কাছারগী অৱাপলি খুভমদা মহারাজ গম্ভির সিংহগী মীতম মায়খুম হাংদোকখ্রে
ইম্ফাল, মার্চ ০৫ : আসামগী লক্ষিপুর এসেমব্লি কন্সটিট্যুএন্সিগী এম এল এ কৌশিক রায়না ঙসি কাছারগী কাংমরাঙ্গদা লৈবা অৱাপলি খুভমদা মণিপুরগী মহারাজ গম্ভির সিংহগী মীতম অমা মায়খুম হাংদোক্তুনা হৈকৎ লৈকৎ তমদুনা ইকায়খুম্নবা উৎখ্রে। ঙসিগী থৌরম অসি অৱাপলি খুভম নীংশিং লুপ, কাছার কাংমরাঙ্গনা শীন্দুনা পাঙথোকখিবনি।
থৌরম অসিদা মৈরা পায়বী নুপীশিং, সী এস ওশিংগী লুচিংবশিং অমসুং মীয়াম্না শরুক য়াখি। থৌরমগা মরি লৈননা লমায় ৩২ পানবা নীংশিং চেফোঙ (সোভিয়েনর) অমসু ফোঙদকোখি। মীতম অসিবু হাংদোকপগী থৌরমদা শরুক য়াখিবী মণিপুর দিভেলপমেন্ট কাউন্সিলগী চেয়ারমেন মুতুম রিনানা কনাগুম্বশিংনা কাংমরাঙ্গদা লম কৎপীনীংবা লৈরদি মফম অসিদা মহারাজ গম্ভির সিংহ কালচারেল হোল অমসু শাননবা থৌরাং লৈরে হায়ন ফোঙদোকখি।
থৌরম অসিগী মতুংদা চন্দ্রপুরদসু চৎতুনা মফম অদুদা অতোপ্পা মহারাজ অসিগী মীতম অমা খিন্নবা মফম য়েংশিনখিবগা লোয়ননা মসিগা মরী লৈনবা মীফম অমসু মফম অদুদা লৈবা য়ূম্নাম ইন্দ্রবাবুগী য়ূমদা পাঙথোকখি। মীফম অদুদা কাছারদা অহানবা মৈতৈ নিংথৌনা খোঙদাখিবা মফম হায়বসি চন্দ্রপুরনা ওইরিবনি। মরম অসিনা মফম অসিদা নিংথৌগী কোনুং লৈরবসু য়ৈংশিনবীদনা লৈরি হায়বনচিংবা ৱাফমশিং ফোঙদোক্নখিবগা লোয়ননা মীতৈ নিংথৌ অসিগী ৱারী মীয়ামদা তাহনখি।
ঙসিগী থৌরমদা অৱাপলি খুভম নীংশিং লুপকী প্রেসিদেন্ট সাইখোম মনিমোহন, মীতম খিল্লিবা মফম কৎখিবা উসম ইবুংঙো য়াওনা য়ু সী এমগী কন্সলটেটিব কম্মিটিগী মেম্বার কে ঐচ রতন, য়ু পি এফকী এদভাইজর এল জাদুমনি, য়ুসী এমগী ভাইস প্রেসিদেন্ট এন রুপচন্দ্র, য়ুসীএমগী সেক্রেটারি জেনারেল দব্লিয়ু সেকেন্দ, অমকিলগী প্রেসিদেন্ট এল ঙানবী, এ এম টি সি এ এলগী প্রেসিদেন্ট ৱাই মোহোন, সোসল ৱার্কর এন বুধচন্দ্র, এল বিদ্যাবতি সিংহ, এ এম এম ৱাই এফকী চীফ এদভাইজর আহম্মদ চৌধুরীনচিংবা মীওইশিংনা শরুক য়াখি।
পনবা য়াবদি, ঙসিগী থৌরম অসি য়ুনিয়ন ষ্টেট মিনিষ্টার আর কে রঞ্জননা অথোইবা মীথুংলেন ওইদুনা শরুক য়াগনি হায়না থৌরাংলম্বনি অদুবু মহাক লাকখিদ্রে হায়রি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু