রনধির কুমার য়েন্দ্রেম্বম ‘গী ৱারীমচা- তঙাইফদবা
ইংখোলনুংদুদি মেরাজাউনা মচীল মনাউশিংগী মনুংদা খ্বাইগী কোকহল লাইহলনি । ইংখোলদু মচীন মনাউ মখোয় নূপা মরিগী য়ূম ঙাক্তনা পিক থনখ্রে । য়েনীংথা খরসিদি ইংখোলনুংসিদা অশংবা মচেৎ অমা মাগী মমীৎতা উগে ফংলক্ত্রে । নুমিৎ খূদীং মানা উরিবা হায়ববু উদুনতা লৈরবা মাগী ফমুং ফানুং, উপু কাংথোন খরা, তেবল অনী অহুম , চৌকি ,তেলিভিজন, প্রেশর কুকর, পূখম তেঙ্কোৎ, মাগী নূ্পী অমদি মচা অহুম অসিনচিংবা খরতনি ।
-বাজি,লুপা ৫০০দা পীয়ু ।
-লৈতে ।
নুমীৎ হুম্নি মরিনিরোম শুরে মেরাজাউদা মেঘনা শেল খরা পীয়ূ হায়রক্লিবসে । তূমীৎফাও পাইবা য়াদ্রে হায়নরিবা অনীশুবা লোকদাউন অমদি করফিয়্যূগী মনুংনি ।
-বাবা,পীয়ুদা ।
মেরাজাউ খোল কল্লপ খুমখি,
-লৈতে, লৈতে ।
মেরাজাউনা মচাদা লৈতে লৈতে হায়রক্লিবসি মরিরক্তি শুরক্লে । মেঘ মপাগী ৱাফমদুদা করিনো মূরূম মূরূম শোল্লি । শোঙলবা মশম মনা অদু খোরো খোরো খোৎলগা খাঙই, মাগী মমায় অদু নুংশানা চাকথেক্লবগুম্না কাহৎলি । মনাক্তা লৈরিবা থোঙপাক অদুদা য়াম্না পেন্দনা কিন্না অনী অহুম্লক শুরম্লগা ইমুংদগী ৱা মখা অমত্তা তারমদনা থোকখি ।
মচানা অসুম্না তৌরম্লগা থোকখিবদা মেরাজাউ য়ারক্তা ঙংলগা হায়হৌই,
-হুং ! য়ূমদা শুম শেল শিকি অমা থোক্তনা তূম্মগা চারগা লৈনরবা মতম অসিদা হৌজিকপু কদাইদগী লূপা ৫০০নোনে ? শেল লৈরবফাওদা দুকানসু অমত্তা হাংনদ্রবা মতম্নি, মসিদবু মানা করি লৈরুগে হায়রিনো ?
মনাক্তা লেপলম্বী মেমচানা তপ্না ঈংনা হায়রকই,
-মাগীসু করি করিনো তঙাইফদবা অদুম লৈরমগনিনা! শেল লৈত্রদি মীসে ৱাখল থোক্তবনি ।
-নঙনা নচানূপা কনখৎখিবসিনা, হৌজিকসে লমজাও শোরোকসু মী অমত্তা চৎপা য়াদ্রবনি । কৈদৌনগে হায়রিবনোবা লূপা ৫০০দুনা?
মেরাজাউগী ৱা নমহৎপা ৱাহৈ খরদু তারগা মেমচা তূমিন চাকশঙলোমদা চৎখ্রে ।
লোকদাউন মনুংসে অমসু অমসু য়ূমদা সুম নোং ঙানবদগী নুমিৎ তাবা ফাওবা ফমদুনা চাদুনা লৈবা তারক্লি । খবর ঙাইহাক অমুক পা, ফমুংদা ঙাইহাক অমুক হীপ, তেলিভিজন খরমুক য়েং , মোবাইল খরমুক য়েং, চরা অমুক ৱান । মেরাজাউগী য়ূমলোন্নবগী ইমুংশিংদুসু গেটতা অঙাঙবা মূক্না চে অমদা কন্তেনমেন্ত জোন হায়না চাউনা থাদুনা থেৎলগা লৈরি । লম্বীদা শীৎলিবা হৱা নুংশীৎসু মশা শেংলম্লরোই অদুনা মী অমসু অমসু মদু থেংনগদৌবা নিংকোক নিংকোক্নৈ । য়ূমদা শেল থুমগী, চানবা লৈশিল্লক্তবগী ,অনা অয়েক্কী অৱাবা ময়াম শাগোন্নদুনা লৈনৈ। কনানবু চহী অনীবু অসুম্না শুম ফাদোক অমগুম্না লৈরকপা ঙাওবু ঙাওদে , পুন্সি অসি মহাউ অমা ইয়াও য়াওরক্ত্রে হায়না মেরাজাউনা তত্তনা খনগৎলক্লে ।
ইংখোলনুংদুদি মেরাজাউনা মচীল মনাউশিংগী মনুংদা খ্বাইগী কোকহল লাইহলনি । ইংখোলদু মচীন মনাউ মখোয় নূপা মরিগী য়ূম ঙাক্তনা পিক থনখ্রে । য়েনীংথা খরসিদি ইংখোলনুংসিদা অশংবা মচেৎ অমা মাগী মমীৎতা উগে ফংলক্ত্রে । নুমিৎ খূদীং মানা উরিবা হায়ববু উদুনতা লৈরবা মাগী ফমুং ফানুং, উপু কাংথোন খরা, তেবল অনী অহুম, চৌকি ,তেলিভিজন, প্রেশর কুকর, পূখম তেঙ্কোৎ, মাগী নূ্পী অমদি মচা অহুম অসিনচিংবা খরতনি ।
মথং নুমিৎতনি ।
-বাজি, লূপা ১০০দা ওইরবসু পীয়ু । মেঘদু
মপাদা ইকৌ কৌনীংদে । মহাক মমীৎ মনা ইশূক শূকই । মপাদা ৱা চুম্না হায়রদে । মহাক শাউনা মপাদা ঙ্রূং ঙ্রূং ঙংলগা হায়রৈ ।
করিবু খল্লক্লবনো মেরাজাউদু লৈতে হায়না খুম্বা ঙমদে হন্দক্তি । ফিয়ানখোক্তা য়াল্লিবা মাগী লূখাঙ ফূরীৎকী ফূরীৎখাউদগী মশূপ মশূপ তৌরবা লূপা ১০০ চৎপী অমা লৌথোক্লগা মচানূপাদা পী । মচানূপা মেঘগী মথম্মোয়নুংদদি শেল ফংবগী শোয়দনা হরাউরম্লগনি অদুবু মদু মাগী মায়থোঙদদি হরাউবগী শকফম মচেৎ অমত্তসু ঊৎতে । ৱা লান করিমত্তা ঙাঙদনা শেল অদু মপাদগী শৎ লৌরগা হন্না য়েংলমদনা মেঘ ইমুংদগী মপান থোকখি ।
-হাই , কদাইদমুক চৎকে হায়রিনোনে, মাস্ক ঊপখোনে।
মেঘ খুম্লমদ্রে অদুম । মেরাজাউ মচানা মশম মনা ইশোং শোঙনা অঙাওবদৌনা চৎখিবদু য়েংদুনখক লৈহৌই । মচাগী অফাবা মশমদু উরুরগসু মেরাজাও নুংঙাইতবা ৱাখল পোকচৈ ।
কুইরবনি মেঘনা ত্রেনিং অমা লোইরগা মশম মনা ককপোই কক্তবোই লৈরকপা । ইন্টরভ্যু কয়া য়াওশিল্লি অদুবু থবক খল্লকপদি লৈতে । মাবু উরগা মেরাজাউনা খলহৌই ঙাওচৎনবা হায়বদু অসি ওইরিদ্রা হায়না ।
