আপডেট:
image

আর্জেন্টিনানা ৱার্ল্ড কাপকী টাইটেল লৌখ্রৈ

দোহা, দিসেম্বর ১৮: কাতারনা য়ুম্বু ওইদুনা হৌখিবা নবেম্বর ২০দগী চত্থরকখিবা ফিফা ৱার্ল্ড কাপা ২০২২গী নোংমাইজিং নুমিৎতা শান্নখিবা ফাইনেল মেটচতা আর্জেন্টিনানা পেনাল্টি সুটআউটতা দিফেন্দিং চেম্পিয়ন্স ফ্রান্সপু গোল ৪-২ দা মায়থীবা পীদুনা ৱার্ল্ড কাপকী অহুম্লক শুবা টাইটেল লৌখ্রে। ৱার্ল্ড কাপকী ফম্বাক্তা অনৌবা পুৱারী অমা ওইহৌরগদবা ফাইনেল অদুদা আর্জেন্টিনানা মেটচ লোইরমদাই ফাওবদা গোল ২-০ দা মাঙজিল থানা লৈখ্রবসু ফ্রান্সনা য়াম্না থাজদনা শুপ্নগী মিনিট অনীগী মনুংদা গোল অনী চনশিন্দুনা এক্সট্রা টাইম তম্না পুশিনখি।

ফাইনেল মেটচ অসিনা মহাক্কী অরোয়বা ৱার্ল্ড কাপকী মেটচ ওইরগনি হায়না হান্ননা লাউথোকখ্রবা লিওনেল মেসিনা ২৩ শুবা মিনিটতা পেনাল্টিদগী গোল একাউন্ট হাংদোক্তুনা আর্জেন্টিনাবু য়াম্না ঙন্না মাঙজিল থাহনখ্রবা মতুং এঞ্জল দি মারিয়ানা ৩৬ শুবা মিনিটতা টিমগী অনীশুবা গোল অমুক চন্দুনা আর্জেন্টিনার কুমজা ১৯৮৬ কী মতুংদা মখোয়গী অহানবা ৱার্ল্ড কাপকী টাইটেল লৌহন্নবগী পন্থুং কা হেন্না নকশিলহনখি।

অদুবু অহানবা হাল্ফতা মশক থোকপা পার্ফোমেন্স উৎপা ঙমখিদবা ফ্রান্সনা অনীশুবা হাল্ফকী তঙ্খায় চল্লকপা অদুৱাইদগী তোঙানবা মওংদা য়াম্না থাজদনা শান্নরকখিবদগী কাইলান এমবাপেনা ৮০ শুবা মিনিটতা পেনাল্টিদগী পাঞ্জিল অমা হন্দোকখিবদা নত্তনা ৮১ শুবা মিনিটতা মহাক্কী অনীশুবা গোল অমুক চন্দুনা মালেমগী মীয়ামদা ৱার্ল্ড কাপ ফাইনেলগী তোঙানবা মহাও অমা তংহনখি।

অদুমকপু টিম অনীমক্না এক্সট্রা টাইমগী অহানবা পেরিয়ড লোইবা ফাওবদা গোল অমত্তা চন্নবা ঙমখিদ্রবা মতুং লিওনেল মেসিনা অনীশুবা পিরিয়দকী ১০৮ শুবা মিনিটতা টিমগী অহুমশুবা গোল চনখিবদগী আর্জেন্টিনানা য়াম্না ৱানা ৱার্ল্ড কাপকী অহুমশুবা টাইটেল লৌরগনি হায়না থাজনখ্রবসু কাইলান এমবাপেনা ১১৮ শুবা মিনিটতা অমুক হন্না পেনাল্টিদগী মহাক্কী হেট ট্রিক ফংদুনা পেনাল্টি সুটআউট তম্না পুশিনখি।

পেনাল্টি সুটআউটনা ফাইনেল মেটচ অদুগী মরাইবক লেপ্পা তাখিবগী লোয়ননা অরোয়বদদি সুটআউটতা আর্জেন্টিনানা ফ্রান্সপু গোল ৪-২দা মায়থীবা পীদুনা টাইটেল লৌবগী খোয়থুম্লবা মহাও তংবা ফংখি। মদুগা লোয়ননা আর্জেন্টিনানা শাংলবা চহী ৩৬ ৱার্ল্ড কাপকী টাইটেল ঙাইরকখিবা মখোয়গী খোঙচৎ অদুসু লোইশিনখ্রে। মখোয়না কুমজা ১৯৮৬ তা ডিয়েগো ম্যারাডোনাগী কেপ্টেন্সি মখাদা ৱার্ল্ড কাপকী টাইটেল অরোয়বা ওইনা ফংখিবনি। হৌজিক আর্জেন্টিনানা ৱার্ল্ড কাপকী টাইটেল অহুম নত্রগা মদুদগী হেন্না ফংবা মালেমগী মরিশুবা লৈবাকসু ওইখ্রে।

মদুগী মথক্তা আর্জেন্টিনানা হৌজিক্তি ইউরোপকী হেজিমোনি অদু থুগাইদুনা ব্রাজিলগী মতুং (কুমজা ২০০২) ৱার্ল্ড কাপকী টাইটেল লৌবা সাউথ আমেরিকাগী অহানবা টিম ওইখ্রে। আর্জেন্টিনানা ব্রাজিলগী মতুং (কুমজা ২০০২) ৱার্ল্ড কাপকী ফাইনেলদা য়ুরোপিয়ন টিম অমবু মায়থীবা পীবা সাউথ আমেরিকাগী অহানবা টিমসু ওইখ্রে।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু