image

নুংশিবগী ঈরিক খিকনিংলিবা লাইরিক “থাজগী পাউজেল” লাইরিক অসিদা মিৎয়েং অমা

অইবাঃ এম অজরুন কবীর

লাইরিক্কী মমিং- থাজগী পাঊজেল (২০১৮)

অফোঙবাঃ রাইটর্স য়ুনিয়ন, মণিপুর

লাইরিক্কী মখলঃ শৈরেং

লাইরিক্কী মখূমঃ বশন নোংমাইথেম

লাইরিক্কী মমলঃ লূপা ২০০/-

লমায় মশিং- ১৪২

 

মীরোল কয়া হৌখ্রে। কয়া অমদি লেপ্নাইদা লাক্লি ঙসিসু। থৌদোক ৱাথোক কয়ানা পিক থল্লি মালেম  পুম্বা। নীংশিংবা খরদি অদুম নীংশিংদুনা লৈগনি অদুগা অকাওবগী ঈরোন্নুংদা লুপখিদুনা নীংশিংবা  ঙমদ্রবা ৱারী কয়াসু লৈরি। মীওইবনা চাওখৎলে হায়না নাপলদি তৌরি। অদুবু নুংশিনবা হায়বসিমদি  মী মশেল মরক্তা, লাইনিং লম্বী তিন্নদবা মরক্তা, কাংলুপ ফুরুপ মান্নদবা মরক্তা, লৈবাক মশেল মরক্তা অদুগা য়ূমলোন্নরিবশিংগী মরক্তা লোয়নমক নত্রবসু হেক হেক মমি শামখিদুনা য়েংথিনবা, তাথিনবা,  খৎনবা করিগুম্বদা মীশি মীনা ফাওবা থোক্তুনা লৈবাক ৱাথোক ওইবা থৌদোকশিং য়াওদবা নত্তে।  অসিগুম্বা নুংঙাইতবা থৌদোকশিং অসি থোকলকনবগী মরমদি মীওইবা হায়বসি মহৌশানা মশাগীতা  কা হেন্না খল্লি। ওইজবা থি, মালেম পুম্বা মশাগীতা ওইনিংই। মীগী ফত্তনবতা তৌরগা নুংঙাইজবা মীসু লৈ, ঐ পাঙ্গল কল্লবনি হায়না উৎনিংবা অচাওরম কাবা মীসু লৈ। অতোপ্পবু ওৎ-নৈরগা নুংঙাইজবা মীসু  লৈতবা নত্তে। লমন খুম্বা হায়বসিদা মালেমসি লাঞ্জাও কয়া থোকখ্রে। হৌজিকসু লাঞ্জাও কয়া উংখৎনবা লেপ্তরি। লাঞ্জদ্রবা মীচম মীয়াম কয়া অশি-অনা থোকখ্রে। লুচিংবা শাবশিংনা মখোয় মখোয়গী পাঙ্গল  চাংয়েংবদা অৱাবগী ঈপাক্তা ইরাকনরিবশিংদি মীচম মীয়াম্নি। লানগী চৈথেংদি ঙসিসু লোইদ্রি। মীওইবনা শিগনি হায়বসি কাওদুনা শন্দোক্লিবা নাপলগী লোয়লম অসিদগী মীওইবা খুনাইবু কঞ্জনিংবা মীওই কাংলুপ লৈতবা নত্তে। মখোয় অদুগী মপাউদি মশিং য়াম্লবা চাওখৎপতনা নুংঙাইবনি খনবশিংদি মখোয়না ঙাংবা হায়বা, ইবা অমত্তা তানিংলুদে। অদুবু হায়দবদি য়াদে, ইদবসু য়াদে। অদুনা এম অজরুন কবীরসু তুমিন্না লৈবা ঙমদে। মহাক্কি কলমদগী থোক্লকলি কংবা নাইদ্রবা নুংশিবগী শৈরোলশিং য়াওরবা থাজগী পাউজেল পুন্সি হায়বসি পাউজেল অমমমদি লোয়নদুনা লাক্লিবনিকরিমতা থমলমদনা তুমিন্না চৎখিবা পুন্সি অদুনসু পাউজেল অমদি পিরম্লি হিংলিবশিংদা পাউখোংসু চল্লি লেপ্তনা থোক্লিবা পুন্সিগী থৌদোকশিংনা

 

এম অজরুন কবীর, লিলোং উশোইপোকপী, থৌবাল দিস্ত্রিক্টতা ১৯৫৪দা পোকই মূঃ অব্দুল কাদির সহা অমসুং মেহেরবানি অনীগী মচা নুপা অহল ওইনা ফংজখি মহৈগী থাকনা বিএসসিনি মণিপুর সরকারগী রুরেল দিভলপমেন্ট অমসুং পঞ্চায়তি রাজ দিপার্টমেন্টকী ইন্সপেক্টর পঞ্চায়ট ওইনা থবক্তগী পোত্থারে

লাইরিক ইবা, পাবা অমসুং খুনাইগী চাওখৎ য়াওনগীদমক লেপ্তনা হোৎনবনা মহাক্কী অপাম্বনি নুংতিগী ফোংনরিবা পাইচেশিং পোকনফম সঙাই অসিনচিংবদা শৈরেং, ৱারেংনচিংবা ইদুনা মরক মরক্তা ফোঙই মনিপুরী খোরিলোল চাওখৎনবা হোৎনরিবা লূপশিংদসু মরু ওইবা থৌমী ওইদুনা থবক থৌরম কয়াদা থৱায় য়াওনা থৌ পাঙথোকলি

 

কবি এম অজরুন কবীরগী থাজগী পাউজেল হায়রিবা লাইরিক অসিদা পুন্না শৈরেং ৬৪ য়াওরি। শৈরেং অয়াম্বা য়াম্না চংখোন্না খ্বাইদগী ফজবা লোন্না হায়নিংলিবা ফোংদোকনিংলিবা পুম্নমক অপাবশিংদা লায়না ফোংদোকপা ঙমহল্লি। লাইরিক্কি মিংথোল ওইরিবা শৈরেং থাজগী পাউজেল অসিদা কবিনা মালেম তাইবঙপান অসি হেক শেমলকপদগী লৈরক্লবা নুমিৎ থা থৱানমিচাক পুম্নমক অসিগী মরক্তা মীওইবসু হিংলদুনা লাক্লিবসি চহী লীশিং কয়া কয়াগী মমাংদগীনি অদুবু মীওইবগী নাপল, অচুম্ববু নাথৈবা, অরানবনা লমজিং ওইবা, অমম্বদা হেন্না হৈনবা লীচৎ অদুগী খনবদা নুংনাংলি। মসিদা থৱায় ৱাজরিবসি নোংমদোল অতিয়াদা ইংনা মেংনা থোক্লিবা থাজ মহাকনি অতৈ কনানসু নত্তে। হৌখিবা যুগ কয়া কয়াদা থোকখ্রবা থমথিরবা লাঞ্জাওশিং, হাৎনা-শুনবা, মীওৎ মীনৈ ;  কাংলুপ ফুরুপ মান্নদবা কয়ানা অমত্তা ওইনা লৈমিন্নরিবা ভারতকুম্বা লৈবাক্তা ওইরক্লিবা শক চু মান্নদবা মাশেল হন্থনা য়েংবা উশিৎনদবা, নুংশিনদবা; য়েংথিবা, হৌজিক হৌজিক থোক্লিবা থৌদোক পুম্নমক থাজ মহাকনদি উরি। অদুনা হায়রক্লি, ঐনা উরক্লিবা পূম্বসি নীংশিংলুরগা/ পুকনিংসি লাঙতকনৈ ঙসিসু/ নখোয়গীদমক খনবদা।/ ঐদি কোয়না চৎপনি,/ মালেম পুম্নমকপু য়েংদুনা/ নুমিৎ, থা, চহি, চক লীশিং লীশিং পোত্থাবা লৈতনা।/ ঐনা উখিদববু করিবু লৈখিবগে?/ সোক্রেটিশনা অচুম্বা হায়রুবগী পুন্সি লোমখিবা,/ অসিগুম্বা থৌদোক লীশিং কয়ানি ঐনা থম্মোয় শোকনা য়েংখিবা।/ লৈনম চাউবী, অচুম্বগী মশাইগোন,/ নঙোন্দগী হৌখিবা অচুম্বগী পাউজেল.../ বুধা, মহাবির, গান্ধী... নঙগী অচুম্বগী শক্লোন লীশিং লীশিংগী/ লেংদ্রবা খুবম্নি নঙদি হে! ভারত। (লাঃ ১৩৫) নোংমদোল অতিয়াদা থোক্লিবা থাজবু পর্সস্নিফাইদ তৌদুনা ভারতকুম্বা দিমোক্রেসি চৎপা চাওখ্রবা লৈবাক অসিদা লৈরিবা খুদিংমক্তা হায়হল্লকলি হংলকলি, পুৱারীগী তাঙ্কক অমদা,/ অরয়ানগা ড্রাবিদিয়ানগা লান শোকনখি,/ ঙসিসু অরয়ান ড্রাবিদিয়ান হাৎনগদ্রা?/ অৱাং নোংপোক্কী শকমান্নদবা নরৈবাকচাশিংবু/ মীরাইবীবা হাৎপিবা,/ নুংশিনবগী খুদম্লা, লিংজেল মান্নবগী প্রমাল্লা?/ হিন্দু, মুস্লিম খৃস্তিয়ান, জাতি খুদিংমক নুংশিনদ্রগা/ লৈবাক্কী পাঙ্গল কনগদ্রা?/ পুৱারীদি অমুক হল্লকই হায়নবগুম,/ লৈখা তাখিদনবা হোৎনহৌ/ নুংশিনবগী মরী তৎহনগনু। (লাঃ ১৩৭) পোকনফম লৈবাক ইমা ভারতপু মপাঙ্গল কন্না লৈহননিংবা পুকনিং ইহুল অমা অরোইবদা ফোংদোক্লি শৈরেং অসিনা অদুগা পীনিংলিবা পাউজেল থাজ মহাক্কি মেংলবা থাবল মঙালগুম্না মালেমসিদা লৈরিবা মীপুম খুদিং নুংশি চান্না-চিন্ননা লৈমিন্নবদুনি কবিনা পামজরিবসু। শান্তি হায়বদুদি মতোমতা লাক্কনি পুকনিং থম্মোয়দা নুংশিবদুনা লেংদনা লৈরবদি।

 

অরাংফম পুরেল শাবা ময়াম্না লুচিংবনি হায়না থোক্লক্লি লৈবাক্কি থৌশিল থৌরাং কয়াবু মখোয়না লমজিংলিবনি, পোরম য়াৎলিবনি হায়দুনা। কোৎ লীৎপা তাই পুনবা কয়াসু লৈঙাকলোন খঙবদি মখোয় নত্তনা লৈতে হায়দুনা অরাংফম পুরেল ময়ামদা পাউতাক কয়া পীরি। লন থুম লেম্না লাকপা কয়া শয়েং ঙায়েন্নরি। নুংশিবা শারি লৈবাক মীয়াম। মমা লৈবাক নীংবসি মখোয়তনা হেল্লবগুম ৱআ-পাঊ শন্দোক্লি। পুম্নমক অসি কবিশিংনা অইবশিংনা খঙই, উই। নঙ হুরানবনি হায়জবদি পাঙ্গল লৈতে। শোয়রে হায়বদি খঙই। অচুম্বা লম্বীদা লাকহনবদি য়াদবা লৈতে। অদুবু অরানবসি চৎনবীগুম্বা শেমখিবদা নুংঙাইজদে। অদুনা রাজনিতি তৌরিবা মরিল চুমদবা কনাগুম্বা লুচিংবা শাবা অমনা হায়হল্লক্লি ললোনপোৎ হায়রিবা শৈরেংসিদা, মখোয়বু ঐনা লোন্না য়োল্লুরে হায়বসি/ মখোয়দি করিসু খঙজবা নত্তে।/ মখোয়বু মমল তাংনা  লৈবিরে হায়না/ হরাওবনা লোয়রবনি মখোয়দি।/ অপঙবগী মরল অশিংবনা চাই হায়বদুনি।/ ঐনা মখোয়বু চহী মঙা খুদিংগী/ লৈবগা য়োনবগা, লৈবগা য়োনবগা/ হঞ্জিন- হঞ্জিন তৌবদা ফংলকপা শেন্দোংনা/ ঐগীদি মনুংদা মপান্দা,...লোন্না, ফোংনা পৈরিবসিনি। ঐনা তৌরিবসিসু/ মখোয়না য়াবগী তৌরিবনি,/ ঐগী করি ইরালনো?? (লাঃ ৯) অরোইবা শৈরেং অসিগী পরেংসিদা ৱাহং অমা হংহল্লি রাজনিতি তৌরিবা অদুনা। ৱাহং অসি মীয়ামদনি। মীকপ থোকপা অমসুং অফবা মীহুৎ খনবগী মতমদু থেংমল্লে হায়বনি।

 

মণিপুর, মহৌশাগী সনা লৈবাক অদুদি ওইদ্রে হায়বসি ঙসিগী মীরোল নিংফুং নিংফুং ঙাংনরক্লি। মরমদি ঐখোয়গী হৌরক্লিবা নহারোলশিং অয়াম্বা নিশাগী ঈপাক্তা লুপ্তুনা য়াম্না কিনিংঙাই ওইবা ফিভম অমদা লাক্লিবনি ঙসি। চাংচত্তা য়েংবদা হৌরক্লিবা নুপামচা নুপীমচাশিং নিশাগী কোমদা পুত্থদুনা লৈবা মীপুম খুদিংনা থেংনরবা শক্তম অমনি। অসিগুম্বা খুনাইদা ওইরক্লিবা লুরবা তানফমসিদা কবিসু তুমিন্না য়েংদুনা লৈবা ঙমদে। অদুনা তেংথারক্লি ইমা মণিপুর মহাক্কি তুংগী মরাইবকসে করি ওইগদগে হায়না। মতম অমদা চিনাসু ওপীয়মগী নিশানুংদা লুপ্তুনা মাংলবা লৈবাক অমা ওইরুরে অদুবু অফবা মহৈ মশিননা লমজিংদুনা লমতাকপিদগী ঙসিদি অঙকপা চাওখৎলবা লৈবাক হায়বদু ওইরক্লি। অদুনা কবিনা ইরক্লি সনা লৈবাক মণিপুর মিংথোনবা শৈরেংসিদা, তুম্লুবা নৎত্রা চিনাসু/ ওপীয়মগি নিশানুংদা?/ ঙসিনা অমুক এসিয়াগী কৈরেন!/ মতমদুগী চিনাগী অঙাং/ ওইরেদো ঙসিদি চিনাগী য়ুম্বী,/ অচুম্বা শিক্ষা পীখিবনা চিনাগী কৈরেন।/ মতমদুগী মনিপুরগী অঙাং/ ওইরেদো ঙসিদি মনিপুরগী য়ুম্বী/ শেরান্নবা লমজিং পীখিবনা শুম চারবা য়ুম্বী,/ ওইরেদো ঙসিদি মেণ তাদ্রবা মণিপুর/ ইমা! মসিনিনে নঙগী নীংঙমদ-মৈচাক্কী হৌরকফম/ মৈরিনিনে চাক্লিবসে উদব্রা,/ হে! পলেম ইমাগী মচাশিং? (লাঃ ২৯) অদুনা অফবা মহৈ মশিন তাকপি তম্বীদুনা মনিপুরসু মহৌশাগী সনা লৈবাক মনিপুর হায়বদু অমুক্তংদি ওইহঞ্জনিংলি। অদুনা কবিনা ইমা মণিপুর মহাক্কি খুয়া থম্বালদা নুংশিনা থৌনিজরক্লি, পীবীয়ুনে অচুম্বা লমজিং,/ তাকপীয়ুনে অচুম্বা পোরম।

 

তুরেলশিংনা তেংথারক্লিবা, লোইবী চীংজাওশিংনা অয়ো- নাহেরক্লিবা অমদি চীংয়া তময়ানা হিকনা হিকনা কপ্পগী খোঞ্জেলদি কবিশিংনা তাদনা তোক্তে। মহৌশা লাইরেম্বী ইমানা তেংথারক্লিবসি কুইরে। অইং অশাগী খল কায়বসু য়াম্না কুইরে। অসোমদা মীওইবা মহাক্তি চাওখৎপগী নাপলদা হিংলি ঐ মঙাইরে হায়বসিদা। তুরেলশিংনা তৌরম্বা খুদোল ঙসিদি ঙম্নমক কাওথোকখ্রে মীওইবনা। ইম্ফাল ময়োলদা ইংনা লিরি খোইরিনা চেল্লম্বা নম্বুল তুরেল ঙসিদি খ্বাইদগী মোৎপা, হু চেল্লবা তুরেল ওইনা শকখঙলে। মসিদা তেংথাদবা শুকঙম ঙমদে তুরেল মহাক্কীদমক কবিনা। অদুনা তেংথারক্লি চাওখৎলকপগী মচুম হায়না মিংথোনবা শৈরেং অসিদা, চাওখত্রিঙৈ মতমদা,/কৌবীরম্মী ঐবু পুক্তপ্পী হায়না।/ ঐগী লূরবা লাইজদু,/ থকপীরম্মী থম্মোয় পেন্না।/ চাওখৎপগী মতম অসিদদি,/ কৌবীরে ঐবু নমথিবী নম্বুল।/ হূগী মহী, অপূম্বা মচুম.../ পৎহল্লে ঐগী ইপুক ইরিল।/ অসিরা হে! মীওইবা!/ নখোয়গী চাওখৎলকপগী মচুম হায়বদো? (লাঃ ৪৩)

 

মহৌশা খুৎশেম্বু নুংশিজবা, মালেম তাইবঙপান অসিবু নুংশিনা খঞ্জবা, তাইবঙ মীওইবা ফুরুপ কাংলুপ পুম্নমক নুংশি চান্ন-চিন্ননা লৈহননিংবা অদুগুম্বা পুকনিং ইহুলশিংনা মরাং কায়না য়াওরবা শৈরেং কয়ানি লাইরিক অসিদা য়াওরিবসি। অপাবশিংদা নৌহৌননা ৱাখল খন্থহল্লি পুন্সি হায়বসি করিনো, মালেম অসিদা ঐখোয়না হিংলিবসি করিগীনো হায়বনচিংবা কয়াগী মতাংদা। পুম্নমক অফবতা ওইহন্নিংই। মসিনি কবিগী পুকচেল অমদি থম্মোয়। মনিপুরী খোরিলোলদা অসিগুম্বা লাইরিক কয়া খুদোল লেপ্তনা তম্বীরক্কনি হায়না থাজবা থমজরি।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু