চহী ২৭ শুরবা ফাওবদা মণিপুরী লোলগী ওজা হাপ্তবগী কোঅর্ডিনেশন কমিটি য়ানিংদবা ফোঙখ্রে
আগরতলা, আগষ্ট ২৩ : আধুনিক ত্রিপুরা শেমগৎ শাগৎপদা মণিপুরীশিংগী থৌদাং য়াম্না চাওনা লৈখি হায়বসি ইতিহাসকী সাক্ষীনি। অদুবু ঙসিদি ত্রিপুরাগী মণিপুরীশিং সোসিও ইকোনোমিকতা অদুক্কী মতিক শোত্থদুনা লৈরে। চহী ৬০/৭০ মমাংদা লৈরম্বা মণিপুরী মীশিং ঙসি লৈত্রে। মীশিং হন্থবতা নত্তনা লাইরিক লাইশুদা শোত্থরে, চাকুরী থবক ফংবদা ৱারে। মমালোলনা লাইরিক তম্বা ফংদ্রে। মণিপুরীবু মীরাইবিদুনা থম্বীরে হায়না ৱাকৎনরক্লে।
ইং ১৯৯৮ দগী ত্রিপুরাদা মণিপুরী লোল প্রাইমারী থাক্তা তম্বী তাকপীবা য়ারনি হায়রিবা স্কুলশিংদা মণিপুরী লোলগী ওজা হাপ্পীয়ু হায়না ত্রিপুরা মণিপুরী য়ুথ-ষ্টুডেন্ট কোঅর্ডিনেশন কমিটিনা দাবী তৌদুনা মখা তানা অমুক খোঙজংদা চত্থবা হৌখ্রৈ। মণিপুরী লোলবু ভারত সংবিধানগী ৮ শুবা সেদুল্ডা চনখিবা আগস্ট তাং ২০ ‘মণিপুরী ল্যাঙ্গুয়েজ ডে’ নুমিৎ অসিমক্তদা লুপগী প্রেসিডেন্ট কে ধীরেন অমসুং জেনরেল সেক্রেটারী বিমল সিংহনা লুচিংদুনা মীহুৎ কাঙবু অমনা ত্রিপুরা লৈঙাক্কী স্কুল অব এডুকেশন লোয়শঙগী জয়েন্ট ডিরেক্টর রাকেশ দেববর্মাগা হকথেংননা ডেপুটেশন্দা উন্নখি অমসুং পীশিনখি। ভারত সংবিধানগী ৮শুবা সেদুল্ডা মণিপুরী লোল চনখিবা নুমিৎসি হরাও নুঙাইবগী নুমিৎনি। অদুবু ত্রিপুরাদদি য়াম্না পেন্দবা নুংঙাইতবা মওংদা লোল অসিবু মীরাইবিরে হায়না লুপকী প্রেসিডেন্ট কব্রবম ধীরেননা থম্মোয় শোক্না পেন্দবা ফোঙদোকখি। ইং ১৯৯৮ দা ত্রিপুরাদা মণিপুরী লোল স্কুল ২৪ দা তম্বী তকাপীবা য়ারনি হায়না নোটিশ থোক্তুনা ধলেশ্বর স্কুলদা লোল অসি তম্বা হৌদোকখি। অদুবু ইনফাষ্ট্রাকচার লৈতে, বাজেটতা পৈসা সিকি ফাওবা কায়থোকপীদ্রি। অদুমকপু সরকারগী চে-চাংদদি ঐখোয়গী লোল অসি ইং ১৯৯৮ মতম অদুদগী ক্লাস ৱান্দগী তম্বা হৌদুনা ঙসি ফাওবদা ক্লাস ৮ য়ৌরে হায়না অদুগুম্বা নমথাক অদুগী মায়োক্তা লুপ অসিনা নিন্দা তৌরি মরমদি ঙসি চহী ২৭ শুরবা ফাওবা স্কুল অমত্তদা মণিপুরী লোলগী ওজা কনা অমত্তা হাপত্রিবসিনি। লুপ অসিনা থা খরগী মমাংদসু ডিরেক্টররেট অব ককবরক এ্যন্ড আদার মাইনোরিটি ল্যাঙ্গুয়েজগী ডিরেক্টরদা ডেপুটেশন্দ মেমোরেন্ডাম অমসু পীশিনখিবা লৈখ্রবনি।
সোর্স: মরূপ
0 কমেন্ট:
কমেন্ট তৌবিয়ু