মরূপ পাউচেগী অহানবা ইডিটর এম নীলমনিদা ‘তখেন রত্ন এৱার্ড’
আগরতলা, আগষ্ট ৩১ : ত্রিপুরাদা মণিপুরী লোন অমসুং সাহিত্য চাওখৎনবা হোৎনবদা নত্তনা ইংকুমজা ১৯৬৯ দা মরূপ পাউচেগী ইডিটর ওইদুনা মতম অমা মৈতৈ সমাজবু মীকপ থোকহনবদা অচৌবা থৌদাং লৌবিরম্বা ছেছুড়িয়াগী অইবা সমাজসেবক ময়েংবম নীলমনি সিংহদা মণিপুরী লিটরেরী এ্যন্ড কলচারেল ফোরামনা ‘তখেন রত্ন এৱার্ড’ পীদুনা ইকাইকুম্নগদৌরি।
লাক্লিবা সেপ্টেম্বর ১৪, আগরতলাদা পাঙথোক্কদবা থৌরম অমদা মনা অসি লান্থোক্কনি হায়রি। লেমজনিংঙাই ওইরবা মনা অসিদা শক্তাকচে, সোল অমা, মেমেন্টো, কোকয়েৎ অমসুং শেল ওইনা লুপা লিশিং মঙা য়াওগনি। মনা অসি স্মৃতি শর্মা নিউ দিল্লী অমসুং পুস্পিতা সিংহ, পুনে মহারাষ্ট্রনা কৎপনি। ফোরামনা সাহিত্যগী লমদা পীবা ‘এম.এল.সিএফ লাইফটাম এচিভমেন্ট এৱার্ড’ হন্দক চহী চলাবাসাগী শক্নাইরবা কবি অহৈবম রবীন্দ্র কুমার সিংহদা পীরগনি হায়না লাওথোকখ্রে।
কবি অসি শৈরেং লাইরিক অনী ফোঙখ্রে। ফোরামনা নহাশিংদা পীবা মনা ‘খোইস্নাম বঙ্গবীর মেমোরিয়েল য়ং টেলেন্ট এৱার্ড’ চহী অসিগী ওইনা থাংতা শান্নরোই ধর্মনগরগী রাজকুমার তাপসজিৎ তা পীরগনি। অদুগা হন্দক চহী ত্রিপুরা বোর্ডনা লৌবা মেত্রিক অমসুং হায়ার সেকেন্ডারী পরীক্ষাদা ষ্টেটকী থাক্তা পুন্না নম্বর য়াম্না ফংনা পাশ তৌবা মণিপুরী মহৈরোই অনী বাদ্যারদীঘিগী এল বিথি সিংহ অমসুং বামুটিয়া তালতলা গী তোকসুবম সুমনা দত্তদা ‘খাইদেম নিঙোল শগোলসেম ওংবী অচৌবী দেবী নীংশিং শেলগী মনা’ পীরগনি হায়রি।
মহৈরোইশিংবু পুক্নিং থৌগৎপীবা ওইনা মণিপুরগী শক্নাইরবী অইবী ড. রাজকুমারী মুসুকসনা দেবীনা শেলগী মনা অসি কৎপনি। মনা অসিদা শক্তাকচে, লেংয়ান অমা অমসুং মহৈরোই অনীদা লুপা লিশিং ৫/৫ তৌনা য়াওগনি হায়রি। অদুগা হন্দক চহী হায়ার সেকেন্ডারী অমসুং মেত্রিকতা ফার্ষ্ট ডিভিশন্দা পাশ তৌবা জিরানীয়া সাব ডিভিশন মনুং চনবা মণিপুরী মহৈরোই হায়ার সেকেন্ডারীদা হিজম অনুস্মিতা সিংহ, মেত্রিকতা রশ্মিতা সিংহ, অংকিতা সিংহ, ত্রিদিব সিংহ, অনুস্কা ভট্টাচার্য অমসুং অংকিতা ভট্টাচার্যদা ‘বিবি খোইস্নাম মেমোরিয়েল কেস এৱার্ড’ পীদুনা থৌগৎপীগনি হায়রি।
থৌরম অসিগা মরী লৈননা কে ৱান এমেচার কিক বক্সিং নেশনেল চ্যাম্পিয়ন এন মনিশ অমসুং নেরিষ্ট এন্ট্রান্স পরীক্ষাদা মকোক তারক্লবা থাংজম নেসমিকা সিংহবু তরাম্না ওক্কনি হায়রি।
সোর্স: মরূপ
0 কমেন্ট:
কমেন্ট তৌবিয়ু