নঙসু নূপমচানি শেল থোকপা য়াবা তৌবা য়াবা করি করিনো খরদি নঙসু তৌ হায়বা অসিদনি মানা মচানূপাদা তত্তনা হায়রি অমরোমদনা মানা মচানূপাদা তৌবা য়াবা খরদি নঙসু তৌ হায়না মপা অমা ওইনা পাউতাক পীরিবা অদু করি করিবুনো অমদি করম্না তৌগদবনো হায়বদুদি মেরাজাউ মশামকফাও মদু খঙজরমদে । মশানা মশাদা হংজবদা পাউখুম পীজবা ঙমদ্রবদা নোক্নীংলকই মথন্ত মেরাজাউনা ।
করিগুম্বা ইমুং অসিদা পীক্লবসু চাউরবসু লৈঙাক্কী থবক তৌবা মীওই অমত্তংবু হেক য়াওরম্লবদি লোকদাউন মনুংসে ইমুংসিদা অৱাবা অমত্তা ফাওরমদবা য়াই হায়না মেরাজাউনা খল্লকই। মাগী নূ্পীগা মচানূপীগদু লোকদাউন মমাঙদদি ময়েক নাইবা শাদুনা শেল খরা খরা থোকলম্মী মদুসু হন্দক্তি ফিবম্না য়াখিদ্রে। হিংবগা মরী লৈনবা হীরম পূম্নমকসে শেলগী মথৌ ঙাক্তনি হায়রগা মেরাজাউগী ৱাখলগী পোলোই হেক হেক ওইরম্মী ।
মায়কৈ অহুমদা সমুদ্রনা কোয়শিনবা অমদি ৱাংলবা হীমালয় চীংশাং পরেংনা শম্বল খাগৎলবা লৈবাকসি শেমগৎ শাগৎপা লোইখ্রদুনা কীন্থবা অমুক য়ৌরক্লমাল্লে , লাইরবশিংগী নুংঙাইবা হায়বদো লৈত্রে অমদি কোবিদ মৈশা মৈরক অসিদা মীশিংনা চাক্নিবগী থাক্তা তপ্না তপ্না হন্থরক্লি মেরাজাউনা খল্লি । মাবুদি খাঙলি, খাঙবা ঙম্নবা হোৎনরি , হৈনবা ঙম্নবা হোৎনরি , মনুং লেল্লে খল্লি মেরাজাউনা অদুগা মসিদা হৈননবা হোৎনবা য়াদ্রিবা, অদুগা মসিবু খাঙবা পাম্লোইদৌবা হৌরক্লিবা নহাশিং মথং মীৎকুপ্তা য়াওরক্লোই হায়নীংঙাই লৈতে হায়নসু মেরাজাউনা খল্লকই। বিভূলা চুরক্তুনা নাখোঙদা খোৎলি মেরাজাউদু।
নুমিদাংৱাইরম্নি। মপুন্সিগী অহানবা ওইনা মচানূপা মেঘ মরোল মরি ইফাই ফাইরদুনা মখোঙ অনীদু হাইরং হাইরং লেপ্পা ঙম্বোই ঙমদবোই য়ূমদা হল্লকই। কদাইদবু তৌরুরিগবা , কনাগবু পূল্লুরিগবা মেরাজাউ মচানূপাদা তিঙক য়েংদুনা লৈ । খল্লকই মেরাজাউনা তাইবঙগী অৱাবা খাঙবা পাম্লোইদৌবা চন্নফম লৈরক্ত্রবা হৌরক্লিবা মীশক অমা হায়বদো মদুগী মনুংদা মাগী মচানূপা অসিসু চল্লবরা হায়না ।
মানা লূপা ১০০ অদু মচানূপাদা পীরমদ্রবদি মচানূপানা অসুম্না হল্লক্লমগদ্রা মেরাজাউনা মশাদা হংজৈ । মেরাজাউ নীংশিংবগী মথৌ ফগৎলকই, মচানূপানা শেল পীয়ূ হায়বদা মানা শেল পীখিদবদা মাগী নুপীনা মচানূপাবু কনখৎতুনা ঙরাং হায়খিবা ৱাফম “নচানূপাগীসু তঙাই ফদবা অমা লৈরমগনি” হায়বদো মাগী নাকোঙদা নৌনা তারকই ।
0 কমেন্ট:
কমেন্ট তৌবিয়ু