মণিপুরদা অহানবা ওইনা ফেমিনা মিস ইন্দিয়া ২০২৩ গী গ্রান্দ ফিনালি পাঙথোকখ্রে
ইম্ফাল, এপ্রিল ১৫ : হৌখিবা চহী ৬০ রোম অসিদা লৈবাক অসিগী নহা ওইরিবী টেলেন্টদ নুপীশিংগী পুন্সি ট্রান্সফোর্ম তৌনবগী পান্দমদা ‘দি টাইমস গ্রুপ’ না থৌবু ওইদুনা চত্থরকখিবা ফেমিনা মিস ইন্দিয়াগী ৫৯ শুবা এদিসনগী গ্রান্দ ফিনালি ঙসি নুমিদাংৱাইরমদগী হৌরদুনা ইম্ফালগী খুমন লম্পাক্কী ইন্দোর ষ্টেদিয়ামদা পাঙথোকখিবগা লোয়ননা লৈবাক অসিগী ষ্টেট/ য়ুনিয়ন টেরিটরিশিংদগী খনগৎলবা ষ্টেট উইনার ৩০ না শরুক য়াখিবগা রাজস্থানগী নন্দিনি গুপ্তনা ফেমিনা মিস ইন্দিয়া ২০২৩ গী লুহুপ উপখিবগা লোয়ননা দিল্লীগী স্রেয়া পুনজানা ফার্ষ্ট রান্নার্স আপ তারগা মণিপুরগী থৌনাওজম ষ্ট্রেলা লুৱাংনা সেকেন্ড রান্নার্স আপ তাখ্রে।
ভি এল সী সী অমসুং ত্রেন্দসনা কো প্রজেক্ট তৌদুনা পাঙথোকখিবা থৌরম অসি মণিপুরগী টুরিজম দিপার্টমেন্টনা মপূং ওইবা থৌদাং লৌখিবনি। লৈবাক অসিগী অৱাং নোংপোক ষ্টেটশিংগী মনুংদা মণিপুরনা য়ূম্বু ওইবা অহানবা গ্রান্দ ফিনালি অসিগী জ্যুরি মেম্বারশিংনা ফেমিনা মিস ইন্দিয়া য়ুনিভার্স-২০০২ নেহা ধুপিয়া, মণিপুরগী বোক্সার লাইশ্রম সরিতা, কোরিওগ্রাফার টেরেন্স লেউইস, ফিল্ম দিরেক্টর অমসুং রাইটার হর্শভর্শন কুলকারনি অমসুং শক্নাইরবা দিজাইনার রোকি ষ্টার অমদি নম্রতা জোসিপুরানা ওইখি। গ্রান্দ ফিনালি হৌদোকপগী থৌরমদা পিজেন্ট অসিগী হান্নগী উইনারশিং সিনি শেতি, রুবাল সেখৱট, শিনাতা চৌহান, মনাসা বরানসি, মনিকাশেওকান্দ, মন্য সিংহ, সুমন রাও অমসুং শিভানি যাদবনা নীংথিনা লৈতেংলবা লেহেংগাশিং শেৎতুনা পার্ফোর্মেন্স পীরদুনা হৌদোকখি।
হৌদোকপগী থৌরমদা চীফ মিনিষ্টার এন বিরেন
লৈবাক অসিগী খ্বাইদগী চাওবা বিউটি পিজেন্ট কন্টেষ্ট অসিবু হৌদোকপগী থৌরমদা চীফ মিনিষ্টার এন বিরেননা লুচিংবা মহাক্কী মিনিষ্টারশিং/এম এল এশিং শরুক য়ারখি। লোয়ননা রাজ্য সভাগী এম পি লৈশেম্বা সনাজাওবসু শরুক য়াখি। থৌরমগা মরী লৈননা চীফ মিনিষ্টারদা পাউমীশিংনা হংবা ৱাহংশিংগী পাউখুমদা মহাক্না হায়, ফেমিনা মিস ইন্দিয়াগী পুৱারীদা মণিপুরগুম্বা য়াম্না পীকচবা ষ্টেট অসিদা টাইমস ওফ ইন্দিয়া গ্রুপনা গ্রান্দ ফিনালি পাঙথোক্নবা শিনবীবা অসিগীদমক গ্রুপ অসিবু থাগৎলি লোয়ননা ষ্টেট ময়ামদগী লক্লিবা ইচা কন্টেষ্টেন্ট ময়াম্নসু মণিপুরগী মীয়াম্বু থাগৎপা ফোঙদোক্লিবনি হায়খি।
মণিপুরগী ফজরবা কালচার অমসুং ঐখোয়গী ফুরুপ ৩৪/৩৫ গী তোঙান তোঙানবা ত্রেদিসনেল কালার, দ্রেস, চৎনবী, চিঞ্জাক ময়াম অসি উপদা কন্টেষ্টেন্টশিংনা য়াম্না অপেনবা পোক্লমগনি হায়নসু ফোঙদোকখি। ঙসিগী গ্রান্দ ফিনালি অসিগী কো-পৱার ওইখিবশিংনা ওরা, মেক-আপ পার্টনার কালার বার (মেদ ফোর মেজিক) অমসুং রজনিগন্ধা য়াওনা সিলভার পার্লস য়াওরি।
ঙসিগী কন্টেষ্টেন্টশিংনা শরুক য়াখিবা গ্রান্দ ফিনালিগী তাংফম অমা
পনবা, য়াবদি ঙসিগী কন্টেষ্টেন্টশিংনা শরুক য়াখিবা গ্রান্দ ফিনালি অসি পাঙথোক্লবা মতুংদা জজশিংনা পীরকপা দিসিজনগী মতুংইন্না ফেমিনা মিস ইন্দিয়া ২০২২ তাখিবী সিনি ছেটিনা ফেমিনা মিস ইন্দিয়াগী লুহুপ উপ্পীখিবগা লোয়ননা মহাক্না মথংগী কুমজা ২০২৪ পাঙথোক্কদৌরিবা মিস ৱার্ল্ড কন্টেষ্টতা লৈবাক অসিগী মহুৎ শিন্দুনা শরুক য়ারগনি। ফার্ষ্ট অমসুং সেকেন্দ রান্নার্স আপকী লুহুপশিংনা মমাঙথক্তা হায়রিবা মনাশিং অসি ফংখ্রবী রাজস্থানগী রুবাল সেখৱট অমসুং উত্তর প্রদেশকী সিনাতা চৌহাননা উপ্পীখি।
পনবা য়াবদি, গ্রান্দ ফিনালি অসিগীদমক কন্টেষ্টেন্টশিং থা অসিগী ৭তা ইম্ফাল এয়ারপোর্টতা থুংলবদা মণিপুরগী মীয়াম্না নাটকী ওইবা কজেংলৈ উপ্পীদুনা মখোয়বু মোইবুং খোংলগা তরাম্না ওকখিবনি। মখোয়না খ্বাইরম্বন্দ ইমা কৈথেল, শ্রীশ্রী গোবিজন্দজি টেম্পল অমসুং কংলা লাইফমলেননচিংবা মফমশিং হকথেংননা চৎতুনা য়েংখিবনি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু