুম্নাম নবাচন্দ্র, কুলচন্দ্র এম থেম, আর কে বুদিমন্তা কর্তা অসিনচিংবা কয়ানা সমসন মীতৈগী সোলো একজীবিসন য়েংবা লেংবীরক্তুনা পুকনিং থৌগৎপীরম্বসিমক য়াম্না নুংঙাইবা মিকুপ অমনি নহা আর্টিসশিংদা। অমসুং লমদম অসিগী নহারোল আর্টিস কয়াসু একজিবিসন অসিবু পুকনিং থৌগৎপা ওইনা য়েংবা লাকখি। নুমিৎ ৫নিখক তৌরম্বা খোঙচৎ সোলো একজীবিসন নুমিৎ ৫নি অমগা অমুক শাংদোক্তুনা মখা তানা আর্ট লভরশিং অমসুং মীয়ামদা য়েংনবগী খুদোংচাবসু পীখি। মসিমক য়াম্না পুকনিং থৌগৎনিংঙাই ওইখি। মতুংদসু সেমসন মীতৈগী থাক ৱাংলবা ভিজ্যুএল আর্টকি পোত্থোকনা মনিপুরবু হেন্না মশক তাকপা ঙম্বা লাই কয়া য়েক্লকখিগনি হায়না অচেৎপা থাজবা থমজরি।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: