ইন্দিয়াগী নুপী ফুতবোল তিমদা মণিপুরগী নিপান য়াওরে
কোলকাতা, জুলাই ৭ : জুলাই ৯ অমসুং ১২ দা ম্যান্মাগা শান্নরুগদবা ফিফা-ফ্রেন্দলি মেতচ অনীগীদমক ইন্দিয়াগী সেনিয়র নুপী ফুতবোল তিমগী হেদ কোচ লাঙম চাওবা দেবীনা শান্নরোয় ২৩ না শাবা তিম লাউথোকপদা মনিপুরগী নিপান য়াওখ্রে। ম্যান্মাদা চৎকদৌরিবা ইন্দিয়াগী তিমদা মণিপুরগী এলাংবম পান্থোই চনু অমসুং মাইবম লিন্থোঙম্বী দেবী অনীনা গোলকিপরশিং ওইনা, অদুগা লোইতোংবম আশালতা দেবী, হেমাম শিল্কি দেবী, ৱাঙ্খেম লিন্থোইঙম্বী দেবীনা দিফেন্দরশিং ওইনা, নাওরেম প্রিয়াঙ্কা দেবী অমসুং নোংমাইথেম রতনবালা দেবীনা মিদফিল্ডরশিং ওইনা অমদি লিন্দা কোম সর্তো ফোরৱার্দ ওইনা মখোয়গী মমিং চনবা ঙমখি।
ইন্দিয়াগী তিম অদু লাউথোক্লদুনা হেদ কোচ চাওবনা হায়, ঐগী তিম সেনিয়র অমসুং জুনিয়র শান্নরোয়শিং গা য়াশিন্নরবা অমা ওইরি। তিমগী কম্বিনেসন্দা ঐনা অপেনবা পোকই। উজবেকিস্তাগা মমাঙ থাদা শান্নরুরবা মতুং নুমিৎ ১০ লৈরগা ঐখোয়গী নেসনেল কেম্প হৌখি। শান্নরোয় পূম্বা অফবা মতৌ অমদা ফিত ওইরি। মখোয়না পোত্থানিংখিদে। মখোয়না মখোয়গী ক্লবশিংদা অকনবা মওংদা ত্রেনিং তৌখি।
হেদ কোচ লাঙম চাওবা দেবী
কোচ অদুনা হায়, ঐখোয়না কোলকাতাগী নেসনেল সেন্তর ওব এক্সলেন্সতা চয়োল অনী ত্রেন তৌখি অমসুং প্রেক্তিস মেতচ অনী শান্নখি। মেতচশিং অদুনা অফবা ওই হায়বা খঙবা ঙমখি। ঐখোয়না স্তার্তিং এলভন্দা চহী নৌরিবশিং শীজিন্নখি। মখোয়না মখোয়গী লৈজবা পাঙ্গল ফুদোক্তুনা শান্নখি অমসুং মখোয়গী পোজিসনশিংদা অকনবা মওংদা লম্বা তৌনখি।
ইন্দিয়াগী তিম্না মে ৩১ অমসুং জুন ৪ দা উজবেকিস্তানগা ফ্রেন্দলি মেতচ অনী শান্নখি। মখোয়না অহানবা মেতচ মায়থীখি, অদুগা অনীশুবা মেতচনা দ্রো চৎখি। ইন্দিয়ানা হৌজিক হৌজিক্কী ফিফা রেঙ্কিংসতা ৬৭ শুবা মফম কল্লি, অদুগা ম্যান্মানা ৫৪ শুবা মফম কল্লি। ইন্দিয়াগী নুপী তিম্না ফেব্রুয়ারীদগী মে ফাওবগী মনুঙদা মেতচ মঙা শান্নখি।
থা অনীদা হেন্না ৱাংবা রেঙ্ক পায়রিবা তিম অনীগা শান্নবা হায়বসিনা ইন্দিয়ানা মহৌশানা কান্নবা ফংগনি হায়রদুন হেদ কোচ অদুনা হায়, রেঙ্কিং হায়বসি থোইনা মরু ওইদে। ফেদারেসন্না অহেনবা এক্সপোজর তুরশিং শীন্নবসু হোৎনরি। অসিগুম্বা মেতচশিং অসি হেন্না মখোয়না শান্নরগদি তিম্না ফীবম ফগৎকনি। মখোয়না মগুণ লৈবা মেতচশিং শান্নবা মথৌ তাই।
চাওবনা হায়, মহাক্না এসিস্তেন্ত কোচ ওইখিবা মতমদা মখোয়না হোং কোং অমসুং ইন্দোনেসিয়াগা শান্নখি। মদুগী মতুংদা কোতিফ কাপ শান্নখি। নুপীমচাশিং অদুনা মদুগী মতুং দগী য়াম্না হেন্না ফীবম ফগৎখি। ম্যান্মা হায়ার রেঙ্ক তিম অমা ওইরি। মখোয়না হায়-ইন্সেসিতি মেতচশিং শান্নবা ঙম্মী হায়বদু মখোয়না খঙঙি।
ম্যান্মাগা শান্নগদবা ফ্রেন্দলিশিংগীদমক মেম্বর ২৩ না শাবা তিমদা য়াওরিবশিংদিঃ
গোলকিপারশিং: শ্রেয়া হুদা, এলাংবম পান্থোই চনু, মাইবম লিন্থোইঙম্বী দেবী।
দিফেন্দারশিং: লোইতোংবম আশালতা দেবী, হেমামা সিল্কি দেবী, সঞ্জু, ৱাঙ্খেম লিন্থোইঙম্বী দেবী, অরুনা বাগ।
মিদফিল্তরশিংঃ নাওরেম প্রিয়াঙ্কা দেবী, সঙ্গিতা বাসবোরে, কৃর্তিকা অঙ্গমুতু, নেহা, নোংমাইথেম রতনবালা দেবী, মৌসুমি মুরমু।
ফোরৱার্দশিং: কাজোল হুর্বত দিসৌজা, অঞ্জু তমাং, চৌমিয়া গুগুলোথ, সন্ধিয়া রঙ্গনাথন, করিশ্মা পুরুষোত্তম শিরভোইকর, লিন্দা কোম সর্তো, পিয়ারি সক্সা, জ্যোতি, রিম্পা হাল্ডর।
হেদ কোচ: লাঙম চাওবা দেবী।
সোর্স: পোক্নফম
0 কমেন্ট:
কমেন্ট তৌবিয়ু