ত্রিপুরাদা ‘ইয়েক ইরোল অহানবা’ ফোঙখ্রে
ইম্ফাল, নভেম্বর ১৩: মণিপুর ৱাংমদা মীরোল ঙাঙবশিংগী মরক্তা হৌরক্লিবা নৌরিবা মহৈরোয়শিংদা মশাগী লোল অসিগী ময়েক মশক খঙহনবগী পান্দমদা খোইস্নাম মঙ্গলনা ইথোকপা ‘ইয়েক ইরোল অহানবা’ হায়না মীতৈ ময়েক তম্নবা লাইরিক অমা মণিপুরী লিটরেরি এন্দ কালচারেল ফোরাম ত্রিপুরানা ঙসি মীয়ামদা ফোঙদোকখ্রে।
আগরতলাগী তরৌ মীতৈ লৈকায়দা লৈবা ফোরাম অসিগী ওফিসতা পাঙথোকপা লাইরিক ফোঙবগী থৌরম অদু জহরলাল নেহেরু মণিপুর দান্স একাদেমি ইম্ফালগী দিরেক্টর ওইরম্বা এল উপেন্দ্র শর্ম্ম, অইবা হাওবম প্রিয়োকুমার অমসুং মরূপ পাউ-চেগী জয়েন্ট এডিটর আর কে তরুণজিৎ সিংহনা অখন্নবা মীথুংশিং ওইনা শরুক য়াখি হায়রি।
মীরমদা হৌরক্লিবা নৌরিবা অঙাংশিংনা মশাগী ময়েক লায়না মশক খঙবা ঙমজনবা মরমশিং য়াওহল্লগা ময়েক তম্নবা লাইরিক অসি ইবনি হায়না খোইস্নাম মঙ্গলনা হায়খি।
থৌরম অদুগী ইকায়খুম্নরবা মীথুং ওইখিবা এল উপেন্দ্র শর্ম্মা, হাওবম প্রিয়োকুমার, আর কে তরুণজিৎ সিংহ, সাগর নাগর সিংহ, এল রঞ্জন শর্ম্মা অমসুং খোইস্নাম বিরোলাসু ৱা ঙাঙখি।
‘ইয়েক ইরোল অহানবা’ অসি ত্রিপুরাদা ফোঙবা অহানবা মীতৈ ময়েক তম্নবগী লাইরিক্নি হায়রি।
সোর্স: পোক্নফম
0 কমেন্ট:
কমেন্ট তৌবিয়ু