ত্রিপুরাগী মণিপুরী কালচারেল সেন্টার শাবা লোইশিল্লগনি, মণিপুর ভবন অমসু শারগনি: চীফ মিনিষ্টার বীরেন
ইম্ফাল, জানুয়ারি ৩০ : ত্রিপুরাগী মণিপুরী কালচারেল সেন্টার শাবা লোইশিল্লগনি। মফম অসিদা মণিপুর ভবন শারগনি হায়না চীফ মিনিষ্টার এন বীরেন সিংহনা ফোঙদোকখ্রে। চীফ মিনিষ্টার এন বীরেন সিংহনা ৱাফম অসি ফেব্রুয়ারি ১৬ তা পাঙথোক্কদৌরিবা ত্রিপুরা লেজিসলেটিত এসেমব্লি মীখলদা বিজেপিগী মীরেপ ওইরিবা স্তেত অদুগী চীফ মিনিষ্টার দা: মানিক সাহাগী ঙসি মীরেপ-চে পীশিল্লুরবা মতুং ইলেক্সন রেল্লি অমদা শরুক য়ারুবগী খোঙচৎতা ফোঙদোকখিবনি।
সিট ৬০ লৈবা ত্রিপুরা লেজিসলেটিব এসেবব্লিগী মীখল অসিদা হৌজিক লৈঙাক পায়রিবা বিজেপিগী চীফ মিনিষ্টার মানিক সাহানা বোরোদোৱালি এসেমব্লি কনস্তিত্যুএন্সিদা মীখল থেংনগদৌরি। চীফ মিনিষ্টার এন বীরেন সিংহনা ত্রিপুরাগী স্তেত এসেমব্লি মীখলগা মরী লৈননা চৎখিবা খোঙচৎ অদুগী খুদোং চাবা লৌদুনা হৌখিবা ইং ১৯৮৮ দা মতম অদুগী চীফ মিনিষ্টার আর কে জয়চন্দ্রনা আগরতলাদা উরেপ উয়ুং তম্লম্লগা শাবা লোইশিনখিদবা মণিপুরী কালচারেল সেন্টারগী ফীবম য়েংশিনখি।
মণিপুরী কালচারেল সেন্টার অসি শাবা লোইশিল্লগনি। অদুগা ত্রিপুরাদা মণিপুর ভবন অমসু শারগনি হায়না এন বীরেন সিংহনা মফম অদুদা ফোঙদোক্লমখি। এন বীরেননা বিজেপিগী নেসনেল স্পোক্সপার্সন দাঃ সম্বিত পাত্রা অমসুং স্তেত অসিগী পি ঐচ ই মিনিষ্টার লৈশাংথেম সুসিন্দ্রোগা লোয়ননা আগরতলাদা লৈবা লাইনিংথৌ পুথিবগী লাইশঙদা চত্তুনা লাই খুরুমখি। মহাক্না মফম অদুদা লৈরম্বা মৈতৈশিংগা উনদুনা ৱারী শানখি। ত্রিপুরাদা লৈখ্রবা ঈগী মরী ওইরিবা ইচিল ইনাওশিংগা খঙহৌদনা উনখিবা অদুদা মহাক্কী পূক্নিংদা ফাওরকখিবা, মখোয়বু নুংশিবগী ৱাখল্লোন ফাওরকখিবা অমদি মহাক্না ত্রিপুরাদা লাকপদা মফম অদুদা লৈরম্লিবা মৈতৈশিংনা হরাওজবা নুংঙাইজবা অদুদসু অপেনবা পোকই হায়না এন বীরেন সিংহনা ফোঙদোক্লমখি।
ঙসি ত্রিপুরাগী চীফ মিনিষ্টার দাঃ মানিক সাহাগী নোমিনেসন পেপার ফাইল তৌবা অদুদা আসামগী চীফ মিনিষ্টার হিমন্ত বিশ্ব শর্ম্মা, বিজেপিগী নেসনেল স্পোক্সপার্সন দাঃ সম্বিত পাত্রসু শরুক য়াখি। চীফ মিনিষ্টার এন বীরেন সিংহ ঙসি আগরতলা এয়ারপোর্তটা থুংখিবা অদুদা পোর্টস, শিপ্পিং এন্দ ওয়াটারওয়েজগী য়ুনিয়ন মিনিষ্টার সর্বানন্দ সোনোৱালনা মহাকপু তরম্না ওকখি।
সোর্স: পোক্নফম
0 কমেন্ট:
কমেন্ট তৌবিয়ু