আপডেট:
image

মীতৈগী শজিবু চৈরাওবা করিনো

ফুরুপ অসিনা মতমবু পাদুনা লাকপা চাওরাক্না চহী লিশীং ৫ রোম শুরে : প্রোফেসর কাংজিয়া মঙাং

ইম্ফাল, মার্চ ২১: মীগা লাইগা শম্নরিঙৈ মতমনি হায়না থাজনবা মতমদগী হৌরক্লদুনা ঙসিগী মীরোলনা কুমজা খুদিংগী শজিবুগী নোংমা পানবা নুমিৎতা পাঙথোরক্লিবা ‘শজিবু চৈরাওবা’ হায়না থৌরম অসিমক মীতৈ ফুরুপকী করি করম্বা থৌরমনো অমসুং থৌরম অসিগী নুংগী ওইবা ৱাখল্লোন্না করিনো হায়বগী মতাংদা উত্রা শঙলেন সনা কোনুংগী মায়চৈৗ পুরেল প্রোফেসর কাংজিয়া মঙাংদা পাউচে অসিনা অখন্ননা হংখিবদা মহাক্না হায়, তাইবঙ মীওইবনা তৌরিবা থবক/থৌরম, মশা-মশাগী চহী পাবদগী হৌরগা অতেনবা ঙাইহাক-ঙাইহাক্কী মতম ফাওবা খঙদবা য়াদবা পূম্নমক ওইবনা মসিসু মীওইবগী পুন্সিরোলদা য়াওদুনা লাক্লিবনি। মীতৈশিংনা মীৎকুপ-নাহুমদগী হৌরদুনা পুংলুপ-য়ুথক-নোংমা-চৈয়োম (চয়োল)-থা-চহী-হৈচক-হাচক-কোনচক-লাংবক হায়দুনা মতমবু কূপ্না পাদুনা লাকই। মতমবু পাদুনা লাক্লিবা অসি চাওরাক্না চহী লিশীং ৫ রোম শুরে হায়না সনা কোনুংগী তানয়ৈ শঙগী তানয়ৈরোইশিংনা পান্নরকই হায়রি।

মতম পাবা পূম্নমক চহী হৌবা নুমিৎ ওইরিবা মীতৈগীনা শজিবা নোংমা পানবা চৈরাওবা নুমিৎ অসিদগী হৌবা ঙাক্তনি হায়রি। থৌরম অসিগা মরী লৈননা মচাক লৌখিবা পুয়াশিংগী মনুংদা মরু ওইনা চৈলাওপগী মশীল, মশীল শীংতেক শীংশৎ, সলাই পুংলুপলোন, অমম নোংলোন, কুপালোন, নুমিৎ চৈচৎলোন, সুবিকা অশুবা, শুবীকা লাইশাপা, নোংতোল লাংপুম, থৌৱাইমিচাক খেনচংলোন, ঙাসাপকি শীকক, লাংপুং, পোৎশেমলোন, উশিল ঈরাৎ অমসুং ৱাচৎলোন পাথুপ অসিনচিংবা পুয়াশিংনি হায়রি।

চৈরাওবগী হৌরকলোন অসি য়াম্না শাংনা লৈখ্রে। অদুম ওইনমক য়াম্না তেন্না শমজিল্লগা খঙবা হৌরকলোনদি-অতিয়া শিদবা অমসুং ইমা লৈরেনহনবী অনীনা লাইগী ওইবা নুংদা চৎপা পুংলোনগী মতম পাবা হৌদোক্লে। মথংদা নোংদা লাইরেন পাখংবগী মমাঙদা পানখিবা লোলাং পাখংবগী অমুকসু মমাঙদা পানখিবা লৈনুং লোনচা অনী অলিপা কৌবা ইনিংথৌ অসিগী মতমদা নুংদা চৎপা মতমবু পানদা পুথোক্তুনা কংলাগী লৈথোংদা কংলা লৈথোং ফাৎতুনা শজিবু লৈখুল তৌদুনা শজিবু লৈখুন ফুনবগী থৌরমবু লৈবাক নিংথৌনা লুচিংদুনা পাঙথোকপা হৌরকখি।

চহী হৌবা নুমিৎ শজিবুগী নোংমা পানবগী থৌরম তৌখ্রবা মতুং শজিবু ৭নি পানবদা কংলা লৈথোং ফাৎলগা চহী অমগী ফবনা করি লৈ, ফত্তবনা করি লৈবগে হায়বা লৈনুং লোনচা অলিপা সনা হাক্তক্তগী য়েংদুনা লাকই। ফত্তবা পূম্নমক কোক্নবা থৌরম তৌরকই। সনা কোনুং তানয়ৈ শঙগী মতম পারকপগী মথক্তা পনখিবা পুয়াশিংগীসু মতেং লৌরগা নুংগী থাচৎ কুমচৎপু পানগী কুমচৎতা পুথোক্তুনা চৎনরকখিবা মতম অসি ঙসিদগী মালিয়া কুমশিং ৩৪২০ অসিদগী পারগা চহী লিশীং ৫রোমগী মমাঙদগী ওইগনি হায়না পানরি।

মালিয়া ফম্বাল চাগী চহীরোন ৩৪২০ অসিগী মমাঙদা ইনিংথৌ ঙাসাপনা পাবা হৌদোকখিবা ঙাসাপা শীংকক অসিনা হৌজিক ৩৬৪২ নি। শাসাপা নিংথৌগী মমাঙদা চহী ৭০০ চৎখৎলগা মঙাং নিংথৌ ‍পুন্সিবনা পানখিবগী ৱারী ফংলবা মরম্না ঙাশাপা শীংককনা চহী ৩৬৪২ ওইবনা মসিদা চহী ৭০০ তিনশিল্লবদি মঙাং নিংথৌ পুন্সিবনা পানখিবসি ফম্বাল তোংবদগী পারবদি হৌজিক চহী ৪৩৪২ ওইগনি হায়রি।

লিলা পাখংবনা চহী ৫০০গী মমাঙদা পাল্লম্বনি হায়বগী খুদম ফংবা হৌরক্লবা মরম্না লৈনুং লোনচা অলিপা অসি লৈনুং লোনচা পাখংবনি। লিলা পাখংবগী মতুংদা পাল্লকপা নিংথৌ ওইবনা মীতৈনা মতম পাবা হৌরকপা অসি চহী লিশীং ৫ রোমদি শুরে হয়াবদা থোইনা চিংননীংঙাই ওইদ্রে হায়রি। লিলা পাখংবনা চহী ৫০০ গী মমাঙদা পাল্লম্বনি হায়বগী খুদম ফংবা হৌরক্লবা মরম্না লৈনুং লোনচা অলিপা অসি লৈনুং লোনচা পাখংবনি। লিলা পাখংবগী মতুংদা পাল্লকপা নিংথৌ ওইবনা মীতৈনা মতম পাবা হৌরকপা অসি চহী লিশীং ৫ রোমদি শুরে হায়বদা থোইনা চিংননীংঙাই ওইদ্রে হায়রি।

অসুম্না চহী হৌবা নুমিৎপু নোংদা লাইরেন পাখংবগী সনা হাক্তক্তগী চৈ পায়দুনা লৈকায়লাকপা মরিনা কুমজা তেকহৌনরে, থাচা নৌহৌনরে, শজিবু লাকয়েল তাহরে হায়দুনা মায়কৈ মরিমক্তা শগোল তোংলবা লাউদুনা চৎলি হায়বগী শজিবু চৈরাওবা (চৈরাওবা) হায়ন খঙনরকখিবনি হায়রি।

লৈনুং লোনচা পাখংবগী মতাংদা কংলা লৈথোং ফাৎলম্বা অদু নোংদা লাইরেন পাখংবা সনা হাক্তক্তগী ‘কুমশিং কুমলোন্নরে, থাচপু থালোন্নরে’ হায়বগীদমক্তা কোংবা লৈথোং ফাৎপা শজিবু লৈখুন তৌবগী থৌরম ওইনা কোংবদা লৈবা অঙোম পোকপগী লাইফম, নিংথেম পোকপগী লাইফম অনী অসিদা হোংলকখিবনি। ঙসি ফাওবা হোংবা লৈত্রি। কংলা লৈথোং ফাৎলম্বদগী কোংবা লৈথোং ফাৎলকপা অসিনা চহী ১৯৯০ রোম শুরক্লে। হায়রিবশিং অসি চৈরাওবা থৌরমগী তেনশিল্লবা হৌরকলোননি হায়রি।

চৈরাওবগী চাক থাবগী থবক অসি য়ূমথোঙ ১০০ রোমগী মনুংদা ৯৯ রোমদি লান্না লান্না থঅনবা থেংনরি। মরমদি লৈবাক শিনবা থুংনা অচুম্বা কাঙলোন অসি খঙহন্নবা হোৎনরবসু হৌজিক ফাওবগী ওইনা য়ৌহনবা ঙমজদবগীনি হায়রি। অশেংবা কাঙলোনদি চাক্লুক অহুম থাগনি। চাক্লুক অহুম অসিগী মনুংদা য়েৎ থংবা লুকলেননা ইহান হান্না থাগনি মথংদা ময়ায় থংবা লুকলেন থারগা মথংদা ওই থংবা লুকলেন থাগনি। য়াইফরেল থৌনিবদি য়েৎতা কৎলিবা কুমসি চহীগী লুকলেন অসিনা কুমসি চহীবু পুরিবা লাই ‘কুমসনা কুমলিক লাই’ দা থৌনিগনি। মথংদা ‘লমশেনবা তুশেনবা’ লাইদা নীজগনি। অরোইবা ওইনা ওই থংবা লুকলেনগী ‘লমাবা তুশেনবা’ লাইদা নীজগনি। অরোইবা ওইনা ওই থংবা লুকলেনগী ‘লমাবা তুমাবা’ লাইদা কৎচবনি। হাকুম চহীগী তেকচাক পূম্নমক ঙাকথোকপীবা লাইনি। কৎকদবা লৈনা কুমসি চহীগীনা কুম অনৌববু পীদুনা কৎলি হায়বগী কুম-পি-কুমপি-কুমপি লৈ হায়না কৌবা লৈ কৎকনি।

লাক্কদবা চহী নোংমৈগী কুমজাবু পুবা লাইদি লমশেনবা তুশেনবনা ওইবনা কুমসিগী কুম নুমিৎ মশীং শুরগা শাৎলক্কদবা লৈনি হায়দুনা কুমশু লৈ (কুশুম লৈ) হায়না থৈতরকপদগী কৌনরিবা লৈ অসি লাই অসিনা চিনবা মরম্না কুশুম লৈ কৎকনি। অরোইবদা হাকুমগী অরোইবা চহীগী লৈনি হায়দুনা লৈরি কৌরিবা লৈ অসিনা হাকুম  চহীগী তেকচাক ফত্তবা হাওদিবা পূম্নমক ঙাকথোকপীরিবা লামাবা তুমাবা লাইনা চিল্লি হায়বগী লৈরি লৈ কৎচগনি। অসুম্না লাই অহুমগী মমিং, অহান, অকোন, লাংগদবা লৈগী মমিং, পুরিবা কুমজা অহুমগী লৈম মশক খঙলবদি য়াম্না লান্না পাঙথোক্নবদগী কোকপা ঙম্লগনি হায়রি।

চহী অমগী পুমলোই লোইবা থৌরমদি শীংথেক শীংথাবা-শীংশৎপা অসিনি হায়রদুনা অনৌবা চহীগী মনুংদা পুন্সি চেঙজেল লোইদ্রিঙৈদা শিগদবা-নাগদবা লমতা থাংজ পূম্নমক্তা শীংথেকখ্রবা লাইবক থীবা নংলগদবা মীওইশিং অদুবু লাইদা হায়জদুনা থাখিবা শীংশিং অদু শৎতোকহৌদুনা পুন্সি নুংশাংনা হিংজনবা মপুগী থৌগল শাংনা পাংজনবা তৌবা থৌরম্বু ‘শীংশৎপা’ হায়না হেন্না খঙনৈ। থৌরম অসি হৈবোক চীংগী থরোইলোক মরূদা অহিং নোংয়াই চবু লোনবদা পাঙথোক্তুনা লাক্লি হায়রি।

চহী অমগী ইহান হানবা থৌরমনা চৈথাবা হাপ্পা থৌরম অসিনি। মমাঙগী চৈথাবনা পুজরম্বা চহীদগী কুমসি চহীগী মতাও নৌনা চৈথাবা ওইগদৌরিবা অসিগী চহীনা হেন্না য়াইফবা, হেন্না ফবা ওইরসনু হায়দুনা য়াইফরোলগা লোয়ননা শিন্নবা থৌরম্বু চৈথাবা হাপ্পা থৌরম হায়না খঙনৈ। অঙাং অমা হেক পোক্লকপগা অপোকলোন হায়বদি পুন্সিগী হোরোস্কোপ অদুদা চহী অদুগী চৈথাবগী য়ূম্নাক, মিং লোইনা ইরিবনি।

মসি মতমবু য়াম্না মুন্না পাদুনা মৈতৈশিংনা থম্মী হায়বগী ময়েক লারবা খুদমনি। মারেম অসিদা অসুক ফজনা মতমবু অমসুং চহীবু, থাচৎপা পাদুনা চৎপদি অতৈ ফুরুপ অমত্তনসু তৌনদে। মৈতৈ খক্তগী তোপ তোপ্পা কাঙলোন হায়নসু মখা তারকখি। লোয়ননা চৈরাওবা নুমিৎতা ইরু শাদেংবা, থক্নবা ঈশিংদা য়ানশিনবা লাইথৌগী পোৎ পূম্নমক খিক্তোকপদা লাইথুং লায়না কোক্লিবা ঈশিং লৌফমনা খাখোং, লাইখোং, মালংখোং, পুন্সিখোং তাক্ন খা অমসুং নুংশেং ইকোননি হায়রি।

সোর্স: হুইয়েন লানপাউ 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: