এৱাদি খ্বাইরাকপম বিশ্বমিত্রবু হরাও তরাম্না ওকখ্রে
ইম্ফাল, দিসেম্বর ০৭ঃ ওল ইন্দিয়া রেদিও ইম্ফালগী এ-গ্রেদ আর্তিস্তসু ওইরিবা ব্রাহ্মপুর কলা সঙ্গম ইম্ফালগী সেনিয়ার দিরেত্তর খ্বাইরাকপম বিশ্বমিত্রনা কুমজা ২০২৪গী মণিপুর স্তেত কলা একাদেমি এৱার্দ ফোর থিএতর ফংলকপদা ব্রহ্মপুর কলা সঙ্গম ইম্ফালনা মহাকপু ঙসি হরাও তরাম্না ওকখ্রে।
ব্রহ্মপুর কলা সঙ্গম ইম্ফালনা খ্বাইরাকপম বিশ্বমিত্রবু ওকপগী থৌরম অমা ঙসি নূংথিল সঙ্গম অসিগী শঙলেনদা পাঙথোকখ্রে। থৌরম অদুদা মোদন কলেজ গী দিপার্তমেন্ত ওব ফিলোসোফিগী রিটয়ার্দ প্রোফেসার এ হরিদাসনা চীফ গেস্ত, সঙ্গম অসিগী প্রসিদেন্ত এ বসন্তকুমারনা প্রসিদেন্ত ওইখি। থৌরম অদুদা থিএতর এক্তর, রাইতর অমসুং দিরেত্তর খ্বাইরাকপম বিশ্বমিত্রগী তুংগী পুন্সিদা চাওখৎপা য়াইফবা ওইনবা মপুগী মফমদা থৌনিখি। লোয়ননা ব্রহ্মপুর কলা সঙ্গমগী মায়কৈদগী খ্বাইরাকপম বিশ্বমিত্রদা খুদোলপোৎ তমদুনা ইকায় খুম্নবসু উৎখি হায়রি।
নীংশিংবা য়াবদি খ্বাইরাকপম বিশ্বমিত্র ব্রহ্মপুর কলা সঙ্গমদগী হৌরক্লগা রুপমহল থিএতরগী এক্তর, প্লেরাইত অমদি দিরেক্তর ওইনা ৱার্ক তৌরকখিবা এত্তর এন্দ দিরেক্তরনি। মণিপুর স্তেত ফিল্ম এৱার্দ ৫ ফংখ্রবা ফিল্মগী এত্তর, স্ক্রিনপ্লেরাইত অমদি দিরেক্তর অমসুনি। তোঙান তোঙানবা ইন্তরনেসনেল ফিল্ম ফেস্তিবেল কয়াদা লেমজনিঙাই ওইরবা ফিল্ম এৱার্দ কয়া ফংলকখ্রবা ফিল্ম মেকর অমসুনি। ওল ইন্দিয়া রেদিও ইম্ফালগী এ-গ্রেদ আর্তিস্ত অমসুনি। লৈপাকমীয়ান্না দুরজধন, তিকেন্দ্রজিৎ অমদি নরসিংহ শাবা হায়রগা থোইদোক্না শকখঙনরিবা শক্নাইরবা আর্তিন্ত অমনি। মহাক ৱাই সি বি, ব্রহ্মাপুরগী প্রসিদেন্ত ওইনা থৌসু পুরম্মী হায়রি।
সোর্স - পোক্নফম
0 কমেন্ট:
কমেন্ট তৌবিয়ু