''ত্রিপুরা লৈঙাক্না শীন্দুনা পাঙথোকখিবা ৩৫ শুবা মনিপুরী লোনগী নূমীৎ''- নুংগী ওইবা মীৎয়েং অমা -- ধীরেন কব্রবম
২০ আগস্ট মণিপুরী লোনগী নুমীৎ অসিবু নহৌননা শক তাকপগী মথৌ তাদবরা খল্লি, মালেম থুংনা খঙনরবা ৱাফমনি। চহি খুদিংগী নুমিৎ অসি রুটিন থৌরম অমা ওইনা মালেমদা লৈরিবা মণিপুরীশিংনা পাঙথোক্নরিবনি। হৌখিবা চহি ২/৩ চুপনা ত্রিপুরা লৈঙাক্না শীন্দুনা পাঙথোকলিবা থৌরম অসি য়াম্না ফজখি অমদি মায়পাকখি (গ্রান্ড সাকসেস ওই) হায়না ঐখোয়না বাখ্যান তৌদুনা থোইদোক্না হরাওরিবা অমদি থাগৎনরিবা অসিগি ক্রিটিক্যাল রিভিউ অমা তৌদ্রগদি মদু অৱাৎপা অমদি শোয়দনা লৈরগনি খল্লি।
হন্দক চৎখিবা আগস্ট কী তাং ২০ ত্রিপুরা লৈঙাক্না শীনবীদুনা মনিপুরী লোনগী নুমিৎ অসি য়াম্না চঙখোন্না আগরতলাদা পাঙথোকখি। ত্রিপুরাগী তোঙান তোঙানবা মফম কয়াদগী ইমা, ইবেন, অহললম্মন নহারোলশিং য়াওনা আগরতলা শহরগী লম্বীদা ব্যান্ড পার্টি য়ৈদুনা মীয়ামগী মীৎ থক্নীংয়াই ওইবা রেলী অমসু চৎখি। ত্রিপুরা অমসুং মনিপুর সরকারগী মিনিষ্টার য়াওনা অতৈ মশকনায়বা মীথুংলেনশিংগী মমল লৈরবা ৱারোল কয়া, অদুগা লোন, সাহিত্য, কলাগী লমদা অবদান লৈবা লমদম অসিগী শক্নাইরবা মীওইশিংবু মনা মথুম পীবা অমসুং অরোইবদা শক্নাইরবা কলাকারশিংনা পাঙথোকখিবা ইনাৎকী নীংথিরবা কূমহৈ কয়ানা থৌরম অদু মপুংফানা পাঙথোকখি। ২০২৪ দগী হৌদুনা লৈঙাক্না শীনবা থৌরমদা হন্দক্কী থৌরম অসিনা খ্বায়দগী হেন্না শীংথানখি। থৌরম অদু য়াম্না ফজখ্রে, মায় পাকলে, গ্র্যান্ড সাকসেস্ ওইরে হায়দুনা অয়াম্বনা থোয়দোক্না হরাওনখি অমদি শীঞ্জলাংজরিবশীংবু য়াম্না থাগৎনখি। অসুম তাজবদা, কনাগুম্বা খরদি থম্মোয়গী অপেনবগী ঈথিল কনমনখিদুনা মমিত্তগী মপি তাবা ফাওবা য়াওনখি হায়নৈ। চুম্মী, মপানথোংগী অরং অরাকশিংদো য়েংলুরবদি থৌরম অদু য়াম্না ফজখি অমদি নুংঙাইখি। খুন্নাইনা নুংঙাই হায়না চৎনরিবা মনিপুরীগী থৌরম অমগী মচাক শুনা য়াওখি। খ্বায়দগী মরু ওইবদি মনিপুরী লোন কলচরবু মীয়াম মমাংদা নহৌননা শক তাকপা, লৈঙাক্কী লুচিংবশীংনা মনিপুরী লোন অমদি কলচরবু শীংথাবীরম্বা অমদি থাগৎপীরম্বা হায়বসি তরায়বা ৱাফম অমদি নত্তে। মদুমকনি ঐখোয়না ফংখিবা খ্বায়দগী অচৌবা মনা। মসিনা মপানথোংগী ওইবা মীৎয়েংনি। নুংগী ওইবা মীৎয়েংসু ঐখোয় য়েংদবা তঙায়ফদে। তশেঙনদি, ২০ আগস্ট মণিপুরী লোনগী নুমীৎ অসিবু নহৌননা শক তাকপগী মথৌ তাদবরা খল্লি, মালেম থুংনা খঙনরবা ৱাফমনি। চহি খুদিংগী নুমিৎ অসি রুটিন থৌরম অমা ওইনা মালেমদা লৈরিবা মণিপুরীশিংনা পাঙথোক্নরিবনি। হৌখিবা চহি ২/৩ চুপনা ত্রিপুরা লৈঙাক্না শীন্দুনা পাঙথোকলিবা থৌরম অসি য়াম্না ফজখি অমদি মায়পাকখি (গ্রান্ড সাকসেস ওই) হায়না ঐখোয়না বাখ্যান তৌদুনা থোইদোক্না হরাওরিবা অমদি থাগৎনরিবা অসিগি ক্রিটিক্যাল রিভিউ অমা তৌদ্রগদি মদু অৱাৎপা অমদি শোয়দনা লৈরগনি খল্লি।
অহানবদা, নৈনগদবদি দেমোক্রেটিক সরকার অমনা লমদম অদুদা লৈরিবা কাংলুপ অমগী মমারোনবু মশক খঙবীবা অমদি খুমাংচাওশীন্নবগীদমক হোৎনবা হায়বসি মাগী মরু ওইবা থৌদাংনি। মসিবু ঐখোয়না নুংশীবীবনি হায়না লৌরবদি নত্রগা লৌহল্লবদি মদু য়াম্না তায়োন্নবা ৱাফমনি।
অনীশুবদা, করিগুম্বা থৌরম অমা লান্নাইগী লুপ/সংস্থাননা পাঙথোকপগা সরকারনা শীন্দুনা পাঙথোকপগা অনীসিগী মরক্তা পোলিশি, মিৎয়েং অমদি পান্দমদা পাক চাওনা খেন্নবা (ফান্দমেন্টেল দিফ্রেন্স) লৈবসি মশানা তাবনি। মদুগী শাফু অমদি মহৈদসু (ইফেক্ট) খেন্নবা শোয়দনা লৈগনি। সরকারনা শীনবা থৌরমদা মাগী পোলিশি-থৌশীলগী ৱাংমদা করিমতা তৌবা য়ারোই। মদুগী খেৎনবা অসি খঙদনা, পাবলিক-প্রায়ভেৎ পুম্নমক ইতৈ তৈশিন্ননা লৌরগদি মদু খ্বায়দগী পঙবা হায়বদু ওইগনি। অদুগা খঙনা খঙনা খঙশিন্নদবা শারগদি মদুসু অচৌবা মীনম্বা তাগদৌরিবনি।
অহুমশুবদা, লোনগী নুমীৎ পাঙথোকপগা লোয়ননা লোন অদুগী চাওখৎ থৌরাংগা করিমত্তা মরী লৈনদে হায়রবদি মদো খ্বায়দগী চাওরবা মীনম্বা অমদি নমথাককী খুদমনি। অদুনবু লৈঙাক্না শীন্দুনা লোনগী নুমীৎ পাঙথোকপদা সুপ্নতগী ৱারী-ৱাতায়, কুম্মৈ থৌরম উৎপদা নত্তনা লোন চাওখৎপগী ৱারোল কয়াসু থম্মী, লোনগী ওজা অমত্তা হাপত্রবসু মীওই অমা হেক্তা পুথোক্তুনা চহীগী মনিপুরী লোনগী ওজানি হায়দুনা মনা মথুম পীরি।
লৈতুম অমখকনা উচেক অনী থোম্বাঃ-
মুন্না খন্থবিদুনা য়েংবিউ, লৈঙাক্না শীন্দুনা ইমালোন নুমিৎ পাঙথোক্তুনা লাকপসিদা খ্বায়দগী মায়পাক্লে- সাকসেসফুল ওইরে হায়রিবসি লমদমসিগী মণিপুরী খুন্নাইরা নত্রগা লোনগী নামাদা চহী কয়া মোইথেম তৌদুনা লাকখিবা লৈঙাক অসিরা? ঐখোয় নৈনদবা য়ারোয় মদুদি, থৌরম অদু পাঙথোকপদা হন্দক্তি গভর্নমেন্ট না শেল য়াম্না খায়দোকপীরে হায়রিবা লিকখ্রবা শেনফম লুপা লাখ ৬ (তরুক) খক চাদিং তৌরগা খুন্নাই অসিগী মতম কুইনদগী অফং-ফংদা, পেন্দবগী মৈরিকপু ইশিং হৈজিন্দুনা মুথৎনবগী থৌওংনি । খুন্নাই অসিগী মীয়ামগী অৱা-নুংঙায়বা, হরাওবা ইমোশোন খুদিংমক শেলনা লৈখিবগী মতৌনি। মীৎকী কুমহৈগী মিত্রংদা তাওহন্দুনা লৈঙাকনা শীন্দূনা লাকখ্রবা নামথাক লৌনমগী থৌশীলবু লৈবাক মমাংদা ফোঙনা অয়াবা পীহনবগী থৌওংনি। খুন্নাইগী লুচিংবশীংগী মচিন্দগী অরানবা ৱাফম কয়া লৈবাক মমাংদা ফোঙদোকহনবা ঙম্বগী থৌওংনি। মোয়থেম তৌদুনা মীচম মীয়ামদগী থাগৎৱাহৈ লোকপগী থৌওংনি। পোলোয়দা, হেক য়েংবদা সরকারসু মীচম প্রজাসু অনীমক হরাওরে অমদি পেন্নরে হায়রগসু তৌইগুম্বসুং কান্নবগী শরূকতি কনানা লৌখি? মনিপুরী খুন্নাইগীদি ওইখিদে হায়বসি চিংননীংঙায় ওইদে। মনিপুরী লোনগী ফিভম মতমশাংনদগী অমম্বগী কুয়োমদা লৈরকখিবা অদুম লেংদনা লৈরি।
ফান্ডামেন্টাল ওইবা ৱাহং খরাঃ-
হায়জনীংবদি কোঙ্গায়নি অদুবু ৱারেং অসি য়াম্না শাংহনদবীদা মরু ওইবা ৱাহং মরীখক অমসুং মদুগী ৱাহৈ অমতংগী ওইবা অশম্বা পাউখুম পীবগা লোয়ননা ৱারেং অসি তেনশীঞ্জগে।
১) ইং ১৯৯৮ দা ত্রিপুরা সরকারনা লাউথোকখি হায়রিবা স্কুলশীংদা মণিপুরী তম্বী-তাকপীবগী থৌরাং অসি ঙসিয়ৌবফাওবদা চপচাবী থবক ওইনা পাঙথোক্লবরা (ইমপ্লিমেন্টেশন তৌরবরা?
পাউখুম - তৌদে।
২) ইং ১৯৯৮ দগী ঙসিয়ৌবফাওবদা তোঙানবা মণিপুরী লেঙ্গুইজ টিচর অমত্তা রিক্রুট তৌরবরা?
পাউখুম - তৌদে।
৩) ইং ১৯৯৮ দগী ঙসিয়ৌবফাওবদা মণিপুরি তম্বী তাকপীবগী ওইবা অকক্নবা গাইডলাইন অমত্তা লৈরব্রা/শেম্লবরা?
পাউখুম - লৈতে/শেমদে।
৪) ইং ১৯৯৮ দগী ঙসি ফাওবদা সরকারনা মনিপুরী মহৈ তম্বগীদমক বাজেটতা শেল কাইথোকপীরবরা?
পাউখুম - কাইথোকতে।
অদুনদি, মনিপুরী লোন পীথরে হায়রিবা ৱাফম অসিমক কদায়ফাউবা অচুম্বনো হায়বসি থোয়দোক্না চিংননীংঙায় ওইরে। পন্দবা য়াদ্রবা ৱাফম অমনা লৈঙাকনা শেম্বা মণিপুরী লেঙ্গুইজ দিভেলপমেন্ট এদভাইজারি কমিটি হায়বা অমা লৈজরিবা অসিদি লৈঙাক্কী হঙলাই, সাক্ষী গোপাল হায়বদুনি। লৈঙাক্কী পোলিশিগী ৱাংমদা মখোয় খোংকাপ অমত্তা কানবগী মতিক লৈতে অদুবু অৱাবদি, লৈঙাক্কী নমথাক অসি খুন্নাই য়ৌনবা শন্দোক্লিবসি মখোয়গী খূৎথাংদনি।কমিটি অসি শেমখিবা হৌরকঙৈ মতমদগী ঙসিয়ৌবফাওবদা মদুগী থৌদাং মীচম খুন্নাইগী মমীৎতা উৎ চাইবগী থৌওং অসি মখোয়না লৌদুনা লাকখি। চহি ২৮ হায়বসি শাংখ্রবা মতমনি। জেনরেশন অমগী লীশাংনি। মরম অদুনা, মায়পাকপা অমদি সাকসেস ওইরে হায়না বাখ্যান তৌরিবসি মদুগী নুঙগী ওইবা ৱাহনথোক অসি ঐখোয় কুপনা নৈনবগী মথৌ লৈরি।
কোর্টেসি - মরূপ
0 কমেন্ট:
কমেন্ট তৌবিয়ু