image

ওইনাম নিরঞ্জনদা রোটারি জার্নেলিস্ত এৱার্দ লান্থোকখ্রে

ইম্ফাল, জুন ২ : দিপিসি (দি পিপল্স ক্রোনিকল) গী পাউমী ওইনাম নিরঞ্জনদা চহী অসিগী ‘রোটারি জার্নেলিস্ত এৱার্দ ওব দ ইয়র’ লান্থোক্তুনা ইকায় খূম্নবা ঊৎখ্রে। পোক্নফমগী সিস্তর পাব্লিকেসন ওইরিবা দি পিপল্স ক্রোনিকলগী পাউমী ওইনাম নিরঞ্জন্না খুন্নাই অসিবু অচুম্বা মায়ওনদা পুরকপদা মতেঙ ওইবা অমসুং মীয়ামগী মীৎ-নাকোং ওইবা পাউদমশিং ইবগীদমক রোটারি ক্লাবনা মঙোন্দা লেমজনিংঙাই ওইরবা মনা অসি পীখিবনি।

ঙসি মন্ত্রিপুখ্রিদা লৈবা রোটারি ভবন্দা পাঙথোকখিবা রোটারি ক্লাব ইম্ফালগী ৫১ শুবা ইন্সতোলেসন সেরেমোনীদা এৱার্দ অসি ওইনা নিরঞ্জনদা খূৎশিন্নখি। লোয়ননা চহী অসিগী মেরিতোরিয়স সিবিল কন্সতেবল ওব দা ইয়রনা থাংজম মঙালজিৎ, রোটারি ফায়ারমেন ওব দা ইয়রনা দব্লিউ বসন্ত, রোটারি ত্রাফিক পুলিস ওব দ ইয়ারনা ওইনাম শ্যামকুমার, রোটরি নার্স ওব দা ইয়রনা নামৈরাকপম তোমচৌদা মনাশিং অসি পীদুনা ইকায় খুম্নখি। এৱার্দশিং অসিদা শেল অমদি সাইতেসন য়াওরি।

থৌরম অদুদা চৎলিবা চহী ২০২৩-২৪ ফাওবা রোটারি ক্লাব ইম্ফালগী ফম পুগদবশিং মথংশীৎনা প্রেসিদেন্ত ওইনা দাঃ সঞ্জিব নেপ্রম, সেক্রেটারী ওইনা প্রদিপকুমার জৈনবু খনখিবগা লোয়ননা অতৈ থৌ পুগদবশিংসু ৱাশক লৌখি। নৌনা প্রেসিদেন্তকী ফম পুনবগীদমক খল্লবা দাঃ সঞ্জিব নেপ্রমনা হায়, খুন্নাই অসিগীদমক রোটারি ক্লাবনা ঙসিফাওবদা অঙম্বা থৌদাং কয়া লৌদুনা লাক্লি। লোয়ননা রোটারি ক্লাবনা পায়খৎপা থবক-থৌরমশিং দা কনফ্লিক্ট থোরকপা মতমদা শন্তাইননবা হোৎনবা, ঈং-তপ্পা অমদি তঙদু লৈতাবা পুরক্নবা শীনবা অসিসু য়াওরি।

হৌজিক থোক্লিবা ঈরাং অসিদসু রোটরি ক্লাবনসু লৌবা য়াবা থৌদাং কয়া লৌগনি। ক্লাবগী চহী অসিগী থিম ওইরিবা ‘ক্রিএত হোপ ইন দা ৱার্ল্ড’ হায়রিবা অসিগী মখাদা হৌজিক লাঞ্জেন্নদুনা লৈরিবা ঈরাং অসিগী চৈথেঙ ফংলবশিং অমসুং কেন্সার লায়নাগা লোয়নরগা লৈরিবশিং গী পুন্সিদা থৌনা, থাজবা লৈহন্নবা থবক-থৌরমশিং লৌখৎকনি।

হায়রিবা থবক-থৌরমশিং অসিদা রোটারি ক্লাবকী মেম্বারশিংনা খূমাঙ চাওশিন্না পাঙথোকপা ঙম্নবা ঐখোয় পূন্না মতেঙ পাংমিন্নসি হায়না ফোঙদোকখি। ঙসিগী থৌরম অদুদা খনগৎলবা বেনিফিসরীশিংদা হুইল চেয়ার অমসুং হিয়ারিং এইদসু মতেঙ ওইনা য়োন্থোকখি। থৌরম অদুদা রোটারি ক্লাব ইম্ফালগী হান্নগী প্রেসিদেন্ট মথং শীৎনা দাঃ সিনাম রাজেন্দ্র, প্রমোদ জেসৱাল অমদি সেক্রেটারী মাইবম চৌরজিৎ অসিনচিংবসু শরুক য়াখি।

পনবা য়াবদি, চহী অসিগী ‘রোটারী জর্নেলিস্ত এৱার্দ ওব দ ইয়র’ ফংলবা ওইনাম নিরঞ্জন ইং ২০০৯ দা মণিপুর য়ুনিভার্সিটিদা ইংলিশতা এম এ লোইশিনখি। ইং ২০১৩ দগী পোক্নফমগী সিস্তার পাব্লিকেসন ‘দ পিপল্স ক্রোনিকল’ দা পাউমী ওইনা থবক তৌরকখিবনি। মহাক খোংনাং ফৈদৈকপীদগী লৈখিদ্রবা ওইনাম রামেশ অমসুং ওইনাম ওংবী অরাম্বম মংলেম্বী অনীগী মচানুপানি। পাউমী অমা ওইনা মহাক হৌখিবা চহী ৮/৯ অসি ঈ-পাউগী লম অমদি শিনফম অসিদা থবক তৌদুনা কত্থোকপগা লোয়ননা খুন্নাই অসিদা অঙম্বা কন্ত্রিব্যুসন কয়া তৌরক্লি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু