• 182
• ২১শে ফেব্ররুয়ারি ২০২৬ ইং
• Share on:

কবি ইরুংবম দেবেনগী অনৌবা শৈরেং লাইরিক “অৱাবগী চরৈ ফি”- লাইরিক অসিদা মিৎয়েং অমা -- তোংব্রম অমরজিৎ

মীওইবগী পুন্সিদি খোঙচৎ অমনি। তাইবঙ অসিমকসু অচৌবা থৌদোক অমনি। অদুনবু হায়নরি তাইবঙ লীলা ফম্বাকনি। খোঙচৎ অসিগী মনুংদা থেংনরিবা থৌদোকশিংনা পুন্সিদা ইতৎ তত্তনা পাউখোং চল্লি। পাউখোং অদু খরদং চুম্বা লানবা থিদনা ফোঙদোকনিংই পুন্সিনা হিংলিঙৈদা। অসিগুম্বা হায়দোকনিংবা ফোংদোকনিংবা পুকনিংগী ৱারোলশিং পুন্সি নুমিৎনা চীংয়া তমদ্রিঙৈদা মপাউ অমা তম্নিংলকই। অদুনা কবি দেবেনসু অসিগুম্বা নুংফাও অমা ফোংদোকনবা হোৎনরকই।

লাইরিক্কী মমিং- অৱাবগী চারৈ ফি (২০২৬)
অইবা- ইরুংবম দেবেন
অফোঙবা- মণিপুরী লিটরেরী সোসাইটি, ইম্ফাল
লাইরিক্কী মখল- শৈরেং
লাইরিক্কী মখুম- ৱাই গুনিন্দ্রো সিংহ
লাইরিক্কী মমল- লুপা ৩০০/-
লমায় মশিং- ১০০

অইবা ইরুংবম দেবেন ১৯৬৯দা পোকই। হৌজিকনা হৈরাঙ্গোইথোং অৱাং মাইবম লৈকায়, ইম্ফালদা লৈ। অনা লায়েংগী লমদা নৌনা দোক্তরগী মহৈ তম্লিবা মীরোল কয়াবু তাকপী তম্বীবগী থবক তৌই। মহাক এম দি (এনাটোমি)নি। মনিপুরী খোরিলোলদা য়াম্না নহা ওইনা ইবগী লমদা খোঙদারকই। অদুনা লমসিদা চংশিল্লকপগী মহৈ ওইনা মশাগী শৈরেং লাইরিক ১০ ফোঙখ্রে। ৱারীমচাগী লাইরিক ‘অতোপ্পা লাস্ট বস অমা’ ২০২৩দা ফোঙখি। মহাক্কী শৈরেংশিং মনিপুর মনুংদা ফোংবা অমদি মপাল লমদা ফোংবা এন্থোলোজিশিং, চেফোঙশিংদা লেপ্তনা হাপ্তুনা লাক্লি। সাহিত্য একাদেমিনা শিনবা  থৌরমশিংদা মনিপুরগী মপালদা মনিপুরী খোরিলোলগী মিহুৎ ওইনা শরূক য়াদুনা লাক্লি। অইবসি মণিপুরী লিটরেরি সোসাইতি, মণিপুরী সাহিত্য পরিষদ, নহারোল সাহিত্য প্রেমি সমিতি অমদি রাইটর্স ফোরম ইম্ফালগী লাইফ মেম্বরসু ওইরি। 
অইবনা মণিপুরী খোরিলোলদা তৌরিবা খুদোলবু শকখঙবা ওইনা মহাক্কী লাইরিকশিংদা তোঙান তোঙানবা মনাশিং ফংখ্রে। ২০১৮দা ‘হুইয়েন লানপাউ লিটরেরি এৱার্দ; জে ছী সনসম রোটারি এৱার্দ ফোর লিটরেচর (পোইত্রি); তায়েঞ্জম জয়েন্তা পোইত্রি এৱার্দ; ২০২০দা সাহিত্য একাদেমি এৱার্দ; ২০২১দা মনিপুর স্তেট এৱার্দ ফোর লিটরেচর অমসুং ৱারিবম মৈনো শৈরেংগী মনা ২০২৩নি। 
‘খুঙ্গংগী মপাউ’ হায়না মিংথোনবা শৈরেং লাইরিক অমা ২০২০দা ফোংখ্রবা মতুংদা হন্দক ফোংলক্লিবা শৈরেংগী লাইরিক ‘অৱাবগী চরৈ ফি’ হায়না মিংথোনবা লাইরিক অসিনা অইবগী ১১শুবা শৈরেং লাইরিকনি। শৈরেং ইবদা পুকনিং লুপচবা অশৈবা কবি অমনা শৈরেং লাইরিক ১০ হেন্না ফোংলকলিবা অসি তরাই তরাইবা থবক অমদি নত্তে। অচেৎপা পুকনিং থম্মোয় অমগী শাফু কল্লবা ইহুল অমদি উবা ফংই।  
মীওইবগী পুন্সিদি খোঙচৎ অমনি। তাইবঙ অসিমকসু অচৌবা থৌদোক অমনি। অদুনবু হায়নরি তাইবঙ লীলা ফম্বাকনি। খোঙচৎ অসিগী মনুংদা থেংনরিবা থৌদোকশিংনা পুন্সিদা ইতৎ তত্তনা পাউখোং চল্লি। পাউখোং অদু খরদং চুম্বা লানবা থিদনা ফোঙদোকনিংই পুন্সিনা হিংলিঙৈদা। অসিগুম্বা হায়দোকনিংবা ফোংদোকনিংবা পুকনিংগী ৱারোলশিং পুন্সি নুমিৎনা চীংয়া তমদ্রিঙৈদা মপাউ অমা তম্নিংলকই। অদুনা কবি দেবেনসু অসিগুম্বা নুংফাও অমা ফোংদোকনবা হোৎনরকই। লাইরিক অসিগী অহানবা শৈরেং ওইনা য়াওরিবা ‘লৈরি অৱাৎপা অমদি’ হায়বসিদা কবিনা ইরক্লি, “ নুমিত্তি অসুম থেঙজিল্লক্লে।/ হায়নিংবা কয়াসু হায়বা ঙমখিদে।/ হায়রকখিদরে/ হায়রক্কনি খঞ্জরম্বসু;/ ঙাইবদি লেপ্তে ঐহাক।/ লাকখিবনি পুন্সি অসিদা/ করিগুম্বা খরদি হায়গে খন্দুনা;/ হায়বদি ঙমজদরি হৌজীক ফাওবা।/ খঙদে করি ৱানো/ কনাদা হায়গদৌরিবনো।/…চত্তবদি য়াদে চত্তবদি য়াদে/ অসুম চৎলি ঐ মাঙলোমদা;…” (লাঃ ২) কবিনা হন্দক লাক্লিবা তাইবঙ মপোক অসিবু মমল য়াম্না লৌদুনা করিগুম্বা খরদি হায়নিংলি ফোঙদোকনিংলি। মদুনি শৈরেং অসিদা তারিবা মমিসু। পুন্সিদা থাজবা থম্লি। থৌনা হনবা লৈতে। 

মীওইবা খুদিং পুন্সিগী পান্দম অমা ফংনবা হোৎনরি। আশা তৌনরি অদুগা মঙ মঙনরি। আই সি য়ুদা লৈরবা অনাবা ফাওবা মঙ মঙলি। নোংমা কল্লকখিগনি থাজৈ। পাঙ্গল লাকখিনি, হিংখিগনি চেৎনা থাজৈ। ফনমক অৱাবা তমথিবা খুদোংথিবা ময়োকনরবসু মঙ মঙদবদি য়াদে। মরমদি ঐখোয় মীওইবগী পুন্সিনা পোলোইদা খূয়া তুশিৎনা নুংঙাইবা হিংবগী আশাদনি হোৎনরিবা খুদিংমক। কবি দেবেনসু অসিগুম্বা থিম অসিদা নকশিল্লদুনা ইরক্লি ‘মঙ মঙববু করিগী কিরুনি’ হায়না মিংথোনবা শৈরেং অমা। মতমসিগী খুনাই অসিগসু য়াম্না নকশিন্নবা থিমনি হায়নিংই। মনিপুর হিংবদা ইংনা য়াইবী মরা তপ্না নুংঙাইনা হিংবা হায়বদুমি হৌজীক্কি ওইনা উবা ফংদ্রি। ইরাং অমা লোয়খিবদা হেন্না শাথিবা অমনা হেক্তা মহুৎ শিঞ্জিনখি। লৈঙাক মরা চেৎতে। তংদু লৈতাবা হায়বদু ওইবা ইঙম ঙমদে। মীয়াম, মীপাই থবাইগী পুন্সি মহিং অমদা হিংদুনা লাক্লি। অসিগুম্বা চরাংনবা, নে তাদ্রবা মরক্তা আশাদি পুদুনা লাক্লি কবিনা থৌনা অমা ইরোয়নদুনা। অদুনা হায়রক্লি, “ তুমথবা কিরবরা নহাক/ অকিবা মঙ মঙগনি খন্দুনা?/ অদুবু ঐদি কিদে মঙ মঙবা।/ মৈহৌরোলদগী লৈরক্লবনি/ অৱাবা নুংঙাইবা/ করিগী কিরি নঙনা হিংববু?/ শিগদবা লৈরে/ নোংমা নৎত্রগা নোংমদি।/ ঙাইহাক্তং পোত্থাখিসি/ অৱা-অনা পূম্বা নমদগী থারদুনা।/ ঙাইখিসি নুংঙাইবা মহাকনা/ লম্বী অসোমদা লাকপদুফাওবদি” (লাঃ ৬) 

সোসিয়েল ক্রিতিক অমা ওইনা কবিশিংনা, অশৈবশিংনা খুনাই অমদা থেংনরিবা অশোয়বশিং, অরানবশিং, অহান অকোনগী থবকশিং শৈরেংদা ইরকপদা অপাবশিংগী থম্মোয়না ৱায়েল তৌরকই। চুম্মি কবি অসিনা ফোংদোক্লিবসে হায়না। ৱার্ল্ড এনভাইরোমেণ্ট ডেদা উপাল খরা থারম্লগা নেম প্লেট থেৎলগা উমং য়োকখৎপা ঙম্লোই। মরমদি ঐখোয়না মহৌশা নুংশিরিবনি হায়দুনা পাংথোকলিবা থবকশিংদা থম্মোয় য়াওনা থবক তৌদে। ঙাইহাক ঙাইহাক্কী মমিংতগী ওইনা তৌরি। চিনগা খুৎকা মান্নবা মীদি মশিং য়ামদে। হায়রিবসি লৈবাক্কী লুচিংবশিংনি হায়দুনা লৈরিবশিংগী মরক্তসু অমহানি। লীলাগী নিংথৌ শাবগুম ৱাজাও ঙাংবা অমদি নাপলগী হী তোংদুনা লৈবাক খূনাইগী অফবা থবক তৌবদি ইয়াওবূ য়াওদে। লুচিংবনা মথৌ তৌরক্ত্রবদা কবি দেবেনসু সেতাইয়র অমা ইদবা ঙমলক্তে মরু ওইনা খুৎশেমগী ঈশিং ইচাও তোয়না ময়োকনরবা লমদম অসিদা মিৎয়েং থমদুনা। “ঈশিং –ঈচাঊ মন্ত্রী” হায়না মিংথোনবা শৈরেং অসিদা কবিনা মন্ত্রী এম এল এশিং, লৈবাক্কি ফম্নাইবশিং, লুচিংবশিংগী থৌদৌ, মখোয়গী লীচৎ অদু করেম্নদুনা ইরকপনি, “ হন্দক নোং কন্না তাবসিদা/ তুরেলগী তোর্ব্বানশিংসি/ থেমজিনবা য়াখিদ্রে।/ নীংখায়গে নীংখায়গে হায়রক্লে/ থৌওইবিদবগী পেন্দবনা…লৈবাক পুংজাউ থীল্লে/ ঈশিং-ঈচাউ মন্ত্রী লাক্কদৌরি/ তুরেলগী তোর্ব্বানবু মীৎয়েং তাগদৌরি…/ ঈশিং-ঈচাউ মন্ত্রী য়ৌরক্লে/ মাগী খোঙলোয় ময়ামগা লোয়ননা/ পে খল্লদুনা পেনা খোংলদুনা/ ধোন থীল্লদুনা।/ মীয়াম হূপ্না য়েংনৈ হিয়াঙ তান্নবগুম।/ য়েংঙু ঈশিং-ঈচাউ মন্ত্রী অসে য়েংঙু/ কয়াদা চীং লেম্লিবা/ লৈবাক মীয়ামগী কয়াদা খল্লিবা!” (লাঃ ১৩) হৌজীক হৌজীক থেংনরিবা ইসু অমনি। হার্দ রিএলিতি অদুনি। মন্ত্রী চীন্থিবা হুরানবা কয়াবু লাই লাকপগুম খল্লিবা মীকপ থোকত্রিবা মীয়ামদা মিৎ-না শিংনবা সেতাইয়র ওইনা ইরকপনি হায়না লৌদবা ঙমদে। মিনিস্তর এম এল এশিং পুম্নমক মীয়ামগী মীহুৎনি। মখোয় খূদিংমক অরাংফম্নি। লৈবাক্কী থৌশিল থৌরাং শেম্মু হায়বনি অদুগা ঈশিং –ঈচাউগী মিংদা, অকনবা নোংলৈ নুংশিৎনা য়ুম কৈ অমাং অতা থোকপগী মিংদা অৱাবা তারবশিংদা ফংহনগদবা তেংবাং শেল মপুং ফানা ফংহনবীবগী মহুত্তা মখোয়না নারোন্দা হুরানবা হায়বসি করি অফবা থবকনো। মসিনি নাকোইননা কবি দেবেননা কারেম্নরিবা। ঈশিং-ঈচাউবু হিয়াং কুমহৈরা হংলকপনি। খুনাই অসিগী অশোয়বসি অসিগুম্বা কয়া অসিননি হায়না ফোংদোক্লকপনি কবিনা। 
তাইবঙ মীওইবগী পুন্সি অসিমক অৱাবনা পীক থল্লি। অদুনবু হায়নরি অৱাবা শংবাই, নুংঙাইবা লৈতং। য়াইবী থৱায় মহাকনা মতম খরা কায়দোং ওইদুনা হিংলিবা তাইবঙগী হকচাং পোলাং অসিমক নোংমা অশিবা হায়বদুগী মতম অদুনা লাকপদা করিসু ওইবা নত্তে। অরোইবা মতম মহাক অদুনা লাক্লবদা হকচাং মাদি মালেম লৈবাক লৈশাদা, ঈশিংদা, নুংশিত্তা, অহাংবা মালংদা অমুক তিনখিনি। তম্থিবা হুরানবা রত্নকরনা ভাল্মিকি ওইখিবা, শিধর্ঠনা গৌটম বুদ্ধা ওইরকখিবা অসিদা উৎলিবসি মঙালগী লম্বেল অদুনি। তাইবঙ পুন্সি মশক খঙবসি তরাই তরাইবদি ওইদে। সাহিত্য নৈনবগী স্পিরিচ্যুএল অমদি ফিলোসোফিকেল ওইবা মিৎয়েংসু য়েংদবা য়ারক্তে। সাহিত্য হায়বসি পুকনিং থম্মোয় অমদি থৱায়গী ওইবা য়াম্না কুপ্পা মশক অদুনি ইরোইনদুনা চৎলিবসি। ফেক্স অমসুং ফিগর নৈনরগা য়ারক্তবা মতাংসু য়াওরি। অদুনা হায়নরিবনি “literature leads where  science ends” লাইরিক্কী  মিংথোল ওইরিবা শৈরেং “অৱাবগী চরৈ ফি” সিদা কবিনা মহাক্কি পুন্সিগী এক্সপরিয়েন্স অদু পুথোক্লদুনা চোই চাং ওল্লক্লি। ৱাহং হংলক্লি। পুন্সি অসিবু নুংঙাইবা কৌসিরা নত্রগা অৱাবনি হায়সিরা। কবিগী ৱারোইশিন্দা তারক্লিবদি অৱাবনি। মরমদি “হঞ্জিন হঞ্জিন শেৎপদা/ শেগায়রবা/ মফোৎ মফোৎ ফোৎলবা…” পুন্সিগী চরৈ ফি হায়বদু ওইরে। অসুম্না কবিনা হেঞ্জিন্না খঞ্জিল্লুরিবসি ঙসি ঐখোয়না হিংনরিবা পুন্সি মহিং অসিনা ওইহনবরা হায়বসিসু হংনিংঙাই ওই। মরমদি অফবা পাউ অমত্তসু তাদে। নুংঙাইবা ৱারী অমত্তসু শান্নদে ময়ামসে। অদুনা হায়রক্লিবরা কবিনা, “ পাদ্রিৎ পানা চারবা/ মসি ফাওনা য়েংবদা/ তাইবঙপান শূপ্না উরবা/ ঐগী লূ-তোংদা নপশিনখ্রবা/ ঐগী অৱাবগী চরৈ ফিনি/ ঐগী থৱায়গী ফিয়ানখোক্তা/ থরাক থরাক য়াল্লিবা।” (লাঃ ২২) মীওইবগী পুন্সি অসি পাপ্নি হায়বগী ৱাংঙুলোন্দা হেন্না নকশিনবা মখলগী থিমদা ইরকপনি হায়না লৌবসু য়াই শৈরেং মখল অসিমক। 
তোঙান তোঙানবা থিমদা ইরকপা শৈরেং ‘গুমভীর’ ‘লিপস্তিক’ ‘অৱাবগী শরৌ লাং’ ‘হৌজিক্তি ৱা ঙাঙলগনু’ অসিনচিংবা নুংঙাইবা শৈরেংশিং, ফজবা, ৱাহন্থোক লৈবা কয়াসু কবি দেবেনগী হন্দক নৌনা ফোংলিবা লাইরিক অসিদা পাবা থেংনবীগনি।