image

নট সংকীর্তন শৈশকপী এলাংবম সনাহনবী দেবীদা মণিমচা এৱার্দ খূৎশিন্নখ্রে

ইম্ফাল, ফেব্রুয়ারি ১ : লমদমসিগী শক্নাইরব নট সংকীর্তন শৈশকপী এলাংবম সনাহনবী দেবী (ৱাবগাই সনাহনবী) দা থোকচোম মণিমচা মেমোরিয়েল ট্রাস্টনা ঙসি সঙ্গীত রত্ন (নট সংকীর্তন) এৱার্দ পীদুনা ইকায়খুম্নবা উৎখ্রে।

ঙসি খূৎশিন্নখিবা এৱার্দ অসিদা শেল ওইনা লুপা লীশিং ১০, সাইতেসন অমা অমদি ইন্নফি অমা য়াওরি। মনা অসি ঙসি থোকচোম মণিমচা মেমোরিয়েল ত্রাস্টনা শীন্দুনা পাঙথোকখিবা ১২শুবা থোকচোম মণিমচা দেথ এন্নিভার্সরী থৌরমগা মরী লৈননা এলাংবম সনাহনবী দেবীদা খূৎশিন্নখিবনি।

শিংজমৈ মখা চোংথাম লৈকায়দা লৈবা শ্রীশ্রী জগন্নাথ দেব মন্দিরদা পাঙথোকখিবা থৌরম অদুদা জে এন এম দি এ, ইম্ফালগী দিরেক্তর পুখ্রম্বম বিলাস, নেসনেল এৱার্দি থাংশাবম অশংবী, নেসনেল এৱার্দি লাক্ষপতি, রাজর্ষি ভাগ্যচন্দ্র কালচারেল ফাউন্দেসন মণিপুরগী চীফ এডভাইজর বি অমুস্না য়াওনা শক্নাইরবা মীওই কয়ানা শরুক য়াখি।

ঙসিগী থৌরম অদুগা মরী লৈননা থোকচোম মণিমচা মেমোরিয়েল ট্রাস্তকী ফাউন্দার তখেল্লম্বর ইরাবতনা হায়, লৈখিদ্রবা থোকচোম মণিমচা লৈবাক অসিনা মশক খঙলবা শৈশকপী অমনি। শৈশকপী অসি লমদম অসিগী অহানবা হৈক্রু হিদোংবগী ঈশৈ শকখিবা মশক নাইবী শৈশকপীনি। শৈশকপী অসিন শক্লম্বা বাসক, নিমাই সন্ন্যাস য়াওনা তাঙলবা ঈশৈ কয়া থোকচোম মণিমচা মেমোরিয়েল ত্রাস্তনা মীয়াম অমদি তুংগী য়ুম্বীশিংগী খল্লগা য়ু টিউবতা আপলোড তৌরগা থম্লে। লৈখিদ্রবী অসিগী ঈশৈ অমদি ময়েকশিং অসি মীয়াম্না পাম্বীবা তারগদি ফাউন্দেস অসিনা লেম্না ফংহনজগনি।

লৈখিদ্রবী শৈশকপী থোকচোম মণিমচা খুন্নাই অসিদা নুপীশিংনা নুপাদগী তাদনা হীরম খূদিংদা থৌদাং লৌবা ঙম্মী হায়বা ৱাখল্লোন অসিদা চেৎনা থাজখিবা নুপী অমনি। চহী অসিদা পাঙথোক্লিবা থোকচোম মণিমচাগী লৈখিদ্রবগী নীংশিং থৌরম স্তেত অসিগী তোঙান তোঙানবা মফম ৪ দা পাঙথোক্লি। লোয়ননা লাক্কদবা চহীশিংদা থৌরম অসি খরগা হেন্না পাকথোক চাউথোক্না পাঙথোক্নবা থৌরাং লৈরে হায়নসু তখেল্লম্বম ইরাবতনা মখা তানা ফোঙদোকখি। ঙসি খুৎশিন্নখিবা এৱার্দ অদু রাজর্ষি ভাগ্যচন্দ্র কালচারেল ফাউন্দেসন মণিপুরগী জোইন্ত সেক্রেটারী থোকচম ধনকুমারনা কৎপনি হায়রি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